ရုရှားစစ်တပ်က ယူကရိန်းကို နျူကလီးယားထိပ်ဖူး သယ်ဆောင်နိုင်ပြီး အသံထက် ၁၀ ဆမြန်တဲ့ “အိုရက်ရှ်နစ်” (Oreshnik) ဒုံးကျည်နဲ့ မေလ ၂၄ ရက်ညပိုင်းက တိုက်ခိုက်ခဲ့ရာမှာ မြို့တော် ကိယက်ဗ်နယ်မြေထဲက ဘီလာ ဆာ့ကွာ (Bila Tserkva) မြို့အနီးကို ကျရောက် ထိမှန်ခဲ့ပါတယ်။
ဒီတိုက်ခိုက်မှုဟာ ရုရှားက ယူကရိန်းအပေါ် စတင်ကျူးကျော်ပြီးနောက်ပိုင်း အကြီးမားဆုံး တိုက်ခိုက်မှုတွေထဲက တစ်ခုဖြစ်ခဲ့ပါတယ်။
ဒီဒုံးကျည်ဟာ သမားရိုးကျ ထိပ်ဖူးတွေအပြင် နျူကလီးယားထိပ်ဖူး အများအပြား သယ်ဆောင်နိုင်တဲ့ ဒုံးကျည်လို့ အမေရိကန်က သတ်မှတ်ထားပါတယ်။
အဲဒီဒုံးကျည်ရဲ့ အရှိန်နဲ့ သွားရာလမ်းကြောင်းကြောင့် ယူကရိန်းမှာရှိတဲ့ လေကြောင်းရန်ကာကွယ်ရေး စနစ်တွေနဲ့ တားဆီးဖို့ မဖြစ်နိုင်ခဲ့ဘဲ အခုတိုက်ခိုက်မှုမှာ သေဆုံးသူ လေးဦး ထက်မနည်းရှိခဲ့သလို ၁၀၀ နီးပါး ဒဏ်ရာရခဲ့တယ်လို့ ယူကရိန်းဘက်က ထုတ်ပြန်ထားပါတယ်။
ရုရှားအနေနဲ့ ဒီဒုံးကျည်ကို အသုံးပြုပြီး ယူကရိန်းကို တိုက်ခိုက်တာ ဒါဟာ သုံးကြိမ်မြောက် ရှိသွားပြီ ဖြစ်ပါတယ်။
ရုရှားဟာ ၂၀၂၄ ခုနှစ် နိုဝင်ဘာလတုန်းက ယူကရိန်းနိုင်ငံအရှေ့ပိုင်းက ဒီနီပရို (Dnipro) မြို့ပေါ်ကို အိုရက်ရှ်နစ် ဒုံးကျည်နဲ့ ပထမဆုံးအကြိမ် ပစ်ခတ်ခဲ့သလို ၊ ဒီနှစ် ဇန်နဝါရီလတုန်းကလည်း ယူကရိန်းအနောက်ပိုင်း လဗိဗ် (Lviv) ဒေသမှာ ဒုတိယအကြိမ်မြောက် တိုက်ခိုက်ခဲ့ပါတယ်။
အိုရက်ရှ်နစ်ဒုံးကျည်ဟာ အသံထက် ၁၀ ဆမြန်တဲ့ အရှိန်နဲ့ သွားတာကြောင့် ကြားဖြတ်ပစ်ချဖို့ လုံးဝမဖြစ်နိုင်ဘူးလို့ ပူတင်က အရင်က ကြုံးဝါးထားဖူးပါတယ်။
ပြီးတော့ ဒီဒုံးကျည်မှာ သာမန်ထိပ်ဖူးပဲ တပ်ဆင်ထားရင်တောင်မှ သူ့ရဲ့ ဖျက်ဆီးအားက နျူကလီးယားလက်နက်တစ်ခုနဲ့ တိုက်ခိုက်သလောက် ပြင်းထန်တယ်လို့ သူက ဆိုပါတယ်။
ပူတင်ရဲ့ အခုလို ပြောဆိုမှုတွေအပေါ် အနောက်နိုင်ငံက လေ့လာဆန်းစစ်သူတချို့က သံသယရှိနေကြပေမဲ့ ယူကရိန်းမှာတော့ ဒီဒုံးကျည်ကို ကြားဖြတ်ပစ်ချနိုင်တဲ့ လေကြောင်းရန် ကာကွယ်ရေးစနစ်မျိုး လက်ရှိအချိန်ထိ လုံးဝမရှိသေးပါဘူး။
Myanmar Now ဆက်လက်ရပ်တည်နိုင်ရေးအတွက် လစဥ်ငွေအနည်းငယ်ဖြင့် /qurium/myanmar-now.org/mm-members.html တွင် ကူညီနိုင်ပါသည်။
