က​လေးမှတီးတိန်သွား​သောစစ်ကာင်စီတပ်ကို ​ဒေသခံကာကွယ်​ရေးတပ်နှစ်ဖွဲ့​ပေါင်းတိုက်ရာ ၇ဦး​သေ၊ ၁၅ ဦးဒဏ်ရာရ

ကလေးမြို့မှ တီးတိန်မြို့သို့သွားသည့် စစ်ကောင်စီတပ်၏ ယာဉ် ၁၇ စီးပါ ယာဥ်တန်းကို ဒေသခံကာကွယ်ရေးတပ်ဖွဲ့နှစ်ခုပူးပေါင်းတိုက်ခိုက်ရာစစ်ကောင်စီတပ်သား၇ဦးသေဆုံးပြီး ၁၅ ဦး ဒဏ်ရာရရှိခဲ့သည်ဟု ချင်းပြည်ကာကွယ်ရေးတပ်ဖွဲ့တစ်ခုဖြစ်သည့် CDF CDM-Siyin အဖွဲ့ကသတင်းထုတ်ပြန်သည်။

စစ်ကောင်စီတပ် ကားတန်းသည် ဇွန် ၁၆ ရက်တွင် ကလေးမြို့မှ ထွက်လာပြီး ဇွန် ၁၇ ရက်နေ့လယ် ၂နာရီခွဲခန့်တွင် ဒေသခံကာကွယ်ရေးတပ်များကတိုက်ခိုက်ခဲံ့ခြင်းဖြစ်သည်။

တိုက်ပွဲအတွင်းမှာ စစ်ကောင်စီတပ်က လက်နက်ကြီးဖြင့် ပစ်ခတ်ခဲ့သော်လည်း ဒေသခံကာကွယ်ရေးတပ်များ ဘေးကင်းစွာ ပြန်လည် ဆုတ်ခွာနိုင်ခဲ့သည်ဟု​ဖော်ပြထားသည်။

ယနေ့တိုက်ပွဲကို CDF CDM (စီးယင်း)နှင့်PDF(Zoland)တို့က ပူးပေါင်းတိုက်ခိုက်ခဲ့ခြင်းဖြစ်သည်။

“မြေပြင်မှာ လိုင်းမကောင်းလို့ မြေပြင်ကသူတို့နဲ့ ဆက်သွယ်လို့မရသေးဘူး”ဟု CDM (စီးယင်း)အဖွဲ့ ပြန်ကြားရေးတာဝန်ရှိသူက တိုက်ပွဲအ​ခြေအ​နေအ​သေးစိပ်​မေးမြန်းရာတွင်ပြောသည်။

ကလေးမြို့မှ ချင်းတောင်ကို ဇွန် ၈ ရက် နံနက် ၈နာရီတွင် စစ်ကား ၄ စီးနှင့် နေ့လယ် ၁၁ နာရီတွင် စစ်ကား ၁၃ စီး တက်သွားသည်ဟု ​ဒေသခံများကပြောသည်။ ထိုကားတန်းတွင် ၅ စီးမှာ ရိက္ခာ ကားဖြစ်ပြီးကျန်ကားများမှစစ်ကောင်စီတပ်သားများဖြစ်သည်ဟုလည်း​ဒေသခံများက​​ပြောသည်။

ကလေးမြို့နှင့် တီးတိန်မြို့သည် မိုင် ၅၀ခန့် ကွာဝေးပြီး ပုံမှန် ၆ နာရီခန့်သာ မောင်းနှင်ရသည့် ခရီးအကွာအဝေးဖြစ်သည်။