ဒီပ/People’s Spring
အာဏာသိမ်းခေါင်းဆောင် မင်းအောင်လှိုင် က အာဏာရှင်ဟောင်း ဗိုလ်ချုပ်နေဝင်းထက် တိုင်းပြည်ဖျက်ရာတွင် သာသွားသောအချက်တစ်ချက်ရှိလာသည်။ ထိုအချက်မှာ ၂၀၂၄ ခုနှစ်သြဂုတ်လတွင် ပိုထင်ရှားလာသည်။
ဗိုလ်ချုပ်နေဝင်းက ၁၉၈၇ စက်တင်ဘာ ၅ ရက်တွင် ၂၅ ကျပ်၊၃၅ ကျပ်၊ ၇၅ ကျပ် တန် ငွေစက္ကူများကို တရားမဝင်ငွေကြေး (ငွေမည်း)အဖြစ်ကြေညာ၍ တတိုင်းပြည်လုံးမှ ပြည်သူများကိုဒုက္ခရောက်စေခဲ့သည်။ အာဏာရှင်လက်သစ် ဗိုလ်ချုပ်မှူးကြီး မင်းအောင်လှိုင်ကတော့ ငွေမည်းခြင်းထက်ပင်အဆင့်လွန်၍ ငွေကိုအငွေ့ပျံအောင်လုပ်ခဲ့ခြင်းဖြစ်သည်။ အငွေ့ပျံကုန်သောငွေစက္ကူများမှာ ဗိုလ်ချုပ်နေဝင်းလက်ထက်က ငွေမည်းခဲ့သလို သုံးမျိုးတည်းမဟုတ် တနိုင်ငံလုံး ရှိရှိသမျှကျပ်ငွေစက္ကူအားလုံးမှာ တန်ဖိုးနည်းနည်းသာကျန်အောင်အငွေ့ပျံကုန်၏ ။
![Public Service Announcement](https://i0.wp.com/www.ludunwayoo.com/wp-content/uploads/2024/04/Safer-practices_inside_psa_ads.jpg?resize=880%2C138&ssl=1)
Public Service Announcement
၂၀၂၄ ခုနှစ် သြဂုတ်လ ၁၃ရက်တွင်အမေရီကန် ၁ ဒေါ်လာလျင် ၇၀၀၀ ကျပ် ၊ တရုတ် ၁ ယွမ်လျင် ၁၀၀၀ ကျပ် ၊ထိုင်း ၁ ဘတ်လျင် ၂၀၀ ကျပ်ဖြင့်သမိုင်းတလျှောက် ကျပ်ငွေတန်ဖိုး အနိမ့်ဆုံးထိုးဆင်းသွားသည်။ စစ်တပ် အာဏာမသိမ်းခင်က ၁ ဒေါ်လာ ၁၃၃၇ ကျပ် ၊ တရုတ် ၁ ယွမ် ၂၀၉ ကျပ် နှင့် ထိုင်း ၁ ဘတ်လျင် ၅၀ ကျပ်အောက်သာရှိခဲ့သည်။ ထိုကြောင့် စစ်တပ်အာဏာမသိမ်းခင်က နှင့် နှိုင်းယှဥ်လျင် ဒေါ်လာတန်ဖိုးမှာ ၅ ဆကျော် ၊ ယွမ်တန်ဘိုးမှာ ၅ ဆခန့် ၊ဘတ်တန်ဖိုးမှာ ၄ ဆဝန်းကျင်ထိုးတက်ကုန်ပြီး ကျပ်တန်ဖိုးမှာ ဇောက်ထိုးဆင်းသွားခြင်းဖြစ်သည်။
ဒေါ်လာဈေး ၊ဘတ်ဈေး တက်ခြင်းမှာ ငါတို့နှင့်မဆိုင်ဟု မထင်လိုက်ပါနှင့် ။ စက်သုံးဆီမှအစ ထုတ်ကုန်အများစုပြည်ပမှ တင်သွင်းရသောနိုင်ငံတွင် ဒေါ်လာဈေးထိုးတက်၍ စက်သုံးဆီတင်သွင်းရောင်းချသူများဆက်သွင်းလျင် အရှုံးပေါ်မည်စိုး၍ ရပ်ကုန်ရာမှ စက်သုံးဆီများပြတ်လပ်ကုန်သည်။ ငွေကြေးဖောင်းပွမှုကြောင့် ကုန်ဈေးနှုန်းများမိုးထိုးကုန်သည်။
အာဏသိမ်းခင်က ကြက်ဥ ၁ လုံး ၁၀၀ ကျပ်အောက်သာရှိရာမှယခုအခါ အနိမ့်ဆုံး ၄၀၀ ကျပ်ဖြစ်လာသည်။ ကန်စွန်းရွက် ၁ စည်း ၁၀၀ ကျပ်မှ ၅၀၀ ကျပ်သို့ထိုးတက်လာသည်။ ဆန်ချော တစ်ပြည် ၁၅၀၀ ကျပ် မှ ၇၀၀၀ ကျပ်ဝန်းကျင်ဖြစ်ကုန်သည်။စားအုန်းဆီ မှာလည်း တစ်ပိသာ ၂၃၀၀ ကျပ်မှ ယခုအခါပြင်ပဈေးကွက်တွင်အနိမ့်ဆုံး ၁၅,၀၀၀ ကျပ်ဖြင့်ဝယ်ရသည်။စက်သုံးဆီ ၁ လီတာ (ဓါတ်ဆီ ၉၅ ) ၇၆၅ ကျပ် မှ ယခုအခါစစ်ကောင်စီ သတ်မှတ်ဈေးမှာပင် ၃၁၄၀ ကျပ်ရှိသည်။ ယခင်လိုလွယ်လွယ်ကူကူဝယ်မရတော့သဖြင့် မှောင်ခိုဈေးကွက်များပေါ်လာပြီး မှောင်ခိုဈေးကွက်တွင် စက်သုံးဆီဆီ ၁ လီတာ ကို ၆၀၀၀ ကျော်ပေးဝယ်ရသည်။
တက်ကုန်သောဈေးနှုန်းများကိုကြည့်လျင် အနိမ့်ဆုံး လေးဆနှင့်အထက်ဖြစ်ကုန်တော့သည်။
ထိုကြောင့် လူတိုင်း၏ လက်ထဲ၊ ဘဏ်ထဲမှ ကျပ်ငွေ စက္ကူများမှာ ဘာမှမလုပ်ရပါဘဲ ၊ဘာအပြစ်မှ မကျူးလွန်ပါဘဲ မင်းအောင်လှိုင် အာဏာရူးမှုအကြောင်းပြု၍ ၃ နှစ်ကျော်အတွင်း တဟုန်းထိုးတန်းဖိုးနည်းသွားသည်။ရာခိုင်နှုန်းဖြင့်ပြောရလျင် ၈၀ ရာခိုင်နှုန်းခန့်အငွေ့ပျံကုန်သည်။့
ထိုအခြေအနေမှာ စစ်တပ်အာဏာသိမ်းရန်မြှောက်ပေးခဲ့ကြသော ပါတီ ၂၀ ကျော် နှင့် လုပ်ငန်းရှင်များရော ၊ စစ်တပ်မိသားစုဝင်များ၊ကြံ့ဖွံ့ပါတီဝင်များ၊ မဘသများ စသဖြင့် မည်သူမျှ ကင်းလွတ်ခွင့်မရပါ။
သို့သော် ၂၀၂၁ ဖေဖော်ဝါရီ ၁ ရက်မှ စကျရောက်ခဲ့သောစစ်ကျွန် ဘဝ တွင် ရှိစုမဲ့စု လက်ထဲမှ ငွေကလေး အငွေ့ပျံသွားခြင်းသည်ပင် အဆိုးဆုံးအခြေအနေမဟုတ်သေးပါ ။ စစ်ကောင်စီက နိုင်ငံသားတိုင်းကို အကြောင်းပြချက်မရှိ ဖမ်းဆီးချင်လျင်ဖမ်းသည် ၊သတ်လိုလျင်သတ်သည် ပိုင်ဆိုင်မှုများအားလုံးသိမ်းလိုလျင် အကြောင်းပြချက်မလို သိမ်းနေသည်။ ထိုအခြေအနေများနှင့် စာလျင် လက်ထဲမှငွေ အငွေ့ပျံ သွားခြင်းမှာ တော်သေးသည်ဟုဆိုရမလိုပင်ဖြစ်နေသည်။
တကယ့် ပြသာနာမှာ ငွေကြေးဖောင်းပွပြီး ကုန်ဈေးနှုန်းများလေး၊ငါးဆ တက်ကုန်သော်လည်း ပြည်သူအများစု၏ ဝင်ငွေတိုးမလာခြင်းပင် ။ဝင်ငွေ မတိုးဘဲ ကုန်ဈေးနှုန်းများတက်ကုန်၍ ပြည်သူများဒုက္ခရောက်ကြသည်။ သူတို့ထက် ဒုက္ခပိုရောက်သူများမှာ တိုင်းပြည်စီးပွားပျက်၍ အလုပ်ပြုတ်သွားသူများပင်ဖြစ်၏ ။ အလုပ်လက်မဲ့ များနေချိန်တွင် ကုန်ဈေးနှုန်းများအဆမတန်မြင့်တက်မှုက ရေနစ်သူကိုဝါးကူထိုးသောအခြေအနေပင်။
ထိုကြောင့် နိုင်ငံတွင် ဆင်းရဲနွမ်းပါးသူတဟုန်ထိုးတိုးလာသည်။ ကမ္ဘာဘဏ်၏ ၂၀၂၄ ဇွန် ၁၂ ရက်ထုတ်ပြန်သောအစီရင်ခံစာတွင်ပင် မြန်မာတွင် စစ်တပ်အာဏာသိမ်းပြီး သုံးနှစ်ကျော်အတွင်း ဆင်းရဲနွမ်းပါးသူ ခုနှစ်သန်းကျော်တိုးလာကြောင်းဖော်ပြထားသည်။ ယနေ့အခြေအနေမှာထိုထက် သန်းပေါင်းများစွာထပ်တိုးသွာပြီဟုသုံးသပ်ရသည်။
ကျပ်ငွေအခြေအနေ အရေးပေါ်ခွဲခန်းရောက်လာချိန်တွင် စစ်ကောင်စီက ရေတိုဖြေရှင်းနည်း အဖြစ်စက်သုံဆီတင်သွင်းသူများကို ဆီဝယ်နိုင်ရန် ဒေါ်လာသန်း၁၀၀ ထုတ်ရောင်းမည်ဟုကြေညာသည်။ စက်သုံးဆီရောင်းဈေးများကိုလည်း ဈေးမြင့်ပေးလိုက်သည်။ငွေဖောင်းပွမှုကို ထိန်းရန်ဆိုကာ ဘဏ်အပ်ငွေအပေါ် ပေးမည်ဆိုသောဘဏ်အတိုးနှုန်းများကိုမြှင့်လိုက်သလို ၊ပို့ကုန်လုပ်ငန်းရှင်များဆီမှ ဒေါ်လာပိုရအောင် ပို့ကုန်ရငွေများမှ စစ်ကောင်စီသတ်မှတ်ထားသောတစ်ဒေါ်လာ ၂၁၀၀ ကျပ်ဖြင့်မဖြစ်မနေ ရောင်းရသောရာခိုင်နှုန်းကို ၁၀ ရာခိုင်နှုန်းလျော့၍ ဆွဲဆောင်သောနည်းကိုသုံးလာသည်။
စစ်ကောင်စီ၏ ဆေးမြီးတိုကုထုံးကြောင့် ဒေါ်လာဈေး ခေတ္တပြန်ကျခဲ့သော်လည်း ယခုအခါဈေးပြန်တက်နေပြီဖြစ်သည်။ ယခုနိုင်ငံတွင်ဖြစ်ပွားနေသော စီးပွားပျက်ကပ်မှ စ၍ လူမှုရေးပြသာနာ၊ကျန်းမာရေးပြသာနာ၊ ပညာရေးပြသာနာ ၊လူသားဘဝလုံခြုံမှုကင်းမဲ့ခြင်းပြသာနာ စသော ပြသာနာအရပ်ရပ် နှင့် ဒေသအနှံဖြစ်ပွားနေသောတိုက်ပွဲများ၏ ဇာစ်မြစ်မှာ စစ်တပ်အာဏာသိမ်းမှုကြောင့်ပေါ်ပေါက်လာသောဖြစ်သာနာများဖြစ်သည်။
ပြသာနာ၏ ရင်းမြစ်ကို မဖြေရှင်းနိုင်ပါဘဲ ပြေလည်ရန် မျှော်လင့်၍ မရနိုင်ပါ ။
ကုန်သွယ်ရေး နှင့် ပြည်ပရင်းနှီးမြှပ်နံမှုလျော့ကျမှု ၊မီးပြတ်မှု နှင့် စစ်မှုမထမ်းမနေရဥပဒေကြောင့်လူငယ်များတိမ်းရှောင်သွားကြရပြီးကုန်ထုတ်လုပ်မှုများလျော့ကျမှုစသည့်ပြသာနာများမှာ စီးပွားရေးကိုအခြေအနေဆိုးစေခဲ့သည်။သို့သော်ငွေကြေးဖောင်းပွမှုဖြစ်စေသောအချက်များစွာထဲတွင် အဓိက အကျဆုံးအချက်မှာ စစ်အုပ်စုသည် ဘက်ဂျက်လိုငွေ မှန်သမျှကို ငွေစက္ကူများ အား အတိုင်းအဆမရှိ ရိုက်နှိပ်ခဲ့ခြင်းဖြစ်သည်။
စစ်တပ်အာဏာသိမ်းပြီးချိန်မှ ၂၀၂၄ နှစ်ဆန်းပိုင်းအထိ့ ၃ နှစ်ကျော်အတွင်းကျပ်ငွေ ဘီလီယံ ၂၀,၀၀၀ ကျော်ရိုက်နှိပ်ထုတ်ဝေခဲ့သည်။ထိုပမာဏာမှာသမိုင်းတလျှောက်အများဆုံးပင် ။ ယခုလပိုင်းအတွင်း ပြည်သူများကငွေပြန်ထုတ်သူများပြီး ဘဏ်များ၌ ငွေမရှိတော့သောအခါ အများအပြားထပ်မံရိုက်နှိပ်ခဲ့သောကြောင်း လက်ရှိအခြေအနေမှာ အထက်ပါ ပမာဏထက်ပင် များစွာပိုများနေမည်မှာအသေအချာဖြစ်သည်။
ထိုအခြေအနေကို ပိုဆိုးစေသည်မှာ ကိုယ့်အခြေအနေကိုယ်မသိသော စစ်ကောင်စီ၏ စီမံခန့်ခွဲမှု အမှားများဆက်တိုက်ပြုလုပ်ခဲ့သည်။ ဈေးတက်သည်နှင့် လုပ်ငန်းရှင်များကို အပြစ်ပုံချ၍ ဖမ်းဆီးထောင်ချသောနည်းများဖြင့် မိမိအပြစ်ကို သူများအပြစ်အဖြစ် ပုံဖော် ခေါင်းရှောင်သည်။
ထိုကြောင့် စင်ကာပူနိုင်ငံတည်ထောင်ခဲ့သောခေါင်းဆောင်လီကွမ်ယုက မြန်မာစစ်ဗိုလ်ချုပ်များကို ညံဖျင်းသူများဟုခေါ် ခဲ့သလို ၊ စီးပွားရေးနှင့်ပက်သက်လျင် စတိုးဆိုင်ကိုယ်ပင် အောင်မြင်အောင်စီမံခန့်ခွဲနိုင်သူများ မဟုတ်ဟု မှတ်ချက်ပေးခဲ့ခြင်းလည်းဖြစ်သည်။ ပြင်ဦးလွင် စစ်တက္ကသိုလ်များမှဆင်းသည်နှင့် အဋ္ဌာရသ ၁၈ ရပ်လုံး အကုန်တက်ပြီ ဘဝင်နှင့် ထင်တိုင်းကြဲခဲ့မှုမှာ အာရှတွင် အလားအလာအကောင်းဆုံးနိုင်ငံမှာ ယခုတော့ ကမ္ဘာ့ အမွဲဆုံးနိုင်ငံ စာရင်းဝင်ခဲ့လေပြီ ။
တတိုင်းပြည်လုံးဆင်းရဲတွင်းနက်စေသော်လည်း စစ်အာဏာရှင်များဖြစ်သော ဗိုလ်ချုပ်နေဝင်း ၊ဗိုလ်ချုပ်မှူးကြီးသန်းရွှေ ၊ဗိုလ်ချုပ်မှူးကြီးမင်းအောင်လှိုင်တွင်တူညီသောအချက်မှာ ၎င်းတို့၏ သား၊သမီး ၊မြေး နှင့် မိသားစုဝင်များ ဆယ်သက်စားမကုန်အောင် အဂတိလိုက်စားပြီးချမ်းသာနေကြခြင်းဖြစ်သည်။ အာဏာအစောဆုံးသိမ်းခဲ့သော ဗိုလ်ချုပ်နေဝင်း၏မြေးများသည်ပင် စိတ်တိုင်းကြသုံးဖြုန်း နေသော်လည်း ယနေ့အထိ ချမ်းသာကြွယ်ဝ နေသည်ကိုကြည့်၍ ၎င်းတို့ အဖိုးမည်မျှ ခိုးခဲ့သည်ကိုမှန်းဆကြည့်နိုင်သည်။
အာဏာသိမ်းခေါင်းဆောင်မင်းအောင်လှိုင်၏ သား အောင်ပြည့်စုံ နှင့် ခင်သီရိသက်မွန်တို့မှာ လည်း ထိုနည်းဖြင့်ကာလတိုအတွင်းလုပ်ငန်းပေါင်းများစွာဖြင့် ခရိုနီလက်သစ်သူဌေးကြီးများဖြစ်ကုန်သည်။
စစ်အာဏာရှင်များက အောက်က ဗိုလ်ချုပ်များ၊ဝန်ကြီးများကိုမူတခါတရံ လာဘ်စားသည်ဆိုကာ အရေးယူတက်သည်။သို့သော်၎င်းတို့ကိုယ်တိုင်မှာ တနိုင်ငံလုံးမှ အကောင်းဆုံးအရင်းအမြစ်များ ၊အခွင့်အရေးများကို မတရားရယူ၍ မိသားစုဝင်များကို အလွန်အမင်းချမ်းသာအောင်အဂတိကျူးလွန်ခဲ့ကြသော်လည်း ယနေ့အထိ အရေးယူမခံရသေးပါ။
၎င်းတို့ကဲသို့ပင်စစ်အုပ်ချုပ်ရေး ယန္တရားတစ်ခုလုံးမှာလည်း အဂတိထူပြောလှပြီး ခေတ်အဆက်ဆက် တစ်တိုင်ပြည်လုံး၏ အရင်းအမြစ်များကိုမတရားရယူ သုံးစွဲပစ်ကြသလို ၊ပြည်သူများကိုလည်းဖိနှိပ်၍ ဂုတ်သွေးစုပ်ခဲ့ကြသည်။
ပြည်သူများ၏ ဆင်းရဲမွဲတေကြပ်တည်းမှုကိုပင် နိုင်ငံရေးလက်နက်အဖြစ် အသုံးပြုသော စစ်အာဏာရှင်များမှာ နွေဦးတော်လှန်ရေးတွင်မူတကယ့်စိန်ခေါ်မှုစစ်ကို ရင်ဆိုင်နေကြရပြီဖြစ်ပါသည်။စစ်တပ်သမိုင်းတွင် ဘယ်တုံးကမျှမကြုံဖူးသောရှုံးပွဲကြီးများ ဆက်တိုက်ကြုံ၍ နေပြည်တော်မှ အာဏာလုအုပ်စု ထိတ်လန့်တုန့်လှုပ်ရသောနေ့ရက်များကိုဖြတ်သန်းနေရပြီဖြစ်သည်။
အာဏာလုစစ်အုပ်စုမှာ စစ်ရေးမျက်နှာစာအပါအဝင် ဘဏ္ဍာရေး ၊သံတမန်ရေး စသည့်မျက်နှာစာအသီးသီးတွင် ကျရှုံးမှုများကြောင့် နောက်ဆုံးအချိန်နီးကပ်လာပြီဖြစ်သည်။သို့သော် လည်း ပြုတ်ကျသည့်အဆင့်မရောက်သေးပါ ။အာဏာလုစစ်အုပ်စုရှိနေသ၍ တိုင်းပြည် စီးပွားပျက်ကပ်မှာ ဒွန်တွဲနေမည်ဖြစ်၍ ပြည်သူများခံနိုင်ရည် ကောင်းကောင်းဖြင့်ကျော်ဖြတ်ကြရဦးမည်ဖြစ်သည်။
တိုးတက်လိုသောနိုင်ငံသားတိုင်းကိုယ့်ကိုယ်ကိုပြန်မေး ဆန်းစစ်ကြည့်စေလိုသော မေးခွန်းအချို့အောက်တွင်ရှိပါသည်။
“ငါတို့ဟာ ဓါတ်ဆီနည်းနည်းရဖို့ နာရီအကြာကြီးတန်းစီစောင့်ဝယ်ဖို့ မွေးလာတာလား”
“ငါတို့ရဲ့အချိန်တွေကို စားအုန်းဆီ ရဖို့ လူအုပ်ထဲတိုးဝှေ့နေရတဲ့ အခြေအနေနဲ့အကုန်ခံမလား”
“အင်တာသုံးတိုင်း VPN ခံဖို့ ၊ VPNသုံးတာကိုတောင် ထောင်ချမယ်ဆိုပြီး ငွေညှစ်နေရတဲ့အဖိနှိပ်ခံဘဝမှာပဲ နေကြမလား”
“စစ်ရာဇဝတ်မှုတွေကျူးလွန်နေတဲ့ မင်းအောင်လှိုင်စစ်တပ်အတွက် စစ်မှုမထမ်းတာ၊ အသေမခံတာဟာ ရာဇဝတ်မှုဆိုပြီး အနိုင်ကျင့်ခံနေရတာကိုခေါင်းငုံခံနေမလား”
ထိုအခြေအနေလက်ခံသည်သည်ဆိုပါကထွေထူးလုပ်စရာမလို စစ်ကျွန်ဘဝတွင် ဒီအတိုင်း နေလိုက်ယုံပင်။ထိုအခြေအနေများကိုလက်မခံနိုင် ဆိုလျင် စစ်အာဏာရှင်ပြုတ်ကျရေးတွင် သင်ပါဝင်မှရပေမည်။ ယိုင်နဲ့နဲ့ဖြစ်နေသော စစ်အာဏာရှင်စနစ်ကိုပြုတ်ကျအောင် ဖီဆန်တော်လှန်ရေးမှာ စစ်ကျွန်မခံလိုသူတိုင်းအတွက်တာဝန်ပင် ။တော်လှန်ရေးကို သင့် အိမ်ထဲကပင် ပါဝင်နိုင်သည်။
တော်လှန်ရေးအင်အားစုများတိုက်တွန်းသကဲ့သို့ စစ်တပ်ထုတ်ကုန်များ၊စစ်တပ် နှင့်ဆက်နွှယ်သမျှ ထုတ်ကုန် ၊ဝန်ဆောင်မှု ၊လူပုဂ္ဂိုလ်များကို သပိတ်မှောက်ကြရမည်ဖြစ်သည်။ တိုင်းပြည်အနာဂါတ်ဖြစ်သော လူငယ်များပင် ရှေ့တန်းတွင်အသက်စွန့် တိုက်ပွဲဝင်နေချိန်စစ်တပ်နှင့်ဆက်နွှယ်သမျှထုတ်ကုန် နှင့် ဝန်ဆောင်မှုများကို သပိတ်မှောက်ရန်မှာ ပြည်သူတိုင်းအတွက်ခက်ခဲသော တာဝန်မဟုတ်ပေ။ ထိုထက်ပိုလုပ်နိုင်လျင်တော့ တော်လှန်ရေးအင်အားစုများကို ကူညီထောက်ပံ့နိုင်ပြီး ဘေးကင်းစွာကူညီသောနည်းလမ်းများစွာလည်းရှိနေသည်။
ငွေဖောင်းပွမှုကြောင့် မီးဖိုးချောင်း ကပ်ဆိုက်မှုမှစ၍ စစ်မြေပြင်တိုက်ပွဲထိတိုင် အရေးကိစ္စအားလုံးသည်နိုင်ငံရေးဖြစ်ပါသည်။ ယခုကြုံနေသောပြသာနာအားလုံး၏ ရင်းမြစ်ပြသာနာမှာ မင်းအောင်လှိုင် နှင့် စစ်ခေါင်းဆောင်အချို့၏ အာဏာလုယူမှုမှစခဲ့သည်။ ထိုကြောင့်စီးပွားပျက်ကပ်ကိုဖြေရှင်းလိုလျင် ပြသာနာ၏ရင်းမြစ်ကို သာရှင်းရမည်ဖြစ်၏။
ငွေဖောင်းပွမှုနှင့်စီးပွားရေးပြသာနာအပေါ် နိုင်ငံရေးဘောဂလေ့လာသူတဦးက အောက်ပါအတိုင်းသုံးသပ်လေသည်။
”ငွေတွေက လက်လွတ်စပယ် လှိမ့်ရိုက်နေတယ်။ စီးပွါးရေးကတော့ စကစပြုတ်ပြီးမှ ပြန်လုပ်လို့ရမှာပဲ ။ ဒီတိုင်းကတော့ ကုစားဖို့ ဆေးမရှိဘူး”။ ။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)