လက်ရှိဖြစ်ပေါ်နေသော မုန်တိုင်းငယ်အရှိန်ကြောင့် မော်လမြိုင်မြို့တွင် မိုးသည်းထန်ကာ မိုးသက်လေပြင်းတိုက်ခတ်၍ အိမ်ထောင်စု ၆၀ခန့် ဘေးလွတ်ရာရှောင်နေရကြောင်း လူမှုကူညီရေးလုပ်ဆောင်နေသူများထံမှ သတင်းရရှိသည်။
အဆိုပါ မုန်တိုင်းအရှိန်ကြောင့် မော်လမြိုင်တစ်မြို့လုံးနီးပါး သစ်ပင်ကြီးများ လဲပျိုခြင်း၊ ဓာတ်မီးတိုင်များကျိုးကျ၍ လမ်းများပိတ်ဆို့ခြင်း၊ ဓာတ်အားလိုင်းများပြတ်တောက်ခြင်းနှင့် နေအိမ်များပျက်စီးခြင်းများ ရင်ဆိုင်နေရကြောင်း လူမှုကူညီရေးလုပ်ဆောင်သူများက ပြောသည်။
လက်ရှိတွင် မော်လမြိုင်မြို့ရှိ သာယာအေးနှင့် ဇေယျာသီရီမြို့သစ်ရှိ ကားနားလမ်းအနီးဝန်း ကျင်နေအိမ်များမှာ တဲအိမ်များဖြစ်၍ ပိုမိုအထိနာလျက်ရှိပြီး အိမ်ထောင်စု ၆၀ ခန့်ကို ဓမ္မာရုံတစ်ခုသို့ ပြောင်းရွှေ့ထားရကြောင်း မော်လမြိုင်မြို့မှ လူမှုကူညီရေးလုပ်ဆောင်နေသူ ကိုဇင်မိုးက ၎င်း၏လူမှုကွန်ရက်မှတစ်ဆင့် အသိပေးသည်။
“ဓမ္မာရုံမှာ တိမ်းရှောင်ခိုင်းထားရတဲ့ ထမင်းထုပ်ဝေရမဲ့ မိသားစုတွေ ရှိနေပါပြီး။ ယခုညနေ (4:15)Pmအချိန်ထိလေရော မိုးရော အပြင်းထန်ဆုံးအခြေအနေမှာရှိနေဆဲပါ”ဟု ၎င်းက ပြောသည်။
ဘေးလွတ်ရာပြောင်းရွှေ့နေထိုင်ကြရသော လေဘေးသင့်ပြည်သူများတွင် သက်ကြီးရွယ်အိုများ၊ ကလေးသူငယ်များ၊ ကိုယ်ဝန်ဆောင်များပါဝင်နေသဖြင့် အကူအညီများလိုအပ်လျက်ရှိကြောင်း သိရသည်။
ကပ္ပလီပင်လယ်ပြင်(မုတ္တမကမ်းလွန်အနီး) ၌ဖြစ်ပွားနေသော မုန်တိုင်းငယ် Depression သည် မွန်ပြည်နယ် မော်လမြိုင်မြို့အနီးမှဖြတ်ကာ ကုန်းတွင်းမုန်တိုင်းငယ်အဖြစ် ဆက်လက်တည်ရှိနေကြောင်း မိုးလေဝသပညာရှင်များက အသိပေးထားသည်။
