၃၅ နှစ်အထက်ကိုပါ ပစ်မှတ်ထားလာသော စစ်သားသစ်စုဆောင်းရေး

စစ်သားသစ် မှောင်ခိုဈေးကွက်တွင်  လူစားထိုးမှုအတွက်  တစ်ဦးလျှင် ကျပ် သိန်း ၇၀ မှ ၁၀၀ ကျော်အထိ ပေါက်ဈေးရှိလာသည်။ ကောက်ခံသည့် လစဉ်ကြေးသည်လည်း တစ်လလျှင် ကျပ်ငါးသောင်းမှ   ရှစ်သောင်းထိ ဖြစ်လာကြောင်း နေပြည်တော်နှင့် ရန်ကုန်ရှိ အုပ်ချုပ်ရေးမှူးများထံက  စုံစမ်းသိရှိရသည်။

နေပြည်တော် ပျဉ်းမနားမြို့နယ်မှ ဒေသခံတစ်ဦးက တက္ကသိုလ်တက်နေသော အသက် ၂၁ နှစ်အရွယ် သားဖြစ်သူအတွက် စစ်မှုထမ်းကြေး တစ်လလျှင် ကျပ်လေးသောင်းမှ ခြောက်သောင်းထိ ပြီးခဲ့သည့် ဇူလိုင်လတွင် တိုးမြှင့်ကောက်ခံခြင်းခံရကြောင်း ပြောသည်။

“စစ်မှုထမ်း တရားဝင်ဆင့်ခေါ်ရင် ကျောင်းသားဆိုပြီး ဖြေရှင်းရသေးတယ်။ လမ်းမှာများ ပေါ်တာ အဆွဲခံရရင် အုပ်ကြီး လိုက်ဖြေရှင်းပေးအောင်ဆိုပြီး လစဉ်ကြေး ထည့်ဝင်ထားရတာ”ဟု ၎င်းက ဆိုသည်။
  
ဩဂုတ်လ ၂၆ ရက် ညပိုင်းက မန္တလေး  ပြည်ကြီးတံခွန်မြို့နယ်တွင်  သံပန်းလုပ်ငန်းလုပ်ကိုင်သော၊ ကလေးနှစ်ဦး၏ ဖခင်ဖြစ်သော အမျိုးသားတစ်ဦးကို ရပ်ကွက် အုပ်ချုပ်ရေးမှူးက  ဖမ်းဆီးသွားခဲ့ကြောင်း၊ ယခုအခါ စစ်တပ်စခန်းများရှိရာ မန္တလေးနန်းတွင်းသို့ ရောက်နေကြောင်း သိရသည်။

“သိန်း ၅၀၀နဲ့ ညှိနှိုင်းနေတယ် ကြားတယ်။ ရပ်ကွက်အုပ်ကြီး မော်ကြီးဆိုတဲ့လူက ဖမ်းပေးပြီး အခု နန်းတွင်းအထိ မိသားစုက လိုက်ညှိနေရတယ်။ တကယ်တမ်း အသက်က ၃၆ ပြည့်လို့ ၃၇ ထဲတောင် ရောက်နေပြီ”ဟု လမ်း ၆၀၊ Aလမ်း၊ (၁၁၆ လမ်းနှင့် ၁၁၇ လမ်းကြား) တွင် ဖမ်းဆီးခံရသည့် ထိုဖြစ်စဉ်အကြောင်း သိသူ ဒေသခံအမျိုးသား တစ်ဦးက ပြောသည်။
 
ဇူလိုင်လအတွင်းကလည်း မဟာအောင်မြေမြို့နယ် မင်းသားစုရပ်တွင် နေထိုင်သူ အသက် ၄၂ နှစ်အရွယ် ကိုရဲလင်းသည် မန္တလေးနှင့် စစ်ကိုင်းမြို့အကြား ခရီးသွားစဉ် ယာဉ်ပေါ်မှ ဆွဲချဖမ်းဆီးခံလိုက်ရသည်။ 

ကလေးတစ်ဦး၏ဖခင်ဖြစ်သော ထိုအမျိုးသားသည်  စစ်ကိုင်းမြို့အခြေစိုက် တပ်မ(၃၃)တွင် ရှိနေသည်ဟု မိသားစုနှင့် နီးစပ်သူ အမျိုးသမီးတစ်ဦးက ပြောပြသည်။ 

“သူက မိသားစုကို သိန်း ၅၀ ယူပြီး လာရွေးလှည့်ပါ၊ ရွေးလို့ရပါတယ်လို့ အကြောင်းကြားတယ်။ မိသားစုက သိန်း ၅၀ ကို မတတ်နိုင်တော့ မရွေးနိုင်ရှာဘူး။ အခု သူ့မိန်းမက စစ်ကိုင်းတပ်ထဲအထိ အမြဲ သွားသွားတွေ့တယ်။ အဲဒီလိုတော့ တွေ့လို့ရတယ် ”ဟု ယင်းအမျိုးသမီးက ပြောသည်။

စစ်တပ်တွင် ရာထူးတက်လိုသူ၊ တပ်မှ ထွက်ခွင့်ရလိုသူ အရာရှိများ စစ်သားသစ် မဖြစ်မနေ စုဆောင်းပေးရတတ်သောကြောင့်  စစ်မှုထမ်းဥပဒေကို အသက်မသွင်းမီကပင် စစ်သားသစ်အရောင်းအဝယ် ရှိနှင့်နေပြီး ဖြစ်သည်။

၂၀၂၁ တွင် စစ်တပ်က အာဏာသိမ်းပြီး  ဆန့်ကျင်ကန့်ကွက်သူများကို လမ်းပေါ်တွင် ပစ်ခတ် သတ်ဖြတ်ရာ နိုင်ငံအနှံ့အပြားတွင် လက်နက်ကိုင်ခုခံသူ အများအပြား ပေါ်ပေါက်လာသည်။ ထိုအခြေအနေတွင် တိုင်းရင်းသားလက်နက်ကိုင်အဖွဲ့များကလည်း စစ်တပ်ကို ထိုးစစ်ဆင်ကြရာ စစ်တပ်သည် လက်နက်ကိုင်အင်အား အကြီးအကျယ် လိုအပ်လာသည်။ 

ကာလတိုသင်တန်းတက်ပြီးလျှင်  သေဆုံးဒဏ်ရာရမှု များပြားသော တိုက်ပွဲဒေသအသီးသီးသို့ ပို့ဆောင်ခံရမည့် အခြေအနေတွင် လူငယ်အများအပြားက စစ်တပ်ထဲ ရောက်မည်ကို စိုးရိမ်ကြသည်။

ယခုအခါ  စစ်တပ်မိသားစုဝင်များပါ စစ်သားသစ်အဖြစ် စုဆောင်းခံနေရသည်။ ထိုအထဲတွင် နေပြည်တော် လယ်ဝေးမြို့နယ်မှ ဒေါ်ခင်ဌေးမြင့်တို့ မိသားစုလည်း ပါဝင်သည်။  အသက် ၆၀ ဝန်းကျင်အရွယ် ဒေါ်ခင်ဌေးမြင့်တွင်ရှိသော သားသုံးဦးလုံးမှာ စစ်ထဲသို့ ရှေ့ဆင့်နောက်ဆင့် ရောက်သွားကြသည်။

ဒေါ်ခင်ဌေးမြင့်တို့ သားအမိသည် အညာဒေသမှ  စစ်ဘေးတိမ်းရှောင်သည့်အနေဖြင့် အာဏာသိမ်းစစ်ဗိုလ်ချုပ်ကြီးများရုံးစိုက်ရာ နေပြည်တော်၌ နေထိုင်ပြီး  ဈေးရောင်းနေခဲ့ခြင်းဖြစ်သည်ဟု ဒေသခံတို့က Myanmar Now ကို ပြောသည်။

ဒေါ်ခင်ဌေးမြင့်ကို ကျွေးမွေးစောင့်ရှောက်ပေးနေသည့် သားဖြစ်သူသည်လည်း တပ်သားသစ်အဖြစ် အတင်းအကျပ် စုဆောင်းခံရသည်။  

“သားသုံးယောက် မွေးထားတာလေ။ သားနှစ်ယောက်က စစ်သား၊ သားတစ်ယောက်က လက်ရှိ ကျွန်မကို လုပ်ကျွေးနေတာပါ” ဟု ဒေါ်ခင်ဌေးမြင့်က ၅၉ စက္ကန့်ကြာ Tik Tok ရုပ်သံတွင် ပြောဆိုထားသည်။

“အဲဒီကလေးကို ၂၀၃၀ တပ်က ဗိုလ်မှူးအောင်မင်းကိုယ်တိုင် ခေါ်ပြီးတော့ ပြည်သူ့စစ်ထဲ ထည့်လိုက်ပါတယ်။ ပေါ်တာလည်း လာဆွဲသွားပါတယ်ရှင်။ ကျွန်မ ဘယ်လိုလုပ်ရမလဲ မသိလို့ပါရှင်။ ကျွန်မကို ကူညီကြပါဦးရှင်” ဟု ဒေါ်ခင်ဌေးမြင့်က ပြောလိုက်သည်။ 

(Myanmar Now သတင်းထောက်များ ဖြစ်သော ကိုလှိုင်း၊ အောင်ဇေ နှင့် တိမ်ဝါတို့ ပူးပေါင်း ရေးသားသည်။)