ကရင်ပြည်နယ် ဝေါ်လေမြို့အနီးက ဥကရစ်ထကျေးရွာမှာ KNLA KNDO ပူးပေါင်းတပ်ဖွဲ့နဲ့ စစ်ကောင်စီတပ်တို့အကြား တိုက်ပွဲတွေ ဆက်လက်ပြင်းထန်နေပြီး စစ်ကောင်စီဘက်က လေကြောင်းကပါတိုက်နေတယ်လို့ ပူးပေါင်းတပ်ဖွဲ့နဲ့ တပ်မဟာ ၆ တာဝန်ရှိသူထံကနေ သိရပါတယ်။
“ဒီနေ့ကတော့ တစ်နေကုန် တိုက်ပွဲဖြစ်နေတယ်လို့ ကြားသိရတယ်။ တိုက်ပွဲတော့ ဆက်ဖြစ်နေတယ်” လို့ တပ်မဟာ ၆ တာဝန်ရှိသူတစ်ဦးက ပြောပါတယ်။
![Public Service Announcement](https://i0.wp.com/www.ludunwayoo.com/wp-content/uploads/2022/01/PSA_inside_Story_Jan22-03.jpg?resize=880%2C229&ssl=1)
တိုက်ပွဲတွေဆက်လက်ပြင်းထန်နေတဲ့အချိန်မှာ ဒီကနေ့ ဇွန် ၂၇ ရက်ညနေ ၄ နာရီအချိန်ခန့်မှာ စစ်ကောင်စီဘက်က လေကြောင်းတိုက်ခိုက်မှုတွေ လုပ်ဆောင်နေတယ်လို့ ပူးပေါင်းအဖွဲ့ဆီကနေ သိရပါတယ်။
![ဝေါ်လေအနီးတိုက်ပွဲပြင်းထန်နေပြီး စစ်ကောင်စီက လေကြောင်းကပါတိုက်နေ](https://i0.wp.com/www.ludunwayoo.com/wp-content/uploads/2022/06/289961205_411216391067819_2508428159749066395_n.jpg?resize=699%2C416&ssl=1)
ကေအဲန်ယူ ဒူးပလာယာခရိုင် တပ်မဟာ ၆ နယ်မြေ ကော့တရီမြို့နယ် မြ၀တီ-ဝေါ်လေ ကားလမ်းမပေါ်မှာရှိတဲ့ စစ်ကောင်စီရဲ့ ဥကရစ်ထတပ်စခန်းကို ဇွန် ၂၆ ရက်နေ့ကစပြီး KNLA KNDO ပူးပေါင်းတပ်ဖွဲ့က ဝင်ရောက်တိုက်ခိုက်ခဲ့လို့ နှစ်ဖက်တိုက်ပွဲတွေပြင်းထန်နေကာ နှစ်ဖက်ထိခိုက်ကျဆုံးမှုတွေလည်း ရှိနေတယ်လို့ သိရပါတယ်။
တိုက်ပွဲကြောင့် ဒေသခံပြည်သူလူထုအများအပြားဟာ ထိုင်းဘက်ခြမ်းကို ထွက်ပြေးတိမ်းရှောင်ခိုလှုံနေရတယ်လို့လည်း ကြားသိရပါသေးတယ်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)