ရှမ်း – ကရင်နီ(ကယား)ပြည်နယ်အစပ် ထီးစဲခါးဂိတ်တွင် စစ်ကောင်စီတပ်သားက ခမရ(၅၃၀) တပ်ရင်းမှူးအားပစ်သတ်ပြီး ကိုယ်တိုင် အဆုံးစီရင်မှုဖြစ်ပွားခဲ့ကြောင်း ဒေသခံသတင်းရင်းမြစ်များက လူထုနွေဦးသို့ ပြောသည်။
လွိုင်ကော်မြို့၏မြောက်ဘက် လွိုင်လင်လေးမြို့နယ်အတွင်းရှိ ထီးစဲခါးဂိတ်၌ စစ်ကောင်စီတပ်ဖွဲ့ဝင်များ အချင်းများမှုမှာ ယခုရက်သတ္တပတ်အတွင်း ဖြစ်ပွားခဲ့ခြင်းဟု ဆိုသည်။
“ဒီလ ၄ ရက်နေ့က ဖြစ်တာလို့ ကနဦးသိရတာ။ မသေချာလို့ ဆက်စုံစမ်းနေတာ။ဒီနေ့ လွိုင်ကော်စစ်ဆေးရုံရဲ့ထဲမှာရှိတဲ့သူက အတည်ပြုတယ်”ဟု ကရင်နီစစ်ရေးသတင်းရင်းမြစ်က ပြောသည်။
ခမရ(၅၃၀)သည် လွိုင်လင်လေး အခြေစိုက်ဖြစ်ပြီး ထီးစဲခါးဂိတ်ကို တာဝန်ယူထားသည့် စစ်ကောင်စီ၏တပ် ဖြစ်သည်။
“ပစ်လိုက်ပြီး ကိုယ့်ကိုယ်ကိုယ် သတ်သေသွားတဲ့ တပ်သားက ဂိတ်မှာ အရက်သောက်တာကို ရင်းမှူးက ပါးရိုက်ပြီး ကန်ကျောက်တယ်။အဲဒါ မကျေနပ်တော့ အနောက်ကနေ ရင်းမှူးကို ပစ်လိုက်ပြီး သူကိုယ်တိုင် သူ့လက်နက်နဲ့ ပြန်ပစ်ပြီးအဆုံးစီရင်သွားတာ”ဟု ထီးစဲခါးဂိတ်နှင့် နီးစပ်သူက ရှင်းပြသည်။
လက်ရှိတွင် ရှမ်း-ကရင်နီဒေသအကြား(ဖယ်ခုံ၊မိုးဗြဲ)တွင် တိုက်ပွဲများနေ့စဥ် ဖြစ်ပွားလျက်ရှိပြီး အထိနာနေသော စစ်ကောင်စီတပ်က ယခုလဆန်းပိုင်းကစ၍ ပြန်လည်ထိုးစစ်ဆင်နေသည်။
ထို့အပြင် ကရင်နီပြည်နယ် ဒီးမော့ဆိုမြို့အရှေ့ဘက်သို့ စစ်ကောင်စီ စစ်ကြောင်းများပြန်လည်ဝင်ရောက်လာ၍ ထိတွေ့တိုက်ပွဲများအချိန်မရွေးဖြစ်ပွားနိုင်ကြောင်း ကရင်နီအမျိုးသားများကာကွယ်ရေးတပ်(KNDF)က ယခုလ ၅ ရက်က ထုတ်ပြန်ထားသည်။
