လမ်းကြောင်းမှားပြီး ပျံသန်းလာတဲ့ လေယာဉ်ငယ် တစ်စီးကြောင့် အမေရိကန် သမ္မတ ဂျိုးဘိုင်ဒန်ဟာ အရေးပေါ် ရွှေ့ပြောင်းခဲ့ရကြောင်း သိရပါတယ်။
သမ္မတ ဘိုင်ဒန်နဲ့ သမ္မတ ကတော် ဂျီလ်ဘိုင်ဒန်တို့ဟာ ဒယ်လာဝဲက ရီဟိုဘို့သ် ကမ်းခြေမှာ ရှိနေတဲ့ ကိုယ်ပိုင်နေအိမ်မှာ သွားရောက် အနားယူနေတဲ့အချိန် လေယာဉ်ငယ် တစ်စီးက ကန့်သတ် လေပိုင်နက်ထဲ ဝင်ရောက်လာခဲ့တာလို့ အိမ်ဖြူတော်က ထုတ်ပြန်ပါတယ်။
သမ္မတရဲ့ ကိုယ်ရံတော် အထူးလုံခြုံရေး အေးဂျင့်တွေက သမ္မတ ဇနီးမောင်နှံကို ချက်ချင်း ခေါ်ထုတ်သွားပြီး သတ်မှတ် လုံခြုံရေး စံနှုန်းတွေနဲ့အညီ တိမ်းရှောင် ရွှေ့ပြောင်းစေခဲ့ပါတယ်။ အမေရိကန် လေကြောင်း ကာကွယ်ရေး တပ်ဖွဲ့ရဲ့ တိုက်လေယာဉ်ကလည်း ချက်ချင်း ပျံတက်သွားပြီး လေယာဉ်ငယ်ကို ကန့်သတ် လေပိုင်နက်ထဲကနေ ထွက်ခွာသွားဖို့ သတိပေးပြီး နီးစပ်ရာ လေယာဉ်ကွင်းမှာ ဆင်းသက်စေခဲ့ပါတယ်။
လေယာဉ်မှူးဟာ ထောက်လှမ်းရေး အရာရှိတွေရဲ့ စစ်ဆေး မေးမြန်းမှုကို ခံခဲ့ရပါတယ်။ ကနဦး အခြေအနေအရ သူဟာ ကန့်သတ် လေပိုင်နက်မှန်း မသိဘဲ ကမ်းခြေဖက် ချဉ်းကပ် ပျံသန်းမိခဲ့တာလို့ လေယာဉ်မှူးက ဝန်ခံထားပါတယ်။ သူဟာ အရပ်ဖက် လေကြောင်း ပျံသန်းမှု စည်းမျဉ်းတွေကို ဖောက်ဖျက်မိတဲ့အတွက်တော့ ဖြေရှင်းရဦးမှာ ဖြစ်ပါတယ်။
သမ္မတရဲ့ သက်တော်စောင့် အဖွဲ့ကတော့ သူတို့ဟာ လုပ်ထုံးလုပ်နည်းတွေနဲ့အညီ တုံ့ပြန် ဆောင်ရွက်ခဲ့ကြောင်း ပြောခဲ့ပြီး ဘိုင်ဒန်အတွက် ထိခိုက်မှု တစုံတရာ မရှိခဲ့ဘူးလို့ မှတ်ချက် ပေးသွားခဲ့ပါတယ်။
