■ကျောင်းသားများနှင့်ကလေးငယ်တချို့ အပါအဝင်၁၈ဦး သေဆုံးပြီး ၂၀ကျော် ပြင်းထန် ဒဏ်ရာရ
စက်တင်ဘာ-၁၂၊၂၀၂၅။ဇော်ရမ်း/People’s Spring
ကျောက်တော်မြို့ရှိကိုယ်ပိုင်အထက်တန်းကျောင်းရှေ့ကို စစ်ကောင်စီကယနေ့နံနက် အစောပိုင်းတွင်ဗုံးကြဲသဖြင့် ကျောင်းသားများနှင့်အနီးအနားမှ ကလေးငယ်အချို့ အပါအဝင်၁၈ဦး သေဆုံးပြီး ၂၀ကျော် ပြင်းထန် ဒဏ်ရာရထားကြောင်း အာရက္ခတပ်တော်(AA)က သတင်းထုတ်ပြန်သည်။
ကျောက်တော်မြို့နယ်၊ သရက်တပင်ရွာရှိ ပညာပန်းခင်း၊ ကိုယ်ပိုင်အထက်တန်းကျောင်း ရှေ့တည့်တည့်သို့ စက်တင်ဘာလ၁၂ရက်၊နံနက် (၁) နာရီ (၀၅) မိနစ်ခန့်အချိန်တွင် ပေါင်၅၀၀ ဗုံးနှစ်လုံးကြဲခြင်းဟု ထုတ်ပြန်သည်။
Public Service Announcement
ကနဦးသတင်းအရကလေးငယ်အချို့အပါအဝင် စုစုပေါင်း (၁၈) ဦး ရှေ့ဆင့်နောက်ဆင့် သေဆုံးကာ ၂၀ ကျော် ပြင်းထန်ဒဏ်ရာရရှိကြောင်း ထုတ်ပြန်ထားပြီး နောက်ဆက်တွဲ သတင်းများကို ထပ်မံအသိပေးမည်ဟု ဆိုသည်။
ရခိုင်ပြည်နယ်ရှိ လူသားချင်းစာနာထောက်ထားရေးနှင့် ဖွံ့ဖြိုးရေး ဆိုင်ရာ ပူးပေါင်းဆောင်ရွက်ရေးရုံး( HDCO)၏ အချက်အလက်များအရ ၂၀၂၅ ခုနှစ်၊ ဇန်နဝါရီလ ၁ ရက်မှ ၂၀၂၅ ခုနှစ်၊ ဇူလိုင်လ ၃၁ ရက်အထိ ၇ လ တာ ကာလအတွင်း စစ်တပ်၏ လေကြောင်းတိုက်ခိုက်မှုများကြောင့် အသက် ၁၈ နှစ်အောက် ကလေးသူငယ် ၂၆ ဦး အပါအဝင် အရပ်သားပြည်သူ ကျား (၄၂) ဦး၊ မ (၇၃) ဦး စုစုပေါင်း (၁၁၅) ဦး သေဆုံးခဲ့သည်။ ထို့အပြင် ၁၈ နှစ်အောက် ကလေးသူငယ် ၅၁ ဦး အပါအဝင် အရပ်သားပြည်သူ ကျား ၁၀၅ ဦး၊ မ ၉၉ ဦး စုစုပေါင်း (၂၀၄) ဦး ဒါဏ်ရာ ရရှိခဲ့သည်။
သြဂုတ်လနောက်ပိုင်းတွင်စစ်တပ်၏ လေကြောင်းတိုက်ခိုက်မှုပိုမို ဆိုးရွားလာပြီး သြဂုတ်လ၅ရက်နေ့ကလည်း မြောက်ဦးမြို့ရှိအလှူအိမ်ကို စစ်ကောင်စီကဗုံးကြဲ၍ ကလေးငယ်အချို့အပါအဝင်၁၅ဦသေဆုံးပြီး၂၀ ခန့်ဒဏ်ရာရခဲ့သည်။
စစ်ကောင်စီက သြဂုတ်လတွင် နိုင်ငံတစ်ဝန်းလေကြောင်းတိုက်ခိုက်မှု ၂၂၁ ကြိမ် (တစ်ရက် ၇ ကြိမ်နှင့် ၈ကြိမိကြား ) ပြုလုပ်ခဲ့ပြီး ပြည်သူ ၂၈၄ ဦးသေဆုံးခဲ့ကြောင်း အမျိုးသားညီညွတ်ရေးအစိုးရကလည်းထုတ်ပြန်သည်။
