အာဏာသိမ်းစစ်ကောင်စီတပ်သား ၆ဦးသည် ကရင်အမျိုးသားအစည်းအရုံး(KNU)နှင့် ချိတ်ဆက်ပြီး ပြည်သူ့ဘက်ရပ်တည်ပူးပေါင်းလာကြောင်း Salween Press က ယနေ့ သတင်းဖော်ပြသည်။
အောက်တိုဘာ လလယ်ပိုင်းတွင် စစ်ကောင်စီ၏ ခမရ (၄၃၂)မှ တပ်သား ၅ဦး၊ စစ်အင်ဂျင်နီယာတပ်(စအရ-၉၁၈) မှ တပ်ကြပ်တစ်ဦးသည် ပြည်သူ့ဘက်ရပ်တည်လာခြင်းဖြစ်ပြီး ၎င်းတို့အား လွတ်မြောက်နယ်မြေဆီသို့ ပို့ဆောင်ကာ လိုအပ်သည်များ ကူညီပေးလျက်ရှိကြောင်း တာဝန်ရှိသူများကို ကိုးကားဖော်ပြသည်။
ပြည်သူ့ထံပူးပေါင်းလာသည့် စစ်ကောင်စီတပ်သား ၆ဦး ထမင်းဆုံစားနေသည့် ဓာတ်ပုံမှတ်တမ်းကိုလည်း ဖော်ပြသည်။
KNU သတင်းရင်းမြစ်တစ်ဦးကလည်း ယင်းသို့အလင်းဝင်ရောက် ပူးပေါင်းလာမှုများ ဆက်လက်ရှိနေဆဲဖြစ်သည်ဟု ပြောပြသည်။
ပြည်သူ့ဘက် ပူးပေါင်းလာမှုများနှင့်ပတ်သက်ပြီး နိုင်ငံရေးသတိ၊ စစ်ရေးသတိဖြင့် လက်ခံရမည်ဖြစ်ပြီး စစ်ကောင်စီတပ်သားများ ပြည်သူ့ထံ ပူးပေါင်းလာရန် နောက်မကျသေးဟုလည်း KNU သတင်းရင်းမြစ်က ပြောသည်။
Public Service Announcement
“ဝင်လာတာများတာပေါ့။ တပ်မဟာ(၆)မှာ အများဆုံးပဲ။ အခုအချိန်မှာကတော့ အချိန်ရောက်ပြီ။ အခုကလည်း ကျနော်တို့ ပြည်သူ့ကာကွယ်ရေးစစ်တပ်နဲ့ကျနော်တို့ တိုင်းရင်းသားတွေ တက်ညီလက်ညီနဲ့ တိုက်ပွဲဝင်နေပြီ။ စကစရဲ့အုပ်ချုပ်ရေးယန္တရားတွေကို ဖြိုရမှာပဲ။ အဲဒါကြောင့် အခုအချိန် ပူးပေါင်းလာရင် နောက်မကျဘူး”ဟု KNU သတင်းရင်းမြစ်က ပြောသည်။
စစ်ကောင်စီတပ်သားများအနေဖြင့်လည်း အခွင့်ကောင်းရှိနေသည့် အခြေအနေတွင် ပြည်သူ့ဘက် ပူးပေါင်းလာကြရန် တိုက်တွန်းလိုကြောင်း ၎င်းက ပြောသည်။
