ရှမ်းပြည်နယ်၊ တောင်ကြီးမြို့နယ်မှာ စစ်ကောင်စီက ကြီးမှူးကျင်းပတဲ့ မူးယစ်ဆေးဝါးမီးရှို့ဖျက်ဆီးပွဲကို တက်ရောက်ရတဲ့ ကျောင်းသား၊ကျောင်းသူ ၁၀ ဦးထက်မနည်းမူးမေ့လဲကျလို့ ဆေးရုံမှာ ဆေးကုသမှု ခံယူလိုက်ရပါတယ်။
မနေ့( ဇွန်လ ၂၆ ) ရက်က တောင်ကြီးမြို့ ၊အဝေရာမီးပုံးပျံကွင်းမှာ စစ်ကောင်စီက မူးယစ်ဆေးဝါးတိုက်ဖျက်ရေးနေ့ အခမ်းအနား ပြုလုပ်တာပါ။
အဲဒီပွဲကိုတက်ရောက်ရတဲ့ ကျောင်းသား ၊ကျောင်းသူ တွေ မူးမေ့လဲကျတာ ၊ သတိလစ်တာတွေ ဖြစ်ခဲ့တယ်လို့ တောင်ကြီးမြို့ ကြက်ခြေနီက ဓာတ်ပုံတွေနဲ့ ဖော်ပြပါတယ်။
ဆေးရုံဆီကို ကျောင်းသား၊ကျောင်းသူ ၁၃ ဦး ပို့ဆောင်လိုက်ရတယ်လို့လည်းသိရပါတယ်။
ကျောင်းသူ၊ကျောင်းသားတွေဟာ ပွဲမစခင် မနက်အစောပိုင်းကတည်းက လာရတာဖြစ်လို့ အစာမရှိတာ ၊ မူးယစ်ဆေးဝါးတွေ မီးရှို့လို့ထွက်လာတဲ့အနံ့အသက်တွေကြောင့် မူးမေ့လဲကုန်တာလို့ ရှေးဦးသူနာပြုနည်းနဲ့ ကုသပေးခဲ့သူ တစ်ဦးကပြောပါတယ်။
ဆေးရုံတက်ရသူ ကျောင်းသား၊ကျောင်းသူ ၁၃ ဦးထဲမှာ ၅ ဦးဟာ ဆေးရုံကနေ ဆင်းလာပြီလို့လည်းစုံစမ်းသိရပါတယ်။
