Milli Şura Qarabağ məhbuslarının taleyilə bağlı həyəcan təbili çalır. Bununla bağlı bəyanat qəbul edilib.
14-15 iyul Qarabağ nümayişinə görə həbs edilənlərin taleyi ilə bağlı Milli Şuranın bəyanatı (ingiliscəsi rəy bölümündə)
Tovuz döyüşlərindən sonra, 14-15 iyulda Bakıda orduya dəstək və Qarabağ şuarları ilə keçilən aksiyadakı məlum təxribat bəhanəsilə həbs edilənlərin mütləq əksəriyyətinin taleyindən xəbər yoxdur. Həbs olunanların mudafiə hüququ ilk vaxtlardan pozulub, onların harada, hansı şəraitdə saxlanıldığı heç ailələrinə də bəlli edilməyib.
Milli Şurada təmsil olunan AXCP-nin həmin olaya görə 40 nəfərdən artıq üzvü saxlanılıb. Onlardan bir qismi ifadələri alınaraq sərbəst buraxılsa da, hazırda 32 nəfəri həbs şəraitindədir. 17 nəfərinə cinayət işi açılıb və onların 16 nəfəri barəsində 3-4 aylıq həbs qətimkan tədbiri seçilib (bir nəfər ev dustaqlığındadır). 15 nəfər cəbhəçi isə 1 aylıq inzibati həbsə məhkum edilib.
AXCP üzvlərinin həbsindən artıq 15-20 gün keçir. Amma bu müddətdə onların əksəriyyəti nə vəkilləri ilə görüşə, nə də ailələrilə əlaqə saxlaya bilib. Həbs olunanlara özlərinin və partiyadaşlarının, o cümlədən sədrləri Əli Kərimlinin əleyhinə ifadə vermələri üçün işgəncəyə məruz qaldığı haqda xəbərlər var. Xüsusilə, AXCP Rəyasət Heyətinin üzvü Fuad Qəhrəmanlı barəsində bu məzmunda inandırıcı məlumatlar yayılıb. Həbs edilən AXCP fəallarından Seymur Əhmədzadə isə həbs zamanı ona verilən işgəncə barədə “Müdafiə Xətti” hüquq müdafiə təşkilatına məlumat ötürə bilib və məktubunda o, saxlanma şəraitini nasistlərin “Osvensim” əsir düşərgəsinə bənzədib.
Fuad Qəhrəmanlının ağır işgəncələrə məruz qaldığı haqda yayılan həyəcanlı xəbərlər geniş ictimai rezonans doğurandan sonra Ombudsman onunla görüşdüyü və hər hansı problem olmadığı barədə məlumat yaydı. Lakin ictimaiyyət, o cümlədən Milli Şura bu məlumata haqlı olaraq inanmır. İnamsızlıq üçün təkcə bu kifayətdir ki, işgəncəyə məruz qaldığını özu ictimailəşdirən Seymur Əhəmədzadə barəsində də Ombudsman aparatı işgəncə və pis rəftar məsələsini inkar edib (Ombudsman Fuad Qəhrəmanlı ilə yanaşı Seymur Əhmədzadə ilə də görüşüb). Ən başlıcası, saxlanma yerlərində, istintaqda işgəncədən geniş istifadənin buna qədər çoxlu sayda faktları ortaya çıxıb.
Nə qədər ki, həbs edilənlərin vəkilləri ilə görüşü, ailələrilə əlaqə saxlaması təmin edilməyib, onların taleyindən narahatlıqlar qalacaq. Milli Şura həbs edilənlərin bu hüquqlarının dərhal təmin olunmasını tələb edir. Qanunsuzluq o qədər dərinə işləyib ki, Fuad Qəhrəmanlının vəkili əlində order ola-ola onunla görüşə buraxılmır. Hətta Ombudsman aparatı da vəkili Fuad Qəhrəmanlı ilə görüşdürəcəyi sözünü tuta bilmir. Üstəlik, belə məlumatlar yayılır ki, vəkillə müqavilə bağlamadıqlarını demələri üçün Fuad Qəhrəmanlının ailə üzvlərinə təzyiq edilir.
Həbsdəkilərin öz ailələrilə telefon əlaqəsi saxlamaq hüququ da təmin olunmur. Əvəzində onlardan bir neçəsinin ailəsinə mənəvi işgəncə kimi naməlum şəxs tərəfindən zəng olunub və həbs edilən ailə üzvünün sağ-salamat olduğu deyilib, onun bir kəlməlik səsi eşitdirilib (bəlkə də audioyazı şəklində). Bütün bunlar isə həbs olunanların taleyindən narahatlığı daha da artırır.
Milli Şura Ombudsman aparatını və Qırmızı Xaçın Azərbaycan nümayəndəliyini bu istiqamətdə üzərlərinə düşən işi yerinə yetirməyə, həbs olunanlarla bağlı etibarlı məlumat alınmasını təmin etməyə çağırır. Həbs olunanların vəkilləri ilə görüşü və ailə üzvlərilə normal əlaqə saxlaması təmin olunmalıdır.
Milli Şura bu həbslər və işgəncə məlumatları ilə bağlı beynəlxalq birliyin ilkin reaksiyalarından məmnunluğunu bildirməklə yanaşı, bunların yetərli olmadığını, “The Washington Post”un yazdığı kimi, nəzarətsiz tirana çevrilmiş Əliyev rejiminə daha sərt və güclü təsirlər göstərilməli olduğunu vurğulayır. Milli Şura həmçinin Azərbaycanın demokratik ictimaiyyətini nahaqdan həbs edilmiş bu günahsız insanların müdafiəsində daha qətiyyətli, ardıcıl və tələbkar olmağa çağırır.