စက်တင်ဘာ-၁၊၂၀၂၅။ရောင်နီ/People’s Spring
ရန်ကုန်မြို့ရှိ မြို့နယ် ၇ ခုတွင် တစ်ပတ်အတွင်းစစ် ကောင်စီ၏ ဖမ်းဆီးခံရသူ ၂၇ ဦးရှိကြောင်းရန်ကုန်မြို့တွင်စစ်ကောင်စီကဖမ်းဆီးနေသောမြေပြင်သတင်းများကိုစုစည်းဖော်ပြနေသည့် Rangoon Scout Networkကထုတ်ပြန်သည်။
ဩဂုတ် ၂၅ မှ ၃၁ ရက်အတွင်း ကြည့်မြင်တိုင်၊ မင်္ဂလာဒုံ၊ လှိုင်၊ ရန်ကင်း၊ တောင်ဥက္ကလာပ၊ မင်္ဂလာတောင်ညွှန့် နှင့် မရမ်းကုန်းမြို့နယ်များ၌ ဖမ်းဆီးခံရခြင်းဖြစ်ကြောင်း RSN က ထုတ်ပြန်ထားသည်။
“သတင်းအတိအကျဖြင့် ရှာဖွေဖမ်းဆီးခံရသူ ၉ ဦး၊ ဧည့်စစ်ပြီးနောက် ဖမ်းခံရသူ ၆ ဦး၊ လမ်းမပေါ် ရှောင်တခင်စစ်ခံရပြီး ဖမ်းခံရသူ ၄ ဦး နှင့် ဖမ်းဆီးခံရသည့်ပုံစံ စုံစမ်းနေဆဲဖြစ်သူ ၈ ဦး တို့ ဖြစ်သည်”ဟု RSN ကဖော်ပြသည်။
Public Service Announcement
အဆိုပါမြို့နယ်များအပြင် စမ်းချောင်းနှင့် သင်္ဃန်းကျွန်းမြို့နယ်များတွင်လည်း ဖမ်းဆီးမှုများရှိသည်ဟု ဆိုသော်လည်း စုံစမ်းဆဲဖြစ်သည်ဟု RSN က အသိပေးထားသည်။
လှိုင်မြို့နယ် ၂ ရပ်ကွက် နှင့် ၅ ရပ်ကွက်တို့တွင် ရပ်ကွက်အုပ်ချုပ်ရေးမှုးများသည် စစ်တပ်လက်အောက်ခံပျူစောထီးများနှင့်ပေါင်း၍စစ်မှူထမ်း ကိစ္စနှင့် ပြည်သူများကို ခြိမ်းခြောက်မှုများပြုလုပ်နေကြောင်း ဒေသခံတစ်ဦးကပြောသည်။
“ငွေရှိသူတွေကတော့ သားသမီးတွေကို ငွေပေးပြီး လိုက်ထုတ်နိုင်ပေမယ့် ဆင်းရဲသားနင်းပြားမိသားစုတွေကတော့ စစ်မှူထမ်းတွေပါသွားပြီ” ဟု ၎င်းက လက်ရှိကြုံနေရသည့် အခြေအနေကိုပြောသည်။
ဩဂုတ်လအတွင်း၌ ရန်ကုန်တိုင်းရှိ မြို့နယ်အချို့တွင် ဆိုက္ကားနင်းသူများကို လူတစ်စုက လိုက်လံငှားရမ်း၍ ခေါ်ဆောင်သွားကာ အဆက်အသွယ်မရတော့သည့် ဖြစ်စဉ်များလည်းရှိသည်ဟု RSN ကဆိုသည်။
လှိုင် ၊ ကြည့်မြင်တိုင် ၊ တာမွေ စသည့် မြို့နယ်များ၌ အထက်ပါဖြစ်စဉ်ဖြစ်ခဲ့ခြင်းဖြစ်ပြီး စစ်မှူထမ်းအတွက် လိမ်လည်ဖမ်းဆီးခြင်းဖြစ်နိုင်ကြောင်း ဒေသခံများကသုံးသပ်ထားသည်။
ထို့အပြင် ယခုတစ်ပတ်အတွင်း ရန်ကုန်မြို့ရှိ မြို့နယ် ၁၃ ခု၌ ဧည့်စာရင်းစစ်သည့် ဖြစ်စဉ် ၂၂ ခုရှိခဲ့ကြောင်း RSN က ဖော်ပြထားသည်။
