မန္တလေးတိုင်း၊ မိတ္ထီလာမြို့တွင် နေအိမ် ၄၀ခန့်အား ကျူးကျော်ဆောက်လုပ်ထားသည်ဟုဆိုကာ စစ်ကောင်စီက ဖယ်ရှားခဲ့ကြောင်း ဒေသခံများက ပြောသည်။
မိတ္ထီလာမြို့၊ အောင်ဇေယျာရပ်ကွက်ရှိ နေအိမ်၄၀ခန့်သည် ဟိုတယ်နှင့် ခရီးသွားလာရေးဝန်ကြီးဌာနပိုင် မြေနေရာ၌ ကျူးကျော်နေထိုင်နေသည်ဟုဆိုကာ စစ်ကောင်စီက စာထုတ်ဖယ်ရှားခိုင်းခဲ့ကြောင်း၊ ထို့နောက် ယမန်နေ့( အောက်တိုဘာ ၂၆ ရက်)တွင် နေအိမ်များအား ဖျက်သိမ်းဖယ်ရှားပေးခဲ့ရကြောင်း ဒေသခံများက ပြောသည်။
“ကန်အောက်က(ကရဝိတ်အနီးက) ရပ်ကွက်ထဲဖျက်တာ။ အလုပ်အကိုင်တွေမှ အဆင်မပြေပါဘူးဆိုနေ ဘယ်များသွားနေကြမလဲ။ လက်တလောသူတို့ နေစရာမရှိဘူး။”ဟု မိတ္ထီလာမြို့ခံတစ်ဦးက ပြောသည်။
စစ်ကောင်စီဘက်က တပ်သားအင်အားများလာရောက်ချထားပေးခဲ့၍ ယမန်နေ့က နေ့ချင်းပြီး ဖျက်သိမ်းပေးခဲ့ရသည်ဟု ဒေသခံများက ဆိုသည်။
အာဏာသိမ်းစစ်ကောင်စီတပ်သည် ရန်ကုန်၊ မန္တလေးနှင့် မြို့ကြီးအချို့တွင်လည်း ကျူးကျော်ဟုဆိုကာ ရပ်ကွက်အများအပြားအား ဖိအားပေးပြောင်းရွှေ့စေခိုင်းမှုများ ပြုလုပ်နေသည်။
Public Service Announcement
