စစ်ကိုင်းတိုင်း ပုလဲမြို့နယ်ရှိ ညောင်ကုန်းကျေးရွာကို စစ်ကောင်စီက လေကြောင်းမှ ဗုံးကြဲတိုက်ခိုက်မှုတွင် ဒဏ်ရာရသူများအနက် တစ်ဦးထပ်မံသေဆုံးခဲ့ရာ စုစုပေါင်း သေဆုံးသူ ၁၀ဦးအထိရှိပြီဟု ပုလဲမြို့နယ် ပြည်သူ့အုပ်ချုပ်ရေးအဖွဲ့ခေါင်းဆောင် ဦးဇော်ထက်က ပြောသည်။
ညောင်ကုန်းကျေးရွာကို ယမန်နေ့ (ဇွန်လ ၂၇ရက်) ညနေ ၃နာရီခွဲခန့်တွင် စစ်ကောင်စီတပ်က ဂျက်ဖိုက်တာဖြင့် ဗုံးကြဲသွားခြင်းဖြစ်သည်။
“တစ်ဦး ထပ်သေဆုံးပါတယ်။ စုစုပေါင် ၁၀ဦး ရှိပါပြီ။အရေးပေါ် ကုသနေရသူတစ်ဦးလည်း ရှိနေပါတယ်”ဟု ဦးဇော်ထက်က ပြောသည်။
စစ်ကောင်စီလေကြောင်းမှ တိုက်ခိုက်မှုကြောင့် ဘုန်းကြီးကျောင်းတစ်ကျောင်း၊ လူနေအိမ် ၁၃လုံးပျက်စီးပြီး ဘုန်းကြီးတစ်ပါး ပျံလွန်တော်မူကာ အမျိုးသား ခြောက်ဦး၊ အမျိုးသမီး သုံးဦး သေဆုံးခဲ့သည်ဟု သိရသည်။ ထိုအပြင် ငါးဦးဒဏ်ရာရထားပြီး ယင်းတို့အနက်မှတစ်ဦးမှာ စိုးရိမ်ရသည့်အခြေအနေဟု ဦးဇော်ထက်က ဆိုသည်။
