စက်တင်ဘာ−၂၀ ၊၂၀၂၅။ရဲခေါင်/People’s Spring
ကရင်နီပြည်နယ်၊ဖားဆောင်းမြို့နယ်၊မော်ချီးဒေသ၌ ခဲတွင်းပြိုကျရာ သေဆုံးသူနှင့် ပိတ်မိနေသူအချို့ရှိ ကြောင်း ဒေသခံများက ပြောသည်။
စက်တင်ဘာ ၁၉ ရက် ည ၁၁နာရီခန့်က ဖြစ်ပွားခဲ့သည့် ခဲတွင်းပြိုကျမှုအတွင်း ကနဦးသတင်းအရ တစ်ဦးသေဆုံးပြီး ပိတ်မိသူ နှစ်ဦးရှိသည်ဟု ဆိုသည်။
“ အိမ်နားက ကလေးပါသွားတယ်။သေတယ်လို့ ကြားတယ်။ကောင်လေးက အခုမှ အသက် ၂၀ ကျော်ပဲ ရှိသေးတာ” ဟု မော်ချီး ဒေသခံတဦးက ပြောသည်။
Public Service Announcement
ရာသီဥတုအပြင် ယခုနှစ် မတ်လကစ၍ မော်ချီးဒေသကို ဆယ်ကြိမ်ထက်မနည်း စစ်ကောင်စီက လေကြောင်းမှ ဗုံးကြဲတိုက်ခိုက်ခဲ့မှုကြောင့် မြေပြိုမှု ဖြစ်လာသည်ဟု ဒေသခံအချို့က သုံးသပ်သည်။
“ မြေပြိုမှုရှိတယ်။အသေးစိတ်ကိုတော့ မသိရသေးဘူး” ကရင်နီပြည်ကြားကာလအုပ်ချုပ်ရေးကောင်စီအတွင်းရေးမှူး ဦးဗညားက ပြောသည်။
သြဂုတ် ၁၇ရက်က ဖားဆောင်းမြို့ မော်ချီးဒေသ (၁၆)ကုန်းရပ်ကွက်ကို စစ်ကောင်စီ ဗုံးကြဲမှုအတွင်း (၅)နှစ် နှင့် (၁၂)အရွယ် ကလေးငယ် ငါးဦးအပြင် သေဆုံးသူ ၂၅ဦး ရှိခဲ့သည်။
ယခုနှစ် ဇူလိုင် ၂၇ ရက်ကလည်း မော်ချီးဒေသ (၁၆)ရပ်ကွက်နှင့် ကျောက်ကြားရပ်ကွက် မြေပြိုမှုအတွင်း (၅၀)ကျော်အရွယ် အမျိုးသမီးတဦးသေဆုံးခဲ့သည်။
