မုံရွာ ပြည်သူ့ကာကွယ်ရေးတပ်(MPDF) တိုက်ခိုက်၍ နှစ်လအတွင်း စစ်ကောင်စီဘက်က ၈၂ဦး အထက် သေဆုံးပြီး ၃၂ဦး အထက် ထိခိုက်ဒဏ်ရာရရှိခဲ့ကြောင်း MPDFက ယနေ့ သတင်းထုတ်ပြန်သည်။
မုံရွာခရိုင် အမှတ်(၁) တပ်ရင်း MPDF ၏ ဧပြီလနှင့် မေလ အတွင်း တိုက်ပွဲသတင်းများကို စုစည်းဖော်ပြခဲ့ခြင်းဖြစ်သည်။
တော်လှန်ရေး ကြာရှည်လာသည်နှင့်အမျှ ပြည်သူမှ မွေးဖွားလာသည့် ပြည်သူ့ကာကွယ်ရေးတပ်ဖွဲ့များ နှင့် အကြမ်းဖက် စစ်ကောင်စီတပ်အကြား ထိတွေ့တိုက်ပွဲများ ပိုမိုများပြားလာကြောင်းလည်း သိရသည်။
စစ်လက်နက် အင်အား ကွာခြားချက် ကြီးမားသော်လည်း နောက်ဆုံး၌ ဓမ္မသည် အစဉ်အမြဲ အနိုင်ရရှိမည်ဟု ယုံကြည်ကြောင်း၊ အကြမ်းဖက် စစ်တပ် အမြစ်ပြတ် ချေမှုန်းရေး နှင့် စစ်သုံးစစ် တိုက်ဖျက်ရေး၊ စစ်မှန်သော ဖက်ဒရယ်ဒီမိုကရေစီရရှိရေး တိုက်ပွဲတွင် MPDF သည်ပြည်သူများရှေ့မှအစဉ်အမြဲရပ်တည်၍တိုက်ပွဲဝင်သွားမည်ဖြစ်ကြောင်းကတိပြုသည်ဟုထုတ်ပြန်ခဲ့သည်။
နှစ်လတာအတွင်း MPDFသည် မင်းကင်းမြို့နယ်၊ မုံရွာမြို့နယ်၊ ပုလဲမြို့နယ်၊ ကနီမြို့နယ် များအတွင်း၌ စစ်ကောင်စီပစ်မှတ်များ၊ စစ်ကောင်စီ စစ်ကြောင်းများကို တိုက်ခိုက်ခဲ့ခြင်းဖြစ်သည်။ ထိုသို့ တိုက်ခိုက်ရာတွင် ဒေသတွင်း ကာကွယ်ရေးတပ်ဖွဲ့များနှင့် ပူးပေါင်းဆောင်ရွက်ခဲ့ခြင်းဖြစ်ကြောင်း ဖော်ပြထားသည်။
