စစ်ကိုင်းတိုင်း၊ ကလေးမြို့အခြေစိုက် ခမရ(၃၆၁)မှ တပ်သားနိုင်ဝင်း ၎င်းတို့ထံ ခိုလှုံလာကြောင်း ကနီမြို့နယ် အခြေစိုက်ကျောက်လုံးကြီးပြည်သူ့ကာကွယ်ရေးတပ် KLG PDF တာဝန်ရှိသူက People’s Spring သို့ ပြောသည်။
အဆိုပါ တပ်သားနိုင်ဝင်းထံတွင် လက်နက်ခဲယမ်းများမပါရှိဘဲ ကိုယ်လွတ်ရုန်းထွက်ပြေးလာခြင်းဖြစ်သော်လည်း ကောင်းမွန်စွာစောင့်ရှောက်ပေးထားကြောင်း အသိပေးသည်။
“သူက မေလ ၂၄ ရက် မနက်အစောကြီး ရောက်လာတာ။ထွက်ဆိုချက်အရဆို ကလေးမြို့နဲ့ ကနီ မြို့ ထဲက ကျေးရွာတွေကို မီးရှို့တဲ့ စစ်ကြောင်းမှာ သူပါတယ်။အခုက စစ်တပ်ရဲ့လုပ်ရပ်တွေကို ရွံလာလို့ ထွက်ပြေးလာခဲ့တာ”ဟု KLG PDF တာဝန်ရှိသူက ရှင်းပြသည်။
ထို့အပြင် အကြမ်းဖက်စစ်ကောင်စီတပ်သည် စစ်ကြောင်းတစ်ခုတွင် ရိက္ခာအဖြစ်သုံးရက်စာသာ ထောက်ပံ့ပေးပြီး၊ ရိက္ခာကုန်လျှင် ပြည်သူပိုင်နေအိမ်များမှ ဆန်၊ဆီ၊ ပိုက်ဆံစသည့် ပြည်သူပိုင်ပစ္စည်းများကို ယူဆောင်ခဲ့ရပြီး ဖုန်းလုံးဝအသုံးပြုခွင့်မရဟု ဆိုသည်။
ခိုလှုံလာသည့်တပ်သားနိုင်ဝင်းကို လွတ်မြောက်နယ်မြေသို့ ပို့ဆောင်ပေးရန် စီစဥ်ထားပြီး လက်ရှိတွင် KLG PDF က ခေတ္တထိန်းသိမ်းထားဆဲ ဖြစ်သည်။
ယခုနှစ်အတွင်း အကြမ်းဖက်စစ်ကောင်စီ၏ ရှေ့တန်းစခန်းများနှင့် စစ်ကြောင်းများမှ လက်နက်မဲ့အပါအဝင် လက်နက် ၊ကျည်ခဲယမ်းများနှင့်အတူ ထွက်ပြေးလာသည့် တပ်သားအများအပြားရှိလာသည်။
