ကေအဲန်ယူ-ဒူးသထူခရိုင် တပ်မဟာ ၁ နယ်မြေ ဘီးလင်းမြို့နယ်အတွင်းမှာ စစ်ကောင်စီတပ်ရဲ့ နယ်မြေကျူးကျော်စစ်ရေးလှုပ်ရှားမှု (၁၅)ရက်ကာလအတွင်း ဒေသခံ(၂၀)ကျော်ကို ပေါ်တာနဲ့ လူသားဒိုင်းအဖြစ် ဖမ်းဆီးခေါ်ဆောင်ခဲ့တယ်လို့ ကေအဲန်ယူက သတင်းထုတ်ပြန်ပါတယ်။
စစ်ကောင်စီရဲ့ တပ်မ(၄၄)လက်အောက်ခံတပ်တွေဟာ ပြီးခဲ့တဲ့ ဇွန်လ(၁၇)ရက်ကနေ ဇူလိုင်(၁)ရက်နေ့အထိ ကေအဲန်ယူ-ဘီးလင်းမြို့နယ်ထဲကို နယ်မြေကျူးကျော်စစ်ရေးလှုပ်ရှားမှုပြုလုပ်ခဲ့ပြီး ဒေသခံရွာသား(၂၂)ဦးကို စစ်ကြောင်းတစ်လျှောက် ပေါ်တာထမ်းဖို့နဲ့ လူသားဒိုင်းအဖြစ် အသုံးပြုဖို့ ဖမ်းဆီးခေါ်ဆောင်ခဲ့ကာ လူထုရဲ့ ငွေကြေးနဲ့ပစ္စည်းတွေကို ခိုးယူ၊ စားသုံး၊ ဖျက်ဆီးမှုတွေ ကျူးလွန်ခဲ့ကြတယ်လို့ ထုတ်ပြန်ချက်မှာဖော်ပြထားပါတယ်။
![ဓာတ်ပုံ - KNU](https://i0.wp.com/www.ludunwayoo.com/wp-content/uploads/2022/07/290473961_416027180586740_2220315184477400369_n.jpg?resize=880%2C406&ssl=1)
အဆိုပါစစ်ကောင်စီတပ်မ(၄၄)တပ်ဟာ စစ်ကြောင်းတစ်လျှောက် တွေ့သမျှလူတွေကို ဖမ်းဆီးခေါ်ဆောင်မှုတွေကြောင့် ကော်ဟဲကျေးရွာက အသက်(၁၃)နှစ်အရွယ် ကျောင်းသားကလေးတစ်ဦးအပါအဝင် ဒေါဇံကြီး၊ တောင်လွဲ၊ ကြိုးဝိုင်း၊ ဘောနော်နီ၊ မြစ်ကြိုး၊ မူးဒေး၊ လေးကေ့၊ မော်တိုခီး၊ မင်းစော၊ ကော်ဟဲစတဲ့ ကျေးရွာတွေက ရွာသား (၂၂)ဦးဟာ ဖမ်းဆီးခံခဲ့ရတာပါ။
![ဓာတ်ပုံ - KNU](https://i0.wp.com/www.ludunwayoo.com/wp-content/uploads/2022/07/291471291_416027190586739_1486177226016269912_n.jpg?resize=880%2C406&ssl=1)
စစ်ကောင်စီတပ်က ဒေသခံပြည်သူလူထုပိုင်ဆိုင်တဲ့ ငွေကြေးနဲ့ ပစ္စည်းတန်ဖိုး ငွေကျပ် သိန်း(၈၀)ကျော်အပါအဝင် အိမ်မွေးတိရိစ္ဆာန်တွေ၊ ဆန်ဆီအိုးခွက်ပန်းကန်တွေ၊ အဝတ်အထည်တွေ၊ ဖုန်းနဲ့ အခြားဆက်စပ်ပစ္စည်းမျိုးစုံကို သယ်ဆောင်သွားခဲ့တယ်လို့ ထုတ်ပြန်ချက်မှာပါရှိပါတယ်။
ကေအဲန်ယူ-ဘီးလင်းမြို့နယ်အတွင်း ကျူးကျော်ဝင်ရောက်လာတဲ့ စစ်ကောင်စီတပ်ဟာ တပ်ရင်း(၃)ရင်းပါဝင်တဲ့ တပ်မ(၄၄)လက်အောက်ခံတပ်လို့သိရပြီး နယ်မြေခံ KNLA KNDO ပူးပေါင်းတပ်တွေနဲ့ ထိတွေ့ပစ်ခတ်မှု ၈ ကြိမ်တိတိရှိခဲ့ကာ စစ်ကောင်စီရဲ့လက်နက်ကြီးပစ်ခတ်မှုတွေကြောင့် လူနေအိမ်(၈)လုံး ထိမှန်ပျက်စီးသွားခဲ့တယ်လို့ ကေအဲန်ယူရဲ့ထုတ်ပြန်ချက်အရ သိရပါတယ်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)