ကရင်အမျိုးသားအစည်းအရုံး(KNU) ဖာပွန်ခရိုင်(မူတြော်ခရိုင်) တပ်မဟာ(၅)နယ်မြေအတွင်းသို့ စစ်ကောင်စီတပ်က တိုက်လေယာဉ်ဖြင့် လာရောက်ဗုံးကြဲတိုက်ခိုက်ခဲ့၍ အဆောက်အဦးပျက်စီးမှုရှိခဲ့ကြောင်း တပ်မဟာ(၅)က သတင်းထုတ်ပြန်သည်။
ဖာပွန်ခရိုင် ထော့ထီးပယ်ခိုဒေသသို့ ယမန်နေ့(ဇွန်လ ၂၇ရက်) နံနက် ၇နာရီခန့်တွင် တစ်ကြိမ်၊ နံနက် ၁၁နာရီခန့်တွင် တစ်ကြိမ် ဗုံးကြဲတိုက်ခိုက်လာခြင်းဖြစ်ပြီး လူမနေသည့် အဆောက်အဦးအချို့ဗုံးထိမှန် ပျက်စီးခဲ့ရသည်ဟု ဆိုသည်။
လေကြောင်း တိုက်ခိုက်မှုကြောင့် လူထိခိုက်သေဆုံးမှုမရှိကြောင်း အသိပေးခဲ့ပြီး ထိခိုက်ပျက်စီးခဲ့သည့် အဆောက်အဦးများ၏ မှတ်တမ်းဓာတ်ပုံများကို ဖော်ပြသည်။
ယခုတိုက်ခိုက်ခံရသည့်နေရာသည် ဖာပွန်(မူတြော်)ခရိုင်၏ မျိုးဆက်သစ်ကျောင်း ဖြစ်ပြီး ယခုနှစ် ဖေဖော်ဝါရီကလည်း လေကြောင်းတိုက်ခိုက်ခံရ၍ ပျက်စီးမှုရှိခဲ့ရာ လူမနေတော့သည့်နေရာဖြစ်သည်ဟု ထုတ်ပြန်သည်။
စစ်ကောင်စီတပ်သည် KNU နယ်မြေအတွင်း လေကြောင်းတိုက်ခိုက်မှုများနှင့် လက်နက်ကြီး ပစ်ခတ်မှုများ မကြာခဏလုပ်ဆောင်လျက်ရှိရာ အရပ်သားသေဆုံးထိခိုက်မှု အိုးအိမ်ပျက်စီးမှုများ မကြာခဏ ဖြစ်ပေါ်ခဲ့သည်။
KNU တပ်မဟာ(၅) အပါအဝင် တပ်မဟာအများစု၌တိုက်ပွဲများဖြစ်ပွားလျက်ရှိရာ ပြီးခဲ့သည့် မေလအတွင်း တိုက်ပွဲပေါင်း ၄၀၀ကျော်ဖြစ်ခဲ့ပြီး စစ်ကောင်စီတပ်မှ ၃၄၀ကျော်သေဆုံးခဲ့ကြောင်း KNLA ဌာနချုပ်ရုံးက အသိပေးထုတ်ပြန်ထားသည်။
