Vitse-diktatorun təyyarəsinə görə xalq Samir Şərifovdan hesabat tələb edir!
İsrafçı, qaydasız, plansız hökumətin maliyyəçisi olmaq belədir. Hesabatsız, uçotsuz milyonları hara gəldi səpələyirsən və bir gün baxıb görürsən ki, manat qiymətdən düşüb, devalvasiya qapını kəsdirib, xəzinə boşalıb. Son 20 il müddətində ölkənin əsas maliyyə ehtiyatlarının başında duran Samir Şərifovun təcrübəsində olduğu kimi. Adam 2001-ci ildən Dövlət Neft Fondunun İcraçı Direktoru, 2006-cı dən Maliyyə naziri vəzifəsində çalışır, amma adı hər zaman ölkədə devalvasiyaya səbəb olan şəxs kimi çəkilib.
Xatırlayırsınızsa, Beynəlxalq Bankın keçmiş sədri Cahangir Hacıyev məhkəmədə dəfələrlə açıqlama verərək, naziri devalvasiyanın bir nömrəli səbəbkarı adlandırmışdı. Onun sözlərinə görə devalvasiyadan sonra yaranan maliyyə böhranı zamanı Azərbaycan valyuta bazarında yaranan hərc-mərcliyin də arxasında məhz maliyyə naziri və ona yaxın adamlar dayanıb. Ölkədə xarici valyuta böhranı yaşanan zaman “qara bazar”a milyonlarla dollar çıxaran və bu vasitə ilə milyonlarla manat qazanan şəbəkəyə məhz Samir Şərifov dəstək verib. Bundan başqa, Maliyyə nazirinin Neft Fondundakı fəaliyyəti zamanı xarici banklarla şübhəli əməliyyatlar apardığı barədə məlumatlar sızmışdı. Onun Maliyyə naziri kimi fəaliyyəti dövründə də xeyli bənzər hadisələr baş verib. Buna Kapital Bankda “məharətlə” həyata keçirilən “Əmanət Bankdakı əmanətlərin qaytarılması” əməliyyatını, ABB-nin iflas vəziyyətinə salınmasını, “qara bazarın” bərpa olunmasındakı rolunu, sığorta sektorunda inhisarçılığın yaranmasını misal çəkmək olar. Sizcə, 18 ildə bütün bunları Şərifov özbaşınamı edib? Şübhəsiz, belə bir ittihama sadəlövh uşaq da inanmaz. O bütün zamanlarda Əliyevlərin mühasibi kimi fəaliyyət göstərib. Maliyyə işlərini də onların tələblərinə uyğun aparıb. Şərifov ailənin bütün qaranlıq işlərini bilən adamdır və buna görə, ona dəyib toxunan da yoxdur. Son 18 ilin onca gəlir bolluğunda ölkənin nədən indiki iflas durumuna düşməsinin kökündə də bu səbəblər dayanır.
Şərifov həm də hakimiyyətin maliyyə sektorundakı əsas sözçüsüdür. Bu sahə ilə bağlıgözlənən bütün qara xəbərləri ona dedizdirirlər. Keçən il onun manatın möhkəmlənməsi ilə bağlı səsləndirdiyi qalmaqallı fikirlər şok effekti yaratmışdı: “Manatın məzənnəsinin kəskin möhkəmlənməsi ixraca da mənfi təsir edir. Bu xaricdən idxalın artmasına səbəb olur. Bir sözlə, Azərbaycan cəlbedici ölkəyə çevrilir. Ona görə də, biz bir sıra məsələlərin həllinə çalışmalıyıq.” Bu açıqlamanı növbəti devalvasiyanın anonsu hesab edən ölkə bir-birinə dəymiş və Şərifov açıqlamasına yenidən aydınlıq gətirməli olmuşdu. İqtisadçı alim Qubad İbadoğlu isə onun fikirlərini faktlarla yalan çıxarmışdı: “Dünya bazarında neftin qiyməti ucuzlaşmağa başlayanda Bakıda rəsmilərin könlündən manatın yenidən devalvasiyası keçir. Əslində bu, xüsusilə də büdcənin doldurulması baxımından asan və cəlbedicidir. Gəlin, sadə bir hesablama aparaq. 2019-cu ilin büdcəsinə Dövlət Neft Fondundan (DNF) 11 milyard 364 milyon manat vəsait transfer olunacaq. Bilirsiniz ki, DNF-yə vəsaitlər dollarla daxil olur. Bu isə o deməkdir ki, manatın məzənnəsi gələn il sabit qalarsa, onda DNF-dən transfer 6 milyard 685 milyon dolların (11.364 mln. manat/1.7 manat) ekvivalentində olacaq. Əgər manatın məzənnəsi gələn il orta hesabla 1.8 AZN-ə qədər ucuzlaşarsa, onda DNF-nin büdcəyə transferi 6 milyard 313 milyon dollar, 1.9 AZN-ə qədər ucuzlaşarsa, 5 milyard 981 milyon dollar, 2 AZN-ə qədər ucuzlaşarsa, 5 milyard 682 milyon dollara qədər azala bilər. Bu isə təxminən 1 milyard dollara qənaət deməkdir.”
Rəsmi məlumatlara görə, Azərbaycanın valyuta ehtiyatları bu il yanvarında 44 140,9 mln. dollar təşkil edib. Bunun 38 515,2 mln. dolları Azərbaycan Dövlət Neft Fondunun, 5 625,7 mln. dolları isə Azərbaycan Mərkəzi Bankının payına düşüb. Son 10 ildə ARDNF-nin valyuta ehtiyatları 27 296 mln. dollar və ya 3,4 dəfə artıb, AMB-nin valyuta ehtiyatları isə 511,3 mln. dollar və ya 8,3% azalıb. Amma nə sirdirsə, 18 ildir baş maliyyəçi ölkənin pullarını səhv hesablayır. Ona görə, ölkəyə gələn böyük milyardların xeyrini onlardan başqa kimsə görə bilmir. Bir ara mətbuat Rusiyalı keçmiş kəşfiyyatçının sözlərinə istinad edərək, Samir Şərifovun Rusiya, Amerika və Türkiyənin agenti olaraq üçlü agent rolu oynadığını yazmışdı. Xalq arasında bu məsələ lətifəyə çevrilmişdi. O lətifədə deyildiyi kimi, arada bizim üçün işləməyi də yaddan çıxarma, cənab nazir!