မကွေးတိုင်း၊ ရေစကြိုမြို့နယ်၊ ရေစကြို – မန္တလေးလမ်းပိုင်း ဇီးတောကျေးရွာရှိ ပျူစောထီးစခန်းအား မောင်းသူမဲ့လေယာဥ်ငယ် နှစ်စီးဖြင့် ဗုံးချတိုက်ခိုက်ခဲ့ကြောင်း ရေစကြိုမြို့နယ်ပြည်သူ့ကာကွယ်ရေးတပ်ဖွဲ့ ပြန်ကြားရေးတာဝန်ခံက ပြောသည်။
ယမန်နေ့ (သြဂုတ် ၁ရက်) ညနေ ၅နာရီခန့်က ရေစကြိုမြို့နယ်၊ ဇီးတောရွာရှိ ပျူစောထီးစခန်းအား 3Kg သယ်ဆောင်နိုင်သော မောင်းသူမဲ့ လေယာဉ်ငယ် နှစ်စီးဖြင့် ဗုံးချတိုက်ခိုက်ခဲ့ကြောင်း ဒေသတွင်းတော်လှန်ရေးအင်အားစုများက ပြောသည်။
“လေယာဥ်က နှစ်စီး၊ ဗုံးက လေးလုံး နှစ်ခေါက်ပျံတာ။ မှတ်ထားတဲ့နေရာတွေကို အော်တိုချတာ။ ဘန်ကာတွေရှိတဲ့နေရာတွေ ချတာ။”ဟု ရေစကြို(ပကဖ)အဖွဲ့ ပြန်ကြားရေးတာဝန်ခံကပြောသည်။
တိုက်ခိုက်မှုကြောင့် ဇီးတောမှပျူများ ထိခိုက်မှုရှိနိုင်ပြီး သီးခြားအတည်မပြုမနိုင်သေးကြောင်း ရေစကြို(ပကဖ)အဖွဲ့ ပြန်ကြားရေးတာဝန်ခံက ပြောသည်။
အဆိုပါစစ်ဆင်ရေးကို ပြည်သူ့ကာကွယ်ရးတပ်ဖွဲ့-ရေစကြိုမြို့နယ်(ပ.က.ဖ)နှင့်အတူ Salingyi Special Task Force – SSTF {Shar Htoo Waw နည်းပညာတပ်ဖွဲ့ Team(4)}၊Shar Htoo Waw နည်းပညာတပ်ဖွဲ့ Team(3) PDAF အစရှိသည့်အဖွဲ့များ ပူးပေါင်းဆောင်ရွက်ခဲ့ကြောင်း အသိပေးထားသည်။
ရေစကြို(ပကဖ)အဖွဲ့နှင့် မဟာမိတ်များသည် ဇူလိုင်နောက်ဆုံးပတ်ကလည်း ရှင်မတောင်ပေါ်သို့ ရိက္ခာသွားပို့သည့် စစ်ကောင်စီစစ်ကြောင်းကို အသွားအပြန်နှစ်ကြိမ်တိုင် တိုက်ခိုက်ခဲ့သေးသည်။
