Dövlətin vəsaitinə dədə malı, millətə isə dilənçi kimi baxırlar
Elçin Rüstəmli
Nazir Sahil Babayev deyir 13 min nəfərin 190 manatı kəsmişik, 20 min nəfərə 250 manatlıq iş təklif etmişik, amma işləməyib, yardım istəyir.
Birincisi, 250 manat bir nəfərin aylıq xərcini ödəmir, işsizlərin əksəriyyəti ailə başçısıdır, onlar bu vəsaitlə nə edə bilərlər?
İkincisi, pandemiyadır, bütün ölkələr vətəndaşlara pul, dəstək, güzəştlər verir, amma Azərbaycanda at minnətinə, itə tullanan çörək qırıntısı kimi qəpik-quruş təklif edilir. O da ehtiyacı olan 100 adamdan birinə. Bu nə yanaşmadır?
Üçüncüsü, təklif olunan iş yerləri haradadır? Hamı küçə süpürməli, zibil daşımalı, park belləməlidir? Bütün işsizlərə bunu təklif etmək hansı ağılın məhsuludur? İşə ehtiyacı olanların çoxu, təhsili, peşə sahibi, ixtisaslı kadrlardır.Onlar necə getsin 250 manata küçə süpürsün?
Ümumiyyətlə hökumət adından danışanların hamısı millətə dilənçi, ələbaxan bir toplum kimi baxır. Öz məsuliyyətlərini, dövlətin vətəndaş qarşısında öhdəliklərini unudunurlar. Belə təəssürat yaradırlar ki, dövlətin vəsaitləri, imkanları bunların ata-baba malıdır, ondan pay istəmək dilənçilikdir.
Azərbaycan bəlkə də yeganə ölkədir ki, pandemiyada, bundan əvvəlki iqtisadi böhranlar zamanı vətəndaşına dəstək olmadı, sahib çıxmadı. İnsanları cərimələmək, təzyiq altında saxlamaq, böhranların bütün ağırlığını onun belinə yükləmək yolunu tutdu.
5 aydır pandemiyadır, bu ölkənin sərvəti olan, qaz, işıq, su, yanacaqdan bircə qəpik güzəşt edildimi?
50 milyard dollar valyuta ehtiyatından işini, biznesini itirən milyonlara düz-əməlli yardım olundumu?
Koronavirusdan insanları necə qorudular, bütün tədbirlər baş-ayaq, rüşvət korrupsiya içində iitib batır. İndi bəzi xəstəxanalar virusa yoluxanları rüşvət alıb qəbul edir…
Anca cərimə, həbs və qənaətdən daşırlar. Pandemiya vaxtı büdcəyə qənaətdən danışmaq bu milləti ələ salmaqdır. 🙁