စက်တင်ဘာ-၁၊ ၂၀၂၅။ ရဲခေါင်/People’s Spring
ကရင်နီပြည်နယ်၊ ဒီးမော့ဆိုမြို့နယ်တိုက်ပွဲအတွင်း စစ်ဦးချိုးခံခဲ့ရသည့် စစ်ကောင်စီတပ်က အင်အားထပ်ဖြည့်ပြီးနောက် ငွေတောင်ရွာသစ်တွင် တိုက်ပွဲများဆက်ပြင်းထန်နေကြောင်း မြေပြင်ရှိ ရဲဘော်များက ပြောသည်။
ဒီးမော့ဆိုမြို့နယ်ဘက်မှ ဖရူဆိုမြို့နယ်သို့ ပြည်ထောင်စုလမ်းမကြီးအတိုင်း ဦးတည်စစ်ကြောင်းထိုးနေသည့် စစ်ကောင်စီတပ်နှင့် တော်လှန်ရေးပူးပေါင်းတပ်များအကြား သုံးရက်ဆက်တိုက်ပွဲ ဖြစ်နေသည်ဟု ဆိုသည်။
“ငွေတောင်ရွာသစ်ဘက်မှာပဲ။ မနေ့က(သြဂုတ် ၃၁ ရက်)မှာ နှစ်ဖက်တိုက်ပွဲ တော်တော်ပြင်းတယ်။ ကိုယ့်ဘက်က နှစ်ယောက်ထိခိုက်ကျဆုံးတယ်။ သူတို့ဘက်ကလည်း သေဆုံးတာတွေများတယ်”ဟု ဒီးမော့ဆိုမြို့အခြေစိုက်ကာကွယ်ရေးရဲဘော်တစ်ဦးက ပြောသည်။
Public Service Announcement
စစ်ကောင်စီတပ်သည် လေကြောင်းတိုက်ခိုက်မှုများစွာ ပစ်ကူပေးနေသည့်အပြင် ယနေ့တွင်လည်း လေကြောင်းတိုက်ခိုက်မှုများ လုပ်နေကြောင်း စစ်ရေးသတင်းရင်းမြစ်က အသိပေးသည်။
“ရန်သူက ဆက်တိုးနေတယ်ပေါ့။ အင်အားဆက်ဖြည့်နေတယ် မြေပြင်အနေအထားအရ။ ဘုံရန်သူတစ်ခုတည်းဆိုတဲ့ရည်ရွယ်ချက်နဲ့ ဆက်ချီတက်နေတယ်။ စစ်ရေးနောက်ဆက်တွဲကတော့ တင်းမာနေတယ်။ကျွန်တော်တို့လည်း လုပ်လို့ရတဲ့အပိုင်းဆက်လက် လုပ်နေတယ်”ဟု ဒီးမော့ဆို-ဖရူဆိုလမ်းပိုင်းတွင် စစ်ကောင်စီတပ်အား တိုက်ခိုက်ရာတွင်ပါဝင်နေသည့် ကယန်းအမျိုးသားတပ်မတော်(KNA)တာဝန်ရှိသူ ခွန်းရဲခေါင်က ပြောသည်။
ပြီးခဲ့သည့်ရက်ပိုင်းက ငွေတောင်ရွာသစ်တွင် အင်အား ၁၀၀ကျော်ဖြင့်တပ်စွဲထားသော စစ်ကောင်စီတပ်ကို တော်လှန်ရေးတပ်ပေါင်းစုမှ ဝင်ရောက်တိုက်ခိုက်ခဲ့ရာ စစ်ကောင်စီတပ်သား ၁၅ထက်မနည်း သေဆုံးပြီး လက်နက်ခြောက်လက် ရရှိခဲ့သည်။
“စကစဘက်က အထိနာသွားလို့ မနေ့ကစပြီး လေယာဥ်၊ ဒရုန်း၊ လက်နက်ကြီးနဲ့ တောက်လျှောက်ထုနေတယ်”ဟု မြေပြင် ရဲဘော်တစ်ဦးက ပြောသည်။
၂၀၂၃ နိုဝင်ဘာကစ၍ တော်လှန်ရေးအင်အားစုက ဖြတ်တောက်ထားသည့် လွိုင်ကော်-ဒီးမော့ဆို-ဖရူဆို လမ်းပိုင်းကို ပြန်ထိန်းချုပ်ရန် စစ်ကောင်စီက ကြိုးစားနေခြင်းဖြစ်သည်။
