စစ်ကိုင်းတိုင်း၊တန့်ဆည်မြို့နယ်တွင်မီတာခအပါအဝင်အခွန်အခများ လိုက်လံကောက်ခံမည့် အကြမ်းဖက်စစ်ကောင်စီ၏ ဝန်ထမ်းများအား၎င်းတို့လုံခြုံရေးတာဝန်ယူမည်မဟုတ်ကြောင်းပြည်သူ့ကာကွယ်ရေးတပ်မတော်(တန့်ဆည်မြို့နယ်)က သတိပေးကြေညာသည်။
တန့်ဆည်မြို့နယ်တွင် အကြမ်းဖက်စစ်ကောင်စီ၏ ထွေအုပ်၊စစ်တပ်နှင့် ရဲများကသက်ဆိုင်ရာဝန်ထမ်းများနှင့် ပူးပေါင်းကာ မီတာခများ၊အခွန်များ လိုက်လံကောက်ခံရန်ပြင်ဆင်နေကြောင်း ပြည်သူ့ကာကွယ်ရေးတပ်မတော် (တန့်ဆည်မြို့နယ်)ကပြောသည်။
ပြည်သူတစ်ရပ်လုံးရွေးချယ်တင်မြောက်ထားသော ပြည်သူ့အစိုးရမတရားဖမ်းဆီးခံထားရချိန်၊အများပြည်သူများ စီးပွားရေးကျပ်တည်းနေချိန်၌ ယခုကဲ့သို့သော မီတာခနှင့်အခွန်ခများအား အကြမ်းဖက်စစ်ကောင်စီနှင့် ပူးပေါင်းကာ လိုက်လံကောက်ခံပေးခြင်း၊လမ်းညွန်ခြင်းများ ပြုလုပ်မည်ဆိုပါက သက်ဆိုင်ရာဝန်ထမ်းများ၏လုံခြုံံရေးအားလုံးဝ(လုံးဝ) တာဝန်ယူမည်မဟုတ်ကြောင်းပြည်သူ့ကာကွယ်ရေးတပ်မတော် (တန့်ဆည်မြို့နယ်)ကယနေ့(ဇွန်လ ၈ ရက်နေ့)တွင်အသိ
ပေးကြေညာသည်။
“စောစောစီးစီး ထွေအုပ်ရုံးထဲမီတာခတွေ သွားဆောင်နေကြတယ်။ခင်ဗျားတို့ပေးလိုက်တဲ့ပိုက်ဆံတွေက ဘယ်ရောက်မယ်ဆိုတာတော့ သိကြမှာပါနော်။…မလုပ်ကြပါနဲ့ဗျာ။ ဒီနေ့ဒီအချိန်ထိပေးဆပ်လာခဲ့ကြပြီးပြီပဲ။ထောင်ထားတဲ့လက်သီးလက်မောင်းတွေအားမာန်တင်းတင်းနဲ့ ဆက်ထောင်ထားပေးကြပါ။မီတာခမဆောင်လို့ မီးလာဖြတ်ပါစေ။ခဏတာအမှောင်ကို တစ်ဘဝစာမှောင်မယ့်လမ်းကြောင်းနဲ့တော့ မလဲကြပါနဲ့”ဟု Taze Support Organization -TSO အဖွဲ့က ပြောသည်။
အကြမ်းဖက်စစ်တပ်သည် အာဏာသိမ်းကာလအတွင်း တန့်ဆည်မြို့နယ်ရှိ သံဃာတစ်ပါးအပါအဝင်ပြည်သူ၆၅ဦးထက်မနည်း သတ်ဖြတ်ထားသည်။
တန့်ဆည်မြို့နယ်အတွင်းရှိရွာပေါင်း ၄၁ရွာကအိမ်ခြေ ၁၁၁၅အိမ်အထိအကြမ်းဖက်စစ်တပ်က မီးရှို့ဖျက်ဆီးခဲ့သည်။ ရွာ ၄ ရွာမှာ ရွာလုံးကျွတ်နီးပါး မီးရှို့ခံခဲ့ရသည်။
