Xarici siyasəti iflasa uğrayanlar, günahkar siz deyilmisiniz?
Dünən ABŞ Nümayəndələr Palatası Türkiyəyə gözdağı vermək üçün erməni soyqırımının tanınması barədə akt qəbul etdi. Bizim “striptiz” deputatlara çox sağ ol deyə bilərsiniz. Təbii ki, bu sənədin qəbul olmasında bir sıra mühüm faktorlar var. Amma bizim diqqətimizi konqresin New Jersey-dən təmsilçisi olan Frank Pallonenin çıxışında Artsax ermənilərinin də adını çəkməsi cəlb etdi. Nümayəndələr Platasında Enerji və Ticarət Komitəsinin sədri olan bir adamın erməni diasporu ilə yaxınlığını açıq şəkildə göstərməsi Amerikadakı Azərbaycan səfirliyi adına böyük utancdır. Bu mesaj dünyanın ən önəmli ölkəsində fəaliyyət göstərən səfirliyin yarıtmaz işinə sərt sillədir. Səfirliklər bir daha anlasın ki, onların “işi-gücü dünyada Heydər Əliyev Fondunun posterlərini paylamaq, şəkərbura-paxlava qonaqlıqları vermək və insan hüquqları ilə bağlı tənqidləri susdurmaq” deyil.
Bu hadisə bir vaxtlar deputatların xaricdə yaşayan müxalif fikirli həmvətənlərimizin ünvanına səsləndirdiyi aqressiv fikirləri yada salır. Xatırlayırsınızsa, o vaxt MM-də bununla bağlı xüsusi müzakirə olmuş və deputatlar o insanları “vətən xaini” elan etmişdilər. Həmin çıxışlardan bəzi fraqmentləri yadınıza salıram: “Azərbaycanda fəal siyasi proseslərin getdiyi bir dövrdə erməni lobbisi tərəfindən, daxildən və xaricdən ayrı-ayrı insanlar tərəfindən maliyyələşdirilən bir qrup öyrədilmiş şəxs bu gün Azərbaycan dövlətinin əleyhinə, Azərbaycan Prezidentinin əleyhinə, o cümlədən digər insanların əleyhinə qarayaxma kampaniyası ilə məşğuldur… Heç kim düşünməməlidir ki, bu mənim haqqımda danışmayıb, mənə nə düşür ki, buna cavab verim. Bunlar xalqın adından danışırlar və siz də xalqın nümayəndəsisiniz, xalqın seçdiyi insanlarsınız. Mövqeyinizi bildirin”(Siyavuş Novruzov). “ Mən o gün hörmətli həmkarımız Adil Əliyevin Köln şəhərində soyqırımı ilə əlaqədar keçirdiyi tədbirə baxdım. Kimdir orada danışanlar? Bizim vaxtilə xaricə göndərdiyimiz azərbaycanlı tələbələr. Onlar elə danışırlar ki, ermənilər onların yanında məəttəl qalıblar. Bu gün vətəni təhqir edirlər, xalqı təhqir edirlər, bizim hamımızı təhqir edirlər” (Eldar İbrahimov). “Onlar azərbaycanlı deyillər, Azərbaycanı sevmirlər. Azərbaycanı artıq bütün dünya qəbul edib. Bizim inkişaf etmiş dövlətlər sırasında adımız çəkilir. Azərbaycanın bugünkü gözəl inkişafını görən insanlar əgər Azərbaycan haqqında bu cür söhbətlər aparırlarsa, bu o deməkdir ki, onlar azərbaycanlı deyillər, Azərbaycanın düşmənləridirlər “(Ağacan Abıyev). “Mən də Siyavuş müəllimlə, Eldar müəllimlə tam razıyam, amma demək istəyirəm, bu insanlar o qədər səviyyəsiz və kişilikdən uzaqdırlar ki, parlamentimizdə heç müzakirəmizə də layiq deyillər. Yəni sabah sevinməsinlər ki, biz onları müzakirə edirik. Onlar heç kimdirlər, onlar 1–2 nəfərdirlər. Xalq da heç onlara inanmır. Avropada oturub Azərbaycana və eyni zamanda, Azərbaycan Prezidentinə qarşı “qara piar” kampaniyası aparmaq istəyənlər gəlib ölkəmizdə kişi kimi rəqabət aparsınlar”(Elmira Axundova)
Biz Azərbaycan hökumətinin apardığı bərbad siyasətin ölkəni fəlakətə sürüklədiyini dəfələrlə demişik. Söylədiklərimiz, demək olar ki, hər gün özünü doğrulda-doğrulda gedir. Neçə ki, bu hakimiyyət var, bu parlament var, xalqı düşmən gözündə görən korrupsioner məmur ordusu var, ölkəmizin əleyhinə çox zərərli işlər aparılacaq. Vaxtında tənqidi fikir söyləyənləri düşmən elan etmək, daşa basmaq əvəzinə, deyilənlərdən nəticə çıxarsaydınız, bu fəlakətlər başımıza gəlməzdi. Apardığınız daxili siyasətin də, xarici siyasətin də nəticəsi ortada! Dəvəquşu kimi başınızı soxmusunuz kola, dünyanın reallığından xəbəriniz yox. Maduro kimi diktatorlarla oturub-durmağın nəticəsi bu olmalıydı. Bu ölkənin bütün bəlaları sizin orta əsrlər təfəkkürünüzdən qaynaqlanır. Başqasında günah axtarmağa gərək yox!
Azərbaycan insanı, bu hakimiyyət qaldıqca ölkəmiz daha ciddi təhlükələrlə üzləşəcək. 2 noyabr DİN binasının qarşısında mitinqində bir araya gəlin, bu yarıtmaz hakimiyyətə “istefa” deyin, bu “Striptiz” Məclisinə “yox” deyin. Xilasımız birliyimizdən, birgə etirazlarımızdan keçir!