ဓမ္မဘက်ခိုလှုံလိုသော စစ်သားနှင့် ရဲများအတွက် လက်နက်နှင့်အတူ အလင်းဝင်ပါက ဆုကြေးငွေ ကျပ်သိန်း ၃၀နှင့် လုံခြုံရေးအပြည့်အ၀ အာမခံပေးမည် ဖြစ်ကြောင်း ရှမ်းပြည်နယ်တောင်ပိုင်း အခြေစိုက် အမှတ်(၁၀၀၈)တပ်ရင်းက ယနေ့ ကြေညာသည်။
“သမိုင်းမှာ အမဲစက်မစွန်းဖို့ရာ နောက်ဆုံးအခွင့်အရေးကို မိမိရရ ဆုပ်ကိုင်ပါ”ဟု လည်းကြေညာချက်၌ ဖော်ပြထားသည်။
ရှမ်းတောင်ရှိ စစ်တပ်အတော်များများ၌ CDM လုပ်ချင်သည့် ရဲဘော် စစ်သားများရှိနေသေးသည်ကို ကြားသိရကြောင်း၊ ထို့ပြင် အကြမ်းဖက်စစ်ကောင်စီ အသုံးချခံ အဖွဲ့အစည်းအောက်၌ မနေချင်သည့် ရဲဘော်များလည်းရှိကြောင်း အမှတ်(၁၀၀၈)တပ်ရင်းက ဆိုသည်။
“ဒါကြောင့် မိမိတို့၁၀၀၈ တပ်ရင်းဆီသို့ဟိုဖက်ကပြေးလာလာ ဒီဖက်ကပြေးလာလာဘာကိုယ် ရေးလှို့ဝှက်ချက်မှ မပေါက်ကြားစေရပါဘူးလို့အာမခံပါတယ်။ နိုင်ငံခြားဘဲသွားသွားပြည်သူ့ ရင်ခွင်ထဲနေပီး ပြည်သူဖက်ကနေပြန်တိုက်ကူလို့လည်းရပါတယ်။ လက်နက်တစ်ခုခုယူ လာတာဖြစ်ဖြစ်လက်နက်စခန်းကိုမီးရှို့တာဖြစ်ဖြစ် လုပ်ခဲ့ပေါ့ဗျာ။ ”ဟု အမှတ် (၁၀၀၈)တပ်ရင်း၏ ထုတ်ပြန်ချက်၌ ရေးသားထားသည်။
အမှတ်(၁၀၀၈)တပ်ရင်းသည် ရှမ်းပြည်နယ်တောင်ပိုင်း ဖယ်ခုံနှင့် ညောင်ရွှေအစပ် တိုက်ပွဲများ၌ အခြား တော် လှန်ရေးအင်အားစုများနှင့် ပူးပေါင်းပြီး တိုက်ပွဲဝင်နေသည့် ပြည်သူ့ကာကွယ်ရေးတပ်ဖွဲ့တစ်ခုဖြစ်သည်။
