ဒီးမော့ဆို – ဖရူဆိုလမ်းမကြီးပေါ်တွင် တိုက်ပွဲဖြစ်ပွားနေပြီး ပြည်သူများအသွားအလာလုံးဝမပြုလုပ်ရန် ကရင်နီအမျိုးသားများကာကွယ်ရေးတပ်(KNDF)က ထုတ်ပြန်သည်။
ယနေ့ (သြဂုတ် ၂ရက်)နံနက်ပိုင်းက ဒီးမော့ဆို – ဖရူဆိုလမ်းမကြီးပေါ်မှတဆင့် စစ်ကောင်စီ၏ တပ်ဖွဲ့များမှာ ဖရူဆိုမြို့သို့ဦးတည်၍ စစ်ကြောင်းထိုးလာသောကြောင့် တော်လှန်ရေးတပ်ပေါင်းစုများနှင့် ထိတွေ့တိုက်ပွဲဖြစ်ပွားနေခြင်းဟု ဆိုသည်။
အထက်ပါ စစ်ရေးအခြေနေများကြောင့် ဒေါညင်းခူ – ထီးပေါ့ဆို လမ်းပိုင်းအားအသုံးပြု၍ အသွားလာနေကြသောပြည်သူများအနေဖြင့် မြေပြင်စစ်ရေးအခြေနေအရ ယနေ့မှစ၍ အထက်ပါလမ်းအား ယာယီပိတ်ထားမည်ဖြစ်ပြီးဖြတ်သန်းသွားလာခြင်း လုံးဝမပြုလုပ်ကြရန် KNDF က တိုက်တွန်းသည်။
” အရင်လပိုင်းကတည်းက ဒီးမော့ဆို ဘက်က စစ်ရေးအရ ငြိမ်တယ်ဆိုပေမယ့် ရံဖန်ရံခါတော့ ထိတွေ့မှုရှိတယ်။အခုကတော့ သူတို့ဘက်က စစ်ကြောင်းထိုးလာလို့ တိုက်ပွဲ ဖြစ်နေတယ်ပေါ့။ဘာရည်ရွယ်ချက်နဲ့ ထိုးလာလဲဆိုတာ မသိရပေမယ့် အဓိကတော့ သူတို့အတွက် နယ်မြေစိုးမိုးရေးပဲလို့ မြင်တယ်”ဟု ကရင်နီအမျိုးသားများကာကွယ်ရေးတပ်(KNDF)တာဝန်ရှိသူက လူထုနွေဦးသို့ ပြောသည်။
မကြာသေးမီရက်ပိုင်းကလည်း နယ်မြေစိုးမိုးရေးနှင့် ရိက္ခာများအဆက်မပြတ်ဖြည့်တင်းနေသော လွိုင်ကော် – မိုးဗြဲလမ်းပိုင်း တိုက်ပွဲ၌ စစ်ကောင်စီတပ်၂၀ ဦးသေဆုံးပြီး ကရင်နီပူးပေါင်းတပ်က လက်နက် ရှစ်လက်ရရှိခဲ့သည်။
ကရင်နီ(ကယား)ဒေသအတွင်း အထိနာနေသော စစ်ကောင်စီတပ်က ဇွန်လလယ်ပိုင်းကစ၍ ရှမ်းပြည်နယ် အခြေစိုက်တပ်ရင်းများ အပါအဝင် တပ်မ (၄၄)၊ (၅၅)၊(၆၆)နှင့်(၉၉) လက်အောက်ခံတပ်ရင်းများစွာကို ဖြန့်ကျက်ပို့ဆောင်လျက်ရှိသည်။
ထို့ကြောင့် လက်ရှိ ဖရူဆို၊ဖားဆောင်း၊မယ်စဲ့၊လွိုင်ကော် နှင့် မိုးဗြဲမြို့တို့တွင် တိုက်ပွဲများနေ့စဥ်နီးပါး ဖြစ်ပွားလျက်ရှိသည်။
