စက်တင်ဘာ−၁ ၊ ၂၀၂၅။ရဲခေါင် /People’s Spring
ကရင်နီပြည်နယ်၊ ဒီးမော့ဆိုမြို့နယ်ရှိ စစ်ရှောင်စခန်းကို စစ်ကောင်စီက လေကြောင်းမှ ဗုံးကြဲတိုက်ခိုက်ရာ ကလေးငယ်နှစ်ဦးအပါအဝင် အရပ် သားသုံးဦး ဒဏ်ရာရရှိခဲ့သည်။
ယနေ့(စက်တင်ဘာ ၁ရက်)နံနက် ၈ နာရီ ၄၀မိနစ်က Y12 လေယာဥ်ဖြင့် ဗုံးကြဲတိုက်ခိုက်မှုတွင် စစ်ရှောင်စခန်းကို ပစ်မှတ်ထား၍ ဗုံးနှစ်လုံးကြဲချခဲ့ခြင်းဟု ဆိုသည်။
ပေါက်ကွဲမှုဗုံးစများက (၁၀)နှစ်အရွယ်ကလေးနှစ်ဦး၏ လက်နှင့်ပေါင်တို့ကို ထိခိုက်မှန်ခဲ့ပြီး အသက် (၅၀)ဝန်းကျင် အမျိုးသမီးတစ်ဦးလည်း ဒဏ်ရာရရှိခဲ့သည်။
Public Service Announcement
“တိုက်ပွဲလည်း မရှိတဲ့နေရာ ၊ တလရ (တော်လှန်ရေး) တပ်စခန်းတွေလည်း မရှိတဲ့နေရာဖြစ်ပေမဲ့ စကစ ဘက်ကတော့ ရည်ရွယ်ချက်ရှိရှိနဲ့ စစ်ရှောင်ပြည်သူတွေကို ဗုံးကြဲတိုက်ခိုက်နေတာပါ”ဟု ကရင် နီစစ်ရှောင်အရေးကူညီနေသူက ပြောသည်။
ထို့အပြင် ဒီးမော့ဆိုမြို့နယ်၌ စစ်ကြောင်းထိုးနေသည့် စစ်ကောင်စီတပ်သည် အရပ်သားပြည်သူများကို ဖမ်းဆီးသတ်ဖြတ်နေကြောင်း ကယန်းအမျိုးသားတပ်မတော်(KNA)က ယနေ့(စက်တင်ဘာ ၁ ရက်)က အသိပေးသည်။
“စကစက သူရဲ့စစ်ရေး၊နိုင်ငံရေး လိုအင်ဆန္ဒနဲ့ပတ်သက်ပြီး ဘာကိုမှ ငဲ့နေမှာမဟုတ်တော့ဘူးဆိုတာ ပြောရမယ်။ကရင်နီမှမဟုတ်ဘူး နေ့စဥ်လိုလို တစ်နိုင်ငံလုံးမှာ အရပ်သားတွေ သတ်ဖြတ်ခံနေရတယ်။ရှေ့လျှောက်လည်း သတ်ဖြတ်နေဦးမှာပဲ။ပိုဆိုးဖို့ပဲ ရှိမယ်။အားလုံးသတိ ရှိရှိ နဲ့ ညီညီညွတ်ညွတ်ရင်ဆိုင်ကြရမယ်”ဟု ကရင်နီစစ်ဘက်သတင်းရင်းမြစ်က ပြောသည်။
သြဂုတ်လအတွင်း ကရင်နီပြည်နယ်နှင့် ကယန်းဒေသတွင် စစ်ကောင်စီက လေကြောင်းတိုက်ခိုက်မှု ၇၅ ကြိမ်ပြုလုပ်ခဲ့ပြီး အရပ်သားနှင့် စစ်ရှောင် ၄၄ ဦးသေဆုံးခဲ့ရကြောင်း တိုးတက်သောကရင်နီပြည်သူ့အင်အားစု (PKPF) က ထုတ်ပြန်ထားသည်။
ထို့အပြင် စစ်ကောင်စီစစ်ကြောင်းက ပြည်သူ့များ၏ နေအိမ်၊စာသင်ကျောင်းနှင့် ဆေးရုံဆေးခန်းအဆောက်အဦး ၁၀လုံးကျော် ဖျက်ဆီးခဲ့ကြောင်း PKPF က ဖော်ပြသည်။
