ညောင်လယ်ရွာ၌ စစ်ကောင်စီတပ်က ပြည်သူ​ခြောက်ဦးကို သတ်ဖြတ်ရာ ငါးဦးကိုလက်ပြန်ကြိုးတုပ် မီးရှို့ သတ်ဖြတ်ခဲ့ဟု ဂန့်ဂေါ(ပအဖ)ထုတ်ပြန်

မကွေးတိုင်း ဂန့်ဂေါမြို့နယ် ညောင်လယ်ရွာတွင် စစ်ကောင်စီတပ်က ပြည်သူ​ခြောက်ဦးကို သတ်ဖြတ်ခဲ့ကြောင်း ဂန့်ဂေါပြည်သူ့အုပ်ချုပ်ရေးအဖွဲ့(ပအဖ)က ယနေ့ ထုတ်ပြန်သည်။

ဇွန်လ ၃ရက်က စစ်ကောင်ဏီတပ်များ ညောင်လယ်ရွာသို့ ဝင်ရောက်လာစဉ် ပြည်သူ​ခြောက်ဦးကို သတ်ဖြတ်ခဲ့ရာ ၎င်းအနက် ငါးဦးမှာလက်ပြန်ကြိုးတုပ်ကာ မီးရှို့သတ်ဖြတ်ခံရခြင်းဖြစ်သည်ဟု ဖော်ပြထားသည်။

အဆိုပါ သတ်ဖြတ်ခံရသူ ​ခြောက်ဦးအနက် နှစ်ဦးမှာ ညောင်လယ်ရွာသားများဖြစ်ပြီး ကျန် ​လေးဦးမှာ လက်ရှိ အချိန်ထိအတည်မပြုနိုင်သေးကြောင်း၊ စစ်ကောင်စီတပ်များက အခြားဒေသများမှ ဖမ်းဆီးခေါ်ဆောင်လာသူများ ဖြစ်နိုင်ကြောင်း မြို့နယ် ပအဖက ထုတ်ပြန်ခဲ့သည်။

လက်ရှိအချိန်ကာလတွင် အကြမ်းဖက်စစ်ကောင်စီတပ်များသည် ဂန့်ဂေါမြို့နယ်အတွင်း လူ‌နေအိမ်များကို မီးရှို့ဖျက်ဆီးခြင်း၊ အပြစ်မဲ့ပြည်သူများကို ဖမ်းဆီးခြင်း စသည့် အကြမ်းဖက်မှုများကို ကျူးလွန်လျက်ရှိ၍ ပြည်သူများအနေဖြင့် စစ်ကောင်စီတပ် စစ်ကြောင်းများဝင်ရောက်လာပါက ထိပ်တိုက်မတွေ့မိဘဲ လုံခြုံရာအရပ်ဒေသများ၌သာနေထိုင်ကြပါရန် ဂန့်ဂေါ(ပအဖ)က သတိပေးနှိုးဆော်ထားသည်။