Burnu havalı adamlar haqqında deyilən “göylə gedir” ifadəsi ən çox bizim məmurlara yaraşır. Adamlar elə havayla gəzir ki, heç ayaqları yerə də dəymir. Lazım olanda da yerdə əliçıraqlı axtarsanız belə, tapa bilməzsiniz. Məsələn, vacib məsələlərdə adam içinə çıxıb iki kəlmə danışmayan Ailə, Qadın və Uşaq Problemləri üzrə Dövlət Komitəsinin sədri Hicran Hüseynova bu yaxınlarda vətəndaşlarla görüşə helikopterdə gedib. Xanımı Ağdam, Bərdə və Tərtər rayonuna görüşə xüsusi helikopter aparıb. Bunun hansı önəmli görüş olduğunu bilmirik, amma onu aparan helikopterin Ağdam Olimpiya İdman Kompleksinin stadionuna eniş etdiyi tam dəqiqdir. Bu uçuşun nə uçuş olduğunu sorğulayan mətbuatın susmadığını görən Komitə sədri cəbhə bölgəsinə göylə getməsinin səbəblərini açıqlamaq məcburiyyətində qalıb. O bildirib ki,
həmin vaxt avtomobili bərbad vəziyyətdə olduğuna və o tarixdə məlum bölgəyə reys olduğuna görə ora hərbi helikopterlə gedib. Əcəb işdir, istənilən məmur vəzifə səlahiyyətini yerinə yetirmək üçün helikopter sifariş edə bilərmi? Hərbi ekspertlər deyir ki, Müdafiə Nazirliyinin komitə rəhbəri üçün xüsusi helikopter ayırması mümkün deyil. “Yalnız məlum istiqamətə reys olduğu halda, komitə sədrinin uçuşuna icazə verilmiş ola bilər. Başqa cür mümkün deyil. Bu, hansısa şəxsi təsərrüfat və ya özəl şirkət deyil ki, istəyə uyğun helikopter ayrılsın.” İşin detallarını dəqiq bilmirik, amma bura Azərbaycandır, arxası çox yuxarılara bağlı olan komitə sədrinə helikopter də ayırarlar, tank da.
Ölkədə Hüseynovanın dövlət komitəsinin heç bir faydalı işlə məşğul olmadığını hamı bilir. Bunu gündən-günə artan boşanmalar və ailə zorakılıqları da təsdiqləyir. O üzdən, bizi çox təəccübləndirən məsələ də dağdan ağır xanımın zəhmət çəkib helikopterlə cəbhə bölgələrinə getməsidir. Özü də hərbi helikopterlə. Əgər sədr xanım son ayların kadr dəyişikliklərindən qorxuya düşüb, hərbi helikopterlə cəbhə bölgələrinə uçduğunu işgüzarlıq nümunəsi kimi gözə soxmaq istəyirsə, belə şoulara qarnımız tox. Onsuz da o komitə sədriinin yerdə də olsa, göydə də, bir işə yaramadığını hər kəs bilir.