Koronavirus testlərindən nə qədər qazanc gəlir və kimə ?
Qənimət Zahid
Dəyərli xalq. Yadınızdadırmı bir müddət əvvəl təxmini bir hesablama təqdim etmişdim ki, Əliyev mafiyası maska satıçından ayda ən azı 2,4 milyon manat qazanır. Yerli maska istehsalının İlham Əliyevin şəxsi biznes sahəsi olduğunu da hər kəs bilir.
İndi keçək test satışına. Belə rahatsız xəbərlər yayılır ki, «Allah Ramin Bayramlıya lənət eləsin, testləri öz klinikalarında satır və koronavirusdan qazanır».
Koronavirusa qazanc fürsəti kimi baxmağa görə hər kəsin Allahın lənətinə gəlmək üstünlüyü var, amma kimin ? Koronavirus bu zamanın neft istehsalı kimi strateji məsələdir və hər yoldan ötən kimsə bu monopoliyaya girib bu qazanca şərik ola bilməz. Bunun sübutu kimi də maska istehsalını və biznesini misal olaraq təkrar etdim.
Koronavirus testləri də Ramin Bayramlı və ya buna bənzər təsadüfi şəxslərin biznes predmeti ola bilməz. Bu sahə İlham Əliyevin tam monopololiyası altındadır və bir neçə rəqəmi də gətirməklə bunun belə olduğunu aşkar görmək mümkündür.
Azərbaycanda koronavirus testlərini başlanğıcda hətta 400 manata təklif edirdilər. Amma o mərhələni buraxaq və hesab edək ki, indiki 140 manat orta qiymətdir. Rəsmi statistikaya görə bu zamana qədər 516 min nəfər test edilib. Ümumi məbləğ 72 milyon manat edir. (500 min nəfər qəbul etsək və 16 mini nəzərə almasaq).
Buraya, əlbəttə, xərclər də daxildir və xərcləri çıxaq. Yəni, koronavirus testləri neçəyə başa gəlir? Çin və Rusiya mənşəli testlər 3-5 dollardır. Təəssüf ki, Azərbaycan hökuməti ən ucuzundan alar, amma biz elə hesab edək ki, özlərini bu qədər düşük aparmayıblar bir az keyfiyyətli testlər alıb gətiriblər. Tutaq ki, Lukaşenkodan örnək götürüblər. Belarus ucuz və keyfiyyətsiz Rusiya testlərindən imtina edib Avropadan aldı. Belarusda vətəndaşlar üçün test xidməti 16 dollara, xaricilər üçün 20 dollara satılır. Mən Belarusun yuxarı həddini Azərbaycanda maya dəyəri kimi götürməyi təklif edirəm. Yəni maya dəyəri və dağıtım xərci toplam 20 dollar. Yəni 500 min nəfər üçün testlərin maya dəyəri və xərcləri 10 -15 milyon manatdır. Bu da o da deməkdir ki, koronavirus testlərindən indiyə qədər 55- 60 milyon manat xalis gəlir yaranıb. Bunu Ramin Bayramlıya və ya Bayram Raminliyə verərlərmi? Əlbəttə, verməzlər!
Koronavirus testlərinin baha olmasının tək səbəbi də budur : bu, İlham Əliyevin şəxsi biznesidir.