စက်တင်ဘာ-၁၂၊ ၂၀၂၅။ထားမြတ်/People’s Spring
စစ်အုပ်စု၏ နိုင်ငံရေးလှည့်ကွက်များကို အထိရောက်ဆုံးတန်ပြန်ရန် ရွေးကောက်ပွဲအတွက် ပြင်ဆင်မှုများ၊လူထုစည်းရုံးမှုများနှင့် သတင်းဖြန့်ချိမှုများတားဆီးရန် အဆိုပါလုပ်ငန်းများ၌ ရည်ရွယ်ချက်ရှိရှိ ပါဝင်ပတ်သက်သူများကိုလည်း တည်ဆဲဥပဒေလုပ်ထုံးလုပ်နည်းအတိုင်း အရေးယူရန် အမျိုးသားညီညွတ်ရေးအစိုးရ (NUG)၊ ပြည်ထောင်စုဝန်ကြီးချုပ် မန်းဝင်းခိုင်သန်းက တိုက်တွန်းပြောကြားခဲ့သည်။
စက်တင်ဘာ ၁၁ရက်က ကျင်းပသည့် ကြားကာလဒေသန္တရ ပြည်သူ့အုပ်ချုပ်ရေးဖော်ဆောင်မှုဗဟိုကော်မတီအစည်းအဝေးတွင် ပြည်ထောင်စုဝန်ကြီးချူပ်က အုပ်ချုပ်ရေးနှင့်ပတ်သက်သည့် အဓိက စိန်ခေါ်မှုများ ပြောကြားရာတွင် စစ်အုပ်စုကြိုးပမ်းနေသည့်ရွေးကောက်ပွဲအပေါ်တန်ပြန်ရန်အချက်ကို ထည့်သွင်းပြောကြားခဲ့ခြင်းဖြစ်သည်။
အမျိုးသားညီညွတ်ရေးအစိုးရသည် အနာဂတ်၏ ဖက်ဒရယ်ဒီမိုကရေစီနိုင်ငံသစ်ကို အုတ်မြစ်ချနေခြင်းဖြစ်၍ အကြမ်းဖက်စစ်အုပ်စု၏ နိုင်ငံရေးလှည့်ကွက်များကို ပြည်သူများနှင့်အတူတစုတစည်းတည်း ရင်ဆိုင်ကျော်လွှားပြီး တော်လှန်ရေးအောင်ပွဲကိုလက်တွေ့အကောင် အထည်ဖော်ရန် အားလုံးစည်းလုံးညီညွတ်စွာ ဆက်လက်ချီတက် ကြရန်လိုအပ်သည်ဟုလည်း ဝန်ကြီးချုပ်က ပြောကြားသည်။
Public Service Announcement
အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာန ပြည်ထောင်စုဝန်ကြီး ဦးရည်မွန်ကလည်း အာဏာသိမ်းစစ်အုပ်စု ကြိုးပမ်းနေသည့် တရားမဝင်အတုအယောင် ရွေးကောက်ပွဲကို လက်မခံကြောင်း အမျိုးသားညီညွတ်ရေးအစိုးရ (NUG)နှင့် တော်လှန်ရေးအင်အားစုအားလုံးကအတိအလင်းထုတ်ဖော်ထားပြီးဖြစ်၍ နည်းမျိုးစုံသုံး ဆန့်ကျင်တိုက်ဖျက်မည်ဖြစ်ကြောင်း အသိပေးထားသည်။
ပြည်သူအများစုက အကြမ်းဖက်စစ်အုပ်စု၏ တရားမဝင် ရွေးကောက်ပွဲကို ပြတ်သားစွာ ဆန့်ကျင်ကြလိမ့်မည်ဟုလည်း ဝန်ကြီးက ပြောသည်။
“စစ်အုပ်စုလို ပြောမယ်ဆိုရင် ပြည်ထောင်စုကြံ့ခိုင်ဖွံဖြိုးရေးပါတီဆိုတာက သူ့ရဲ့ကိုယ်ပွား အမာခံ နိုင်ငံရေးပါတီ ပေါ့ဗျာ။ ဒီရွေးကောက်ပွဲမှာ စစ်အုပ်စုရဲ့အမာခံနိုင်ငံရေးပါတီနဲ့ သူ့ရဲ့နောက်မီးဆွဲတွေ လက်ဝေခံတွေတော့ ဝင်ပြိုင်ကြပါလိမ့်မယ်။အာဏာသိမ်းပြီးတော့ တရားမဝင်ယူထားတဲ့ နိုင်ငံတော်အာဏာကို ရွေးကောက်ပွဲတခုနဲ့ သူ့ရဲ့ အမာခံနိုင်ငံရေးပါတီကို အမည်ခံလွှပြောင်းပေးပြီး တရားဝင်မှုရှာချင်တဲ့ အဓိပ္ပါယ်လို ဒီလိုပြောရပါလိမ့်မယ်။ NUGနဲ့ တော်လှန်ရေးအဖွဲအစည်းအားလုံးကတော့ ဒီရွေးကောက်ပွဲ လုံး၀လက်ခံမှာ မဟုတ်ဘူးဆိုတာ အတိအလင်းထုတ်ဖော်ထားကြပြီးဖြစ်ပါတယ်။ အဲဒီအတွက် နိုင်ငံရေးနည်း၊ စစ်ရေးနည်း၊ လူထုနည်းပေါ့ နည်းစုံသုံးပြီး ဒီရွေးကောက်ပွဲ ဆန့်ကျင်တိုက်ဖျက်ဖို ကြိုးစားသွားကြမှာလည်းဖြစ်ပါတယ်”ဟု ဝန်ကြီး ဦးရည်မွန်က ပြောကြားသည်။
ထို့ပြင် နိုင်ငံတကာအသိုင်းအဝိုင်း၏ တရားဝင် အသိအမှတ်ပြုမှု ကိုရယူရန်အတွက်ကြားကာလ ဒေသန္တရအုပ်ချုပ်ရေး သည် ပွင့်လင်းမြင်သာမှုရှိရန်၊တာဝန်ယူမှု၊တာဝန်ခံမှုရှိရန်နှင့် လူ့အခွင့်အရေးစံနှုန်းများကို လိုက်နာရေး ကြိုးစားရန်လိုအပ်ကြောင်းလည်း ပြည်ထောင်စုဝန်ကြီးချုပ်က ကြားကာလဒေသန္တရ ပြည်သူ့အုပ်ချုပ်ရေးဖော်ဆောင်မှုဗဟိုကော်မတီအစည်းအဝေးတွင် ပြောကြားခဲ့သည်။
အကြမ်းဖက်စစ်အုပ်စု၏ မတရားအာဏာလုယူမှု နောက်ဆက်တွဲ ဆိုးကျိုးများ ပြည်သူများ အကြီးအကျယ်ခံစားနေရပြီး အခက်အခဲပေါင်းများစွာ ကြုံတွေ့နေရမှုအပေါ် ပြည်သူလူထုကို တက်စွမ်းသမျှ ဝန်ဆောင်မှု ပေးပြီး စိတ်လုံခြုံမှုပေးနိုင်အောင် မဖြစ်မနေလုပ်ဆောင်ကြရန်လည်း ပြည်ထောင်စုဝန်ကြီးချုပ်က ပြောကြားသည်။
