İndi də Bakı Dövlət Sirkinin bağlanması məsələsi gündəmə gəlib. Mədəniyyət naziri Əbülfəs Qarayev isə ölkədə fəaliyyət göstərən yeganə sirkin bağlanmasına etiraz edib: “Şəhərdə mütləq belə bir məkan olmalıdır. Sirk 40 ilə yaxındır ki, əsaslı təmir olunmadan fəaliyyət göstərir. Hesab edirəm ki, müvəqqəti olsa da, təhlükəsizliklə bağlı olan ölçüləri götürməliyik. Artıq bunların yarısını etmişik. Ümidvaram ki, bu mövsümdə sirk öz işini davam etdirə bilər.” Amma Qarayevin bu qədər həyəcan keçirdiyini başa düşmürük. Cənab nazirin narahatlığına heç bir əsas yox. Qəm yeməyin, onsuz da, bu ölkəni idarə edənlər onu çoxdan sirkə çeviriblər. Prezidentindən tutmuş, nazirinə və ən xırda məmuruna qədər hamısı oyunbazlıq edir. Yəni, neçə ki, ölkədə bu hakimiyyət var, paytaxtda sirkin yoxluğu qəti şəkildə özünü hiss etdirməyəcək. Yadınızda olar, indi seçki tamaşasında rol alan siyasətçilərdən biri də illər əvvəl parlamenti “sirk” adlandırmışdı. Amma təkcə parlament deyil ki, 26 illik hakimiyyət dövlətin bütün orqanlarını oyun səhnəsinə çevirib. Müəllimi seçkidə, hakimi məhkəmədə, polisi küçədə, deputatı məclisdə məzhəkə çıxarır. Həm də necə məzhəkə! Prezident öz arvadını vitse-prezident elan edir, sinəsinə medal taxır, dövlətin büdcəsindən yarım milyard pul götürüb ona VİP təyyarə alır. Daha tamaşa, oyun, sirk necə olur ki, sizcə? Guya Əbülfəs Qarayev özü bu oyunların içində az rol alıb? Onun xalq artisti İlhamə Quliyevanın vida mərasimindəki məşhur çıxışını da unutmamışıq: “Bu gün həm də Xocalı faciəsinin ildönümüdür. İlhamə Quliyevanın dəfn olunduğu gün şəhidlərimizin də anım gününə təsadüf edib. O şəhidlərin sırasına sənətkarımız İlhamə Quliyevanın da adını yazmaq olar. Çünki İlhamə xanım Azərbaycanın müstəqilliyini, dövlətçiliyini ürəyində yaşadan bir sənətkar idi”. Bir də xatırlayırsınızmı, Qarayev rəhbərlik etdiyi nazirlikdə çalışan şair Vaqif Bəhmənliyə niyə töhmət vermişdi? Onun naziri Əbülfəz müəllimə həsr olunan şeirini qəzetdə dərc etdirdiyinə görə.
Əbülfəs müəllim, dilinə qurban,
Tamam düz deyirsən,
dediyin haqdı –
Yaxşılıq yolunda can qoymusan, can,
Nə ki yamanlıq var, səndən uzaqdı.
Şeirdən bir parçadır, oxuyub güləcəksiniz, hər halda. Gülməlidir, bəli. Hər gün Heydər, İlham və Mehriban Əliyevlərin şəninə yüz cür tərif yağdırıb, onu tərifləyən şair əməkdaşına töhmətləmək də gülməlidir. Bu artistlik kimə lazımdır, hamı hər şeyi yaxşı görür axı.
Sirkin bağlanmasına gəlincə. Deyilənə görə FHN binanın qəzalı vəziyyətinə görə köçürülməli olduğunu bildirib. Amma hamı da bilir ki, paytaxtın bu baxımlı yerində fəaliyyət göstərən sirkin başını qara buludlar çoxdan alıb. Ya həmin binaya çox yuxarılardan kiminsə gözü düşüb, ya da nəsə başqa planları var. Yaxın aylarda nazir özü də açıqlamışdı ki, “hazırda fəaliyyətdə olan sirk köhnəlib, yeni sirk binasının yaranmasına ehtiyac var, istəyirik müasir bina fəaliyyət göstərsin”. İndi isə görünür ki, yeni bina hazır olana qədər sirkin fəaliyyəti dayandırılacaq. Ancaq bizim sirklə bağlı problemimiz yox, lazım olsa, artistlərimizi kənara belə ixrac edə bilərik. Elə bu yaxınlarda NASA bəyan etmişdi ki, 2033-cü ildə Marsa ekspedisiyası üçün komik astronavt axtarır. Komik bir astronavtın komandanın gərginliyini asanlaşdıracağı məqsədilə axtarıldığı deyilir. Yeri gəlmişkən, Azərbaycan məmurları bu təklif üçün də öz namizədliyini irəli sürə bilər.