Milli Şuranın sədri, professor Cəmil Həsənli
Rəsmi orqanların verdiyi məlumata görə bu ilin birinci yarısında Azərbaycanın dövlət büdcəsinin neft gəlirləri 5 863,4 milyon manat təşkil edib, yəni 14 faiz azalıb. Bu azalmanı kompensasiya etmək üçün elə bu gün məlumat yayılıb ki, büdcənin qeyri-neft gəlirləri 12 faiz artıb. Əgər bu sahələrin dövlət büdcəsində payı və çəkisi baxımından yanaşsaq azalmanın həcmi kifayət qədər böyükdür. İlham Əliyev uzun müddət qeyri-neft sektorunda inkişafdan gen-bol danışsa da, yağlı vədlər versə də bu sahədə vəziyyət acınacaqlı həddə düşüb. Təsəvvür edin qeyri neft-qaz sektoruna qoyulan investisiyaların həcmi 11 faizdən çox aşağı düşüb, amma qeyri neft sektorundan büdcə daxil olmaları 12 faiz artıb. Bura ölkədə daxili dövlət borcunun 40 faiz artması və 6 ay ərzində invistisya xərclərinin vur-tut 32 faiz ətrafında icra olunduğu da əlavə edilsə, bu artımın “yamağı” görsənər.
Sovet dövründə məşhur bir lətifə var idi. Nikita Xruşşov Amerika ilə SSRİ arasında 3 dəfə fərq olan ət, yağ və süd istehsalına görə ABŞ-a çatmaq və onları keçmək haqqında proqram irəli sürdükdə, iqtisadçılardan biri ona məsləhət görür ki, Nikita Sergeyeviç gəlin bu sahələr üzrə Amerikaya çataq, amma onları keçməyək, yəni bir az yavaşıyaq. Xruşşov soruşur: niyə? İqtisadçı deyir ki, biz onları ötüb keçsək salvarımızın yamaqlı olduğun arxadan görərlər. İndi bizim iqtisadi “inkişaf” nağılımız bu lətifəyə çox bənzəyir.
Qeyri-neft sektorunda elan olunan 12 faiz artımın iqtisadi əsasları varmı? Məsələn, neft sektoruna alternativ ola biləcək yükdaşıma və nəqliyyat sektorunda azalma müşahidə olunur. Təkcə TRASEKA dəhlizi ilə beynəlxalq yükdaşımalardan gəlirlər 0,5 faiz azalıb. Hökumətin qeyri-neft sektorunda aparıcı sahə kimi təqdim etdiyi kənd təsərrüfatında vəziyyət daha acınacaqlıdı. Emal müəssisələri istehsalçılardan pamidorun və xiyarın kiloqramın 10 qəpiyə belə qəbul etmir.
Bəlkə qeyri-neft sektorunda büdcə daxilolmalarındakı artımın mənbəyi qiymətlərin bahalaşması, cərimə və rüsumların kütləvi hal alması, COVİD və PCR test xərclərinin durmadan yüksəlməsində axtarmaq lazımdır. Bu ilin birinci yarısında ölkədə idxal mallarının qiyməti 27%, daxili məhsul bazarı 20% bahalaşıb. Bu ilin yanvar-aprel ayında qiymət artımından əldə edilən qazancın həcmi 5 milyard manat təşkil edir. Bunun da adını qoyurlar qeyri-neft sektorunun inkişafı. İlin əvvəlindən yanacağın qiyməti 35 faiz ətrafında yüksəlib,limiti kəskin şəkildə aşağı salmaqla qaz istehlakçılarının cibini soyub qazan (oxu büdcə) doldurmaq istəyirlər. Hər bir Azərbaycan vətəndaşı hava nəqliyyatından rus, gürcü və erməni vətəndaşlarından 3-4 dəfə baha istifadə edib Əliyevlərin ailə büdcəsini zənginləşdirməyə məhkumdur. Milyardlarla vəsait qoyulub “inkişaf simvolu” kimi təqdim edilən idmanın da hansı sürətlə iflas etdiyi ortadadır.
Yarım il ərzində qeyri-neft sektorundan büdcə daxilolmaları 12 faiz artır, amma işsizlər ordusuna daha 60 min işsiz əlavə olunur. Neft gəlirlərinin 70 faizi xərclənib, amma qeyri-neft sektoru hələ ki, söz olaraq qalır. 2015-ci iln devalvasiyasından sonra ölkədə ümumi daxili məhsulun həcmi yarıba-yarı azalıb. Böhrandan çıxmağın yollarını aramaq əvəzinə hökumət rəqəmlərlə manipulyaziya edib baş aldaır.
P.S. Bu da regionların social-iqtisadi inkişafına (yəni qeyri-neft sektoruna) 70 milyard dollar vəsait xərclənmiş bir ölkənin qabaqcıl rayonlarından birinin göz oxşayan seçki məntəqəsi.