ကချင်နှင့် ရှမ်းမြောက်ရှိ တပ်စခန်း ၄ခုထက်မနည်းကို တိုင်းရင်းသားတပ်များက ယနေ့သိမ်းပိုက်ထား
ရှမ်းပြည်နယ်မြောက်ပိုင်း လားရှိုးနှင့် သိန္နီမြို့နယ်ကြားရှိ စစ်ကောင်စီတပ်စခန်းတစ်ခုကို ဝင်ရောက်တိုက်ခိုက်ရန် ချဉ်းကပ်စဉ် စစ်ကောင်စီတပ်တစ်ခုလုံး စခန်းလုံးကျွတ်ထွက်ပြေးသွား၍ သိမ်းပိုက်နိုင်ခဲ့ကြောင်း တအာင်းတပ်မတော်(TNLA)က သတင်းထုတ်ပြန်သည်။
‘၁၀၂၇ စစ်ဆင်ရေး’ ၅ရက်မြောက်နေ့ စစ်ရေးအခြေအနေကို ဖော်ပြရာ လားရှိုးနှင့် သိန္နီမြို့နယ်ကြားရှိ စစ်ကောင်စီ၏ မိုင်းပါးတပ်စခန်းကို အောက်တိုဘာ ၃၀ ရက် ညပိုင်းတွင် TNLAက အနီးကပ် ချဉ်းကပ်ခဲ့ကြောင်း၊ မိုင်းပါးတပ်စခန်းအတွင်း အခြေချနေထိုင်သည့် စစ်ကောင်စီတပ်မှ ညသန်းခေါင်ကျော်ချိန်တွင် စခန်းလုံးကျွတ် ထွက်ပြေးသွားခဲ့ကြောင်း ဖော်ပြသည်။
ထို့ကြောင့် ယနေ့ (အောက်တိုဘာ ၃၁ရက်) နံနက် ၄နာရီတွင် TNLAက သွားရောက်ရှင်းလင်း သိမ်းပိုက်ခဲ့သည်ဟု အသိပေးထားသည်။
အဆိုပါတပ်စခန်း သိမ်းပိုက်မှုအပါအဝင် ကချင်နှင့် ရှမ်းမြောက်ရှိ တပ်စခန်း ၄ခုထက်မနည်းကို ယနေ့တွင် တိုက်ခိုက်သိမ်းပိုက်ထားပြီးဖြစ်သည်။ ကချင်ပြည်နယ် ဝိုင်းမော်မြို့နယ် ကန်တော်ယန်တပ်စခန်းကို ကချင်လွတ်လပ်ရေးတပ်မတော်(KIA)က ယနေ့မနက်တွင် သိမ်းပိုက်ခဲ့သည်။
ထို့ပြင် ချင်းရွှေဟော်ဒေသ မြောက်ပိုင်းရှိ စစ်ကောင်စီတပ်စခန်း ၂ခုကိုလည်း ကိုးကန့်တပ်မတော်(MNDAA)က သိမ်းပိုက်ခဲ့သည်။
Public Service Announcement
ယမန်နေ့ ညပိုင်းကလည်း သိန္နီနှင့် ချင်းရွှေဟော်ကြားရှိ စစ်ကောင်စီတပ်စခန်းတစ်ခုကို ရက္ခိုင့်တပ်တော်(AA)က သိမ်းပိုက်ထားကြောင်း MNDAA ပြောရေးဆိုခွင့်ရှိသူ လီကျာဝင်းက ပြောပြထားသည်။
ယနေ့(အောက်တိုဘာ ၃၁ရက်)တွင် စစ်ကောင်စီ ကျောက်မဲမြို့နယ်ဘက်မှ လက်နက်ကြီးများ ရမ်းပစ်နေသည်ဟု အသိပေးသည်။ ကျောက်မဲမှနေ၍ ဟောင်ဝစ်ဇာအမြောက်ဖြင့် ပန်စံကျေးရွာဘက်သို့ ရမ်းသမ်းပစ်ခတ်တိုက်ခိုက်လျက်ရှိကြောင်း ဖော်ပြထားပြီး ထိခိုက်မှုရှိ၊မရှိ ဖော်ပြမထားပေ။
ယခု စစ်ဆင်ရေးကာလအတွင်း စစ်ရေးတင်းမာနေသည့် အရပ်ဒေသ/တိုက်ပွဲဖြစ်ပွားနေသည့် အရပ်ဒေသများသို ပြည်သူများအနေဖြင့် ဘေးကင်းလုံခြုံမှု၊ ဘေးအန္တာရာယ် မှ ရှောင်ရှားနိုင်စေရန် ခရီးသွားလာခြင်း မပြုလုပ်ကြရန် TNLAက အသိပေးမေတ္တာရပ်ခံထားသည်။ မဖြစ်မနေခရီးသွားလာရမည် ဆိုပါက သက်ဆိုင်ရာ PSLF/TNLA အုပ်ချုပ်ရေးအဖွဲ့၊တပ်ရင်း တပ်ဖွဲတို့ထံ သတင်းပို့ ခွင့်ပြုချက်တောင်းခံသွားရန် အသိပေးကြောင်း ဖော်ပြသည်။
