ကေအဲန်ယူ-ဒူးပလာယာခရိုင် တပ်မဟာ ၆ နယ်မြေဖြစ်တဲ့ မြ၀တီ-ဝေါ်လေ ကားလမ်းပေါ်က သုံးထပ်ကွေ့နဲ့ သရက်တစ်ပင်ရွာကြားမှာ ဒီကနေ့မနက်ပိုင်းက စစ်ကောင်စီတပ်နဲ့ ကော်ဘရာစစ်ကြောင်းတို့အကြား ဖြစ်ပွားခဲ့တဲ့တိုက်ပွဲမှာ စစ်ကောင်စီဘက်က တပ်ရင်းဖွဲ့စည်းပုံပျက်တဲ့အထိ ထိခိုက်သေဆုံးမှုတွေများပြားခဲ့တယ်လို့ ကော်ဘရာစစ်ကြောင်းက သတင်းထုတ်ပြန်ထားပါတယ်။
ဒီကနေ့ ဇူလိုင်(၁၂)ရက် မနက်(၈)နာရီအချိန်ခန့်က မြ၀တီ-ဝေါ်လေ ကားလမ်းပေါ်က သုံးထပ်ကွေ့နဲ့ သရက်တစ်ပင်ရွာကြားမှာ စစ်ကောင်စီရဲ့ တပ်မ(၄၄)လက်အောက်ခံ ခလရ(၈)တပ်နဲ့ ကော်ဘရာစစ်ကြောင်းတို့အကြား တိုက်ပွဲဖြစ်ပွားခဲ့ပြီး စစ်ကောင်စီဘက်က တပ်ရင်းမှူး၊ ဒုရင်းမှူးအဆင့်ရှိသူတွေအပါအဝင် အရာရှိတွေ၊ တပ်သားတွေ အများအပြားသေဆုံးခဲ့ကာ တပ်ရင်းဖွဲ့စည်းပုံပျက်တဲ့အထိ သေကြေပျက်စီးဒဏ်ရာတွေ ရရှိခဲ့တယ်လို့ ကော်ဘရာစစ်ကြောင်းက ဆိုပါတယ်။
ကော်ဘရာစစ်ကြောင်းဘက်ကတော့ သုံးဦးသာ ဒဏ်ရာအနည်းငယ်ရရှိခဲ့ပြီး နယ်မြေရှင်းလင်းမှုတွေ ပြုလုပ်နေဆဲဖြစ်တယ်လို့ ထုတ်ပြန်ချက်ထဲမှာဖော်ပြထားပါတယ်။
ကော်ဘရာစစ်ကြောင်းက နယ်မြေရှင်းလင်းမှုပြုလုပ်စဉ်အတွင်း စစ်ကောင်စီရဲ့ လက်နက်ခဲယမ်းအသုံးအဆောင်ပစ္စည်း အမြောက်အများကို သိမ်းဆည်းရမိခဲ့တယ်လို့ ကော်ဘရာစစ်ကြောင်းရဲ့ ထုတ်ပြန်ထားချက်အရ သိရပါတယ်။
