ပခုက္ကူတပ်မ(၁၀၁)စစ်ကြောင်း တိုက်ခိုက်ခံရပြီး ၁၂ ဦးထက်မနည်းသေဟု မြိုင်ပကဖ ပြော

ဟာနာဆန်/People’s Spring

မကွေးတိုင်း၊ မြိုင်မြို့နယ်တွင် ပခုက္ကူမြို့အခြေစိုက် အမှတ်(၁၀၁)ခြေမြန်တပ်မဌာနချုပ်မှ စစ်ကြောင်းအား တိုက်ခိုက်ရာ စစ်ကောင်စီတပ်သား ၁၂ဦးထက်မနည်း သေဆုံးပြီး စစ်သုံ့ပန်း ၅ ဦး ဖမ်းမိကြောင်း မြိုင်မြို့နယ်ပြည်သူ့ကာကွယ်ရေးအဖွဲ့(ပကဖ) တာဝန်ရှိသူက ပြောသည်။

သြဂုတ် ၂၁ ရက် နံနက် ၆နာရီခန့်က မြိုင်မြို့နယ်၊ ကိုင်းတောမရွာသစ်ကျေးရွာမှလာသော တမခ(၁၀၁)မှ စစ်ကောင်စီစစ်ကြောင်းအား ဒေသတွင်းတော်လှန်ရေးတပ်များပူးပေါင်း၍ ခြုံခိုက်တိုက်ခိုက်ခဲ့ခြင်း ဖြစ်သည်။

တိုက်ခိုက်မှုအတွင်း စစ်ကောင်စီတပ်သား ၁၂ဦးထက်မနည်း သေဆုံးပြီး စစ်သုံ့ပန်း ၅ ဦး ဖမ်းမိကာ သေနတ် ၁၉ လက်အပါအဝင် ခဲယမ်းများရရှိခဲ့ကြောင်း မြိုင်ပကဖ တာဝန်ရှိသူက ပြောသည်။

Public Service Announcement

“သူတို့က ကျန်တဲ့ရွာတွေကို လုပ်မယ်ဆိုပြီး ရွာထဲချန်တဲ့သူကချန် သုံးလေးဆယ်လောက်ထွက်လာတာ။ အဲဒီမှာ​ကျွန်တော်တို့ကခြုံခိုတာနဲ့ ထိတွေ့မှုဖြစ်ကြတာ။ သူတို့အခြေပြုထားတဲ့ဘုန်းကြီးကျောင်းရဲ့ ယာလေးငါးခြောက်ခင်း အကွာလောက်မှာဖြစ်တာ။”ဟု မြိုင် ပကဖမှ ရဲဘော်တစ်ဦးက ပြောသည်။

တိုက်ခိုက်မှုကြောင့် စစ်ကောင်စီတပ်သားအလောင်း ၁၂ လောင်း မျက်မြင်တွေ့ရှိခဲ့ရပြီး လက်နက်ချအညံ့ခံသူ ၅ဦးရှိသည်ဟု ဆိုသည်။

ထို့အပြင် MA1 – ၆ လတ် ၊ MA2 – ၃ လတ် ၊ MA3 – ၄လတ် ၊ MA4 – ၁ လတ် ၊ MA11 – ၁ လတ် ၊ G3 – ၂လတ်အပါအဝင် လက်နက်ခဲယမ်းအများအပြားသိမ်းဆည်းရမိခဲ့ကြောင်း မြိုင်ပကဖ က အသိပေးသည်။

အဆိုပါ စစ်ကြောင်းသည် ပခုက္ကူမြို့အခြေစိုက် အမှတ်(၁၀၁)ခြေမြန်တပ်မဌာနချုပ်မှ စစ်ကြောင်းဖြစ်ပြီး ပြီးခဲ့သည့်ဇွန်လကလည်းက မြိုင်မြို့နယ်သို့ ရောက်ရှိလာကြောင်း၊ ယခု သြဂုတ်အတွင်း ကိုင်းတောမရွာသစ်ကျေးရွာသို့ရောက်ရှိ အခြေချကာ အနီးနားပတ်ဝန်းကျင်ကျေးရွာများအား ခိုးဆိုးလုယက်၊ မီးရှို့ဖျက်ဆီးနေသော စစ်ကြောင်းဖြစ်ကြောင်း မြိုင်ပကဖ တာဝန်ရှိသူက ပြောသည်။

အဆိုပါတိုက်ခိုက်မှုကို မြိုင် ပကဖ ၊ ပခုက္ကူခရိုင်တပ်ရင်းအမှတ်(၂ ၊ ၆ ၊ ၇)တပ်ရင်းများ ၊ ပကဖတပ်ပေါင်းစု အမှတ်(၁) တပ်ရင်း၊ ပခုက္ကူစုဖွဲ့မှု( Earthquake ၊ PPDF ၊ Young Force) ၊ အညာမြေတပ်ပေါင်းစု ၊ ကမ္မတပ်ပေါင်းစု ၊ BLY တပ်ဖွဲ့ ၊ PKU- THURAIN ၊ စကြာပြည်သူ့ကာကွယ်‎ေရေးတပ်ဖွဲ့ ၊ ဝံပုလွေပြည်သူ့ကာကွယ်ရေးတပ်ဖွဲ့ ၊ ဂဠုန်ပြည်သူ့ကာကွယ်ရေးတပ်ဖွဲ့(မြိုင်) ၊ အလင်းတန်းပျောက်ကြားတပ်ဖွဲ့ ၊ PLC တပ်ပေါင်းစု ၊ ဓားမင်းကြီးတပ်ဖွဲ့ ၊ Justice Revolution Force နှင့်အခြားသော ဒေသတွင်းလက်နက်ကြီးငယ်အဖွဲ့များ ၊ ဒရုန်းတပ်ဖွဲ့များက ပူးပေါင်းတိုက်ခိုက်ခဲ့ခြင်းဖြစ်သည်။

သြဂုတ် ၇ ရက်နှင့် ၈ ရက်ကလည်း ပခုက္ကူခရိုင်၊ မြိုင်မြို့နယ်အတွင်းရှိ ကိုင်းတောမရဲစခန်းနှင့် ဝက်ပုတ်ပျူစောထီးစခန်းများအား ဒေသတွင်းPDFများက သိမ်းပိုက်ခဲ့သည်။

သေဆုံးအမှတ်(၁၀၁)ခြေမြန်တပ်မဌာနချုပ်စစ်ကြောင်းမှ တပ်သားများ၏ ရုပ်အလောင်းများအား https://t.me/PeopleSpring တွင် သွားရောက်ကြည့်ရှု့နိုင်ပါသည်။