စစ်ကိုင်းတိုင်း ရွှေဘိုခရိုင် ဒီပဲယင်းမြို့နယ်အတွင်းရှိ စစ်ဘေးရှောင်များပြည်သူများအတွက် ကျန်းမာရေးစောင့်ရှောက်မှုပေးနိုင်ရန် S&C မီးဘေး၊ စစ်ဘေး၊ ပညာရေးကူညီစောင့်ရှောက်ရေးအဖွဲ့မှ အခမဲ့ဆေးခန်း ဖွင့်လှစ်ပေးခဲ့ကြောင်း အဆိုပါအဖွဲ့မှ တာဝန်ရှိသူက ပြောသည်။
အဆိုပါ အခမဲ့ဆေးခန်းကို နိုင်ငံတော်၏ အတိုင်ပင်ခံ ပုဂ္ဂိုလ် ဒေါ်အောင်ဆန်းစုကြည် မွေးနေ့ အမှတ်တရ ဖွင့်လှစ်သော ပထမဆုံးဆေးခန်းဖြစ်သည်။နေ့စဥ် လူနာ ၂၀ နှင့် ၅၀ ကြား ဆေးကုသမှုများကို CDM ဆရာ၀န်၊ သူနာပြုနှင့် ပရဟိတ ကျန်းမာရေးဝန်ထမ်းများက အလှည့်ကျ ကုသပေးနေကြောင်း S&C အဖွဲ့က ပြောသည်။
![(ဓာတ်ပုံ - S&C မီးဘေး၊ စစ်ဘေး၊ ပညာရေးကူညီစောင့်ရှောက်ရေးအဖွဲ့)](https://i0.wp.com/www.ludunwayoo.com/wp-content/uploads/2023/06/355869565_605876811611115_7099694215527634440_n.jpg?resize=880%2C398&ssl=1)
” အရင်က စစ်ဘေးသင့် ပြည်သူတွေဟာ ဆေးကုသဖို့ ခက်ခဲတဲ့ အခြေအနေ ရှိခဲ့ပါတယ်။ စစ်တပ်ရဲ့ စစ်ကြောင်းထိုးမှုတွေကြောင့် တောတွင်းရှောင်တိမ်းရတဲ့ အခါမှာလည်း ရောဂါဝေဒနာ ခံစားရရင်တောင် ဆေးကုသဖို့ နေရာ မရှိ၊ ကုသပေးမဲ့သူ မရှိပါဘူး။ အခုတော့ စစ်ဘေးသင့် ပြည်သူတွေကို ကုသမှုပေးနိုင်လို့ ၀မ်းသာပီတိဖြစ်ရပါတယ်။ S&C အခမဲ့ ဆေးခန်းလေးဟာ သူတို့အတွက် အဖိုးအထိုက်တန်ဆုံး အရာတစ်ခုအဖြစ်လည်း တန်ဖိုးထားကြပါတယ် ” ဟု ယင်းအဖွဲ့က ဆိုသည်။
![(ဓာတ်ပုံ - S&C မီးဘေး၊ စစ်ဘေး၊ ပညာရေးကူညီစောင့်ရှောက်ရေးအဖွဲ့)](https://i0.wp.com/www.ludunwayoo.com/wp-content/uploads/2023/06/355698845_605876854944444_200185965846959469_n.jpg?resize=880%2C398&ssl=1)
ထို့အပြင် S&C အဖွဲ့အနေဖြင့် ပိုမိုကောင်းမွန်သော ကျန်းမာရေး စောင့်ရှောက်နိုင်မည့် အစီအစဥ်များလည်း ရှိကြောင်းနှင့် ပြည်သူများမှလည်း လိုအပ်သည့် ဆေးဝါးများကို ဆက်လက်၍ အကူအညီပေးပါရန်လည်း မေတ္တာရပ်ခံခဲ့သည်။
“တစ်ရက်ကို ၂၀ကနေ ၅၀အထိ အတွင်းလူနာလာပါတယ်။ ရေရှည်ရပ်တည်နိုင်ရေးအတွက် ဘဏ္ဍာငွေ လိုအပ်နေပါတယ်”ဟု S&Cကတာဝန်ရှိသူက ပြောသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)