မန္တလေးတိုင်း၊ မြင်းခြံမြို့နယ်တွင် စစ်ကောင်စီတပ်ဖွဲ့လိုက်ပါလာသော ယာဥ်တစ်စီးအား ပဒေသာမိုင်းခွဲ၍ တိုက်ခိုက်ခဲ့ကြောင်း 27 Revolution Force အဖွဲ့က သတင်းထုတ်ပြန်သည်။
ယမန်နေ့(ဇွန်လ ၉ ရက်နေ့) နံနက် ၈း၂၀ ခန့်က မြင်းခြံမြို့နယ်၊ ကိုင်းကျေးရွာတွင် အခြေချတပ်စွဲထားသော အကြမ်းဖက်စစ်တပ်မှ ကားတစ်စီးသည် ကိုင်းကျေးရွာမှ မြင်းခြံမြို့သို့အသွား လမ်းတစ်နေရာတွင် ပဒေသာမိုင်း ၃ လုံးဖြင့် မိုင်းဆွဲတိုက်ခိုက်ခဲ့ခြင်းဖြစ်သည်။
အကြမ်းဖက်စစ်ကားမှာ ဘယ်ဘက်တစ်ခြမ်းလုံး စုတ်ပြတ်သွား၍ ကားပေါ်ပါစစ်ကောင်စီတပ် ၆ ဦးလုံး အပြင်းအထန်ဒဏ်ရာရရှိသွားကြောင်း၊ ၃ ဦးမှာ မျက်နှာများ စုတ်ပြတ်သွားကာ သေဆုံးနိုင်ခြေများကြောင်း 27 Revolution Force၏ ထုတ်ပြန်ချက်တွင် ဖော်ပြသည်။
မိုင်းဆွဲတိုက်ခိုက်မှုအား မြင်းခြံခရိုင် တပ်ရင်း၁ 27 Revolution Force၊ Burmese Guerrilla Force-(BGF)၊ 11 Brothers Revolution Force အဖွဲ့တို့မှ ပူးပေါင်းတိုက်ခိုက်ခဲ့ခြင်းဖြစ်ပြီး ရဲဘော်များအထိအခိုက်မရှိ ဆုတ်ခွာနိုင်ခဲ့ကြောင်း Revolution Forceက အသိပေးသည်။
မြင်းခြံမြို့နယ်သည် အကြမ်းဖက်စစ်ကောင်စီတပ်အား ခုခံတော်လှန်ရာတွင် အားကောင်းသည့်မြို့နယ်တစ်ခုဖြစ်ပြီး မိုဘိုင်းအင်တာနက်များ ဖြတ်တောက်ခံထားရသည်။
