စစ်ကိုင်းတိုင်း၊ ဒီပဲယင်းမြို့နယ်တွင် အကြမ်းဖက်စစ်ကောင်စီတပ်က ဆက်တိုက်စစ်ကြောင်းထိုးနေ၍ ကျေးရွာများမှ ဒေသခံပြည်သူများ ဘေးလွတ်ရာကို ထွက်ပြေးတိမ်းရှောင်နေရကြောင်း ဒေသတွင်းသတင်းရင်းမြစ်များက ပြောသည်။
ရေဦးမြို့နယ်အတွင်းရှိ မူးသာကုန်းရွာ၊ မန်းကျီးစောက်ရွာ၊ အုံးတင်ရွာ၊ ပျံကျ(အေးသာယာ)ရွာ၊ ကြခတ်ရွာ၊ နဘဲလှ ပုဂံရွာ၊ ပေါက်တောရွာ၊ အုန်းတပင်ရွာနှင့် တနယ်ကျေးရွာတို့အား စစ်ကြောင်းထိုးနေ၍ ဒေသခံရွာသူ၊ရွာသားများမှာ ထွက်ပြေးတိမ်းရှောင်နေရခြင်း ဖြစ်သည်။
ယခုအခါ ဒီပဲယင်းမြို့နယ် အရှေ့ခြမ်းရှိ တနယ်ရွာတွင် တပ်စွဲထားသော စစ်ကောင်စီတပ်စစ်ကြောင်းတစ်ကြောင်းနှင့် ရေဦး – ဒီပဲယင်းနယ်စပ်ရှိ မူးသာကုန်းရွာမှ စစ်ကြောင်းတစ်ကြောင်းတို့မှာ နှစ်ဖက်ညှပ်ကာ ထိုးစစ်ဆင်မည့်အနေအထားရှိနေကြောင်း၊ ဒီပဲယင်းမြို့နယ်အရှေ့ခြမ်းတွင် စစ်ဘေးရှောင်ဦးရေများတိုးပွားလာလျက်ရှိကာ ကူညီထောက်ပံ့နိုင်ရန် အခက်အခဲများ ကြုံတွေ့နေရကြောင်း ဒီပဲယင်းမြို့နယ် စစ်ရှောင်ထောက်ပံ့ရေးအဖွဲ့က အသိပေးသည်။
ဒီပဲယင်းမြို့နယ် အရှေ့ခြမ်းတွင် စစ်ဘေးရှောင်ဦးရေ ၁,၅၀၀ခန့်ရှိသော Campတစ်ခုအတွက် အဖွဲ့က စုဆောင်းထားရှိခဲ့သော ဆန်၊ဆီ၊ဆား၊ငါးခြောက်၊ကြက်သွန်ရိက္ခာများ ၊ ဟင်းသီ းဟင်းရွက်များ တတ်စွမ်းသရွေ့ကူညီထောက်ပံ့လျက်ရှိသည်ဟု ဒီပဲယင်းမြို့နယ် စစ်ရှောင်ထောက်ပံ့ရေးအဖွဲ့က ပြောသည်။
လက်ရှိ ဒီပဲယင်းမြို့နယ်အရှေ့ခြမ်းတွင် စစ်ဘေးရှောင်ဦးရေ ၅,၀၀၀ အထက်ရှိနေသည်။
ယနေ့ည ၇နာရီခန့်က ဒီပဲယင်းမြို့နယ်၊ တနယ်ရွာတွင် တပ်စွဲထားသော အကြမ်းဖက်စစ်ကောင်စီတပ်သည် တနယ်ရွာကို မီးတင်ရှို့နေကြောင်း ဒေသခံများက ပြောသည်။
