ထိခိုက်သေဆုံးမှု မသိရသေး
ယောဒေသ ထီးလင်းမြို့နယ်တွင် ရိက္ခာလာသယ်သော စစ်ကောင်စီတပ်ကို လမ်းမှနေ၍ ဖြတ်တိုက်ခဲ့ကြောင်း YDF(Htilin)က ယနေ့(ဇွန် ၁၆) ထုတ်ပြန်သည်။
ယနေ့နံနက် ၅ နာရီခန့်က ရွှေအောင်သာကျေးရွာ၌တပ်စွဲထားသော အကြမ်းဖက်စစ်ကောင်စီတပ်များ အောင်းကျေးရွာဘက် ရိက္ခာလာသယ်စဥ် လမ်းမှဖြတ်တိုက်ခဲ့ရာ အပြန်အလှန်ပစ်ခတ်မှု ၁ နာရီခန့် ပြင်းထန်စွာဖြစ်ပွားခဲ့ကြောင်း ဖော်ပြသည်။
အလားတူ ယနေ့နံနက် ၇ နာရီခန့်တွင် အောင်းကျေးရွာအတွင်း ရိက္ခာသွားယူပြီးပြန်လာသော အထက်ပါစစ်ကြောင်းကို အပြန်လမ်းမှ စောင့်ဆိုင်း၍ ဒုတိယအကြိမ် ထပ်မံတိုက်ခိုက်ခဲ့သည်ဟု ဆိုသည်။
“စကစတပ်စိပ်တစ်စိပ် (၂၅)ဦးခန့်က ရိက္ခာလာသယ်တာဗျ။ အဲမှာ ကျွန်တော်တို့ကင်းအဖွဲ့နဲ့ ထိတွေ့မှုဖြစ်တာ။ ပစ်ခတ်မှု ၁ နာရီနီးပါးကြာတယ်။ သူတို့(စကစတပ်)အောင်းရွာထဲရောက်တဲ့အချိန်မှာ ရွာကိုဝိုင်းဖို့လုပ်လိုက်တယ်။ သိပ်မကြာဘူး ဒီကောင်တွေပြန်ထွက်လာတော့ ရွာအထွက်မှာ နောက်တစ်ကြိမ်ထပ်တိုက်တယ်”ဟု YDF(Htilin)မှ တာဝန်ရှိသူတစ်ဦးက ပြောသည်။
အထက်ပါတိုက်ခိုက်မှုနှစ်ကြိမ်တွင် စစ်ကောင်စီတပ်ဘက်မှ ထိခိုက်သေဆုံးရှိနိုင်သော်လည်း လတ်တလောတွင် အတည်ပြု၍မရသေးကြောင်း ၎င်းက ဆက်ပြော သည်။
ထိတွေ့တိုက်ပွဲများဖြစ်ပွားခဲ့ခြင်းကြောင့် စစ်ကောင်စီတပ်များရိက္ခာလာသယ်သည့် အောင်းကျေးရွာမှ ဒေသခံပြည်သူ ၂၀၀ ကျော်မှာ ဘေးလွတ်ရာသို့ ထွက်ပြေးတိမ်းရှောင်နေကြရကြောင်း YDF(Htilin)ထံမှ သိရသည်။
