မြန်မာနိုင်ငံအတွက် ကိုဗစ်ကာကွယ်ဆေး အလုံးရေ ၂ သန်းကို တရုတ်အစိုးရဟာ အာဆီယံအထူးကိုယ်စားလှယ် ထံ ပေးအပ်လာတယ်လို့ ကမ္ဘောဒီးယားနိုင်ငံခြားရေးဝန်ကြီးဌာနက သတင်းထုတ်ပြန်ပါတယ်။
ကာကွယ်ဆေးပေးအပ်ပွဲကို ရန်ကုန်မြို့မှာရှိတဲ့ တရုတ်သံအမတ်ကြီးရဲ့နေအိမ်မှာ ဒီနေ့ ပြုလုပ်ခဲ့တာလို့သိရပါတယ်။
မြန်မာနိုင်ငံကိုရောက်နေတဲ့ အာဆီယံအထူးကိုယ်စားလှယ်ဖြစ်သူ ကမ္ဘောဒီးယားနိုင်ငံရေးဝန်ကြီး ပရက်ဆွန်ခွန်ကို မြန်မာနိုင်ငံဆိုင်ရာ တရုတ်သံအမတ်က ကာကွယ်ဆေးပေးအပ်ခဲ့တယ်လို့သိရပါတယ်။
ဒီကာကွယ်ဆေးဟာ ပြီးခဲ့တဲ့ လပိုင်းက ကမ္ဘောဒီးယားနိုင်ငံ ၊ဖနွမ်းပင်မှာကျင်းပခဲ့တဲ့ မြန်မာနိုင်ငံအတွက် လူသားချင်းစာနာထောက်ထားမှုအစီအစဉ်ရဲ့အစိတ်အပိုင်းလည်းဖြစ်ပါတယ်။
တရုတ်က လှူတဲ့ကာကွယ်ဆေးကို သွားလာရေးခက်ခဲတဲ့ နေရာတွေ ထိုးနှံပေးမယ်လို့သိရပါတယ်။ ကာကွယ်ဆေးပေးအပ်ပွဲမှာတော့အာဆီယံအထူးကိုယ်စားလှယ်က လူသားချင်းစာနာထောက်ထား အကူအညီပေးရေးမှာ အရောင်အသွေးမပါသင့်ဘူးလို့ဆိုပါတယ်။
ဒါအပြင် နိုင်ငံရေးမတူကွဲပြားမှုတွေကိုဘေးဖယ်ထားပြီး လူသားချင်းစာနာထောက်ထားမှုခေါင်းစဉ်အောက်ကနေ မြေပြင်မှာ အခြေအနေတိုးတက်အောင်လုပ်သင့်တယ်လို့ပြောပါတယ်။
စစ်ကောင်စီကနေတဆင့်ဖြတ်သန်းသွားမယ့် အာဆီယံ လူသားချင်းစာနာထောက်ထားမှု အစီအစဉ်ဟာ စစ်ကောင်စီကို တရားဝင်အသိအမှတ်ပြုတာနဲ့ စစ်ကောင်စီနယ်မြေစိုးမိုးမှု ပိုရအောင် အားပေးရာရောက်တယ်လို့ဝေဖန်တာတွေလည်းရှိနေပါတယ်။
