ပဲခူးတိုင်း၊ ကရင်ပြည်နယ်နှင့် နေပြည်တော်ကောင်စီနယ် မြေ စသည့်ဒေသသုံးခု၏ နယ်စပ်ဒေသတစ်လျှောက်တွင် တိုက်ပွဲများဆက်တိုက်ဖြစ်ပွားနေပြီး တိုက်ပွဲပြင်း ထန်နေကြောင်း ပြည်သူ့ကာကွယ်ရေးတပ်မတော် (နေပြည်တော်) တပ်ရင်း (၈၀၂)က ပြောသည်။
အဆိုပါနယ်စပ်ဒေသအနီး သံတောင်ကြီးမြို့နယ်ဘက်မှ ကျေးရွာများသို့ အကြမ်းဖက်စစ်ကောင်စီတပ်က အင်အား ၁၀၀ဝန်းကျင်ဖြင့် စစ်ကြောင်းထိုးနေခြင်းဖြစ်ပြီး ယင်းစစ်ကြောင်း တပ်ရင်း (၈၀၂)နှင့် ဒေသကာ ကွယ်ရေးမဟာမိတ်ပူးပေါင်းတပ်များက ခုခံတိုက်ခိုက်နေခြင်း ဖြစ်သည်။
ထိတွေ့တိုက်ပွဲများမှာ ဇူလိုင် ၁၄ ရက်မှစပြီး ယနေ့ (ဇူလိုင် ၁၈)ရက်အထိ ၅ ရက်ဆက်တိုက်ဖြစ်ပွားခဲ့ရာ အကြမ်းဖက်စစ်ကောင်စီတပ်မှ တပ်ရင်းမှူးတစ်ဦးအပါအဝင် ၂၀ ကျော်သေဆုံးပြီး ပြည်သူ့ကာကွယ်ရေးတပ်ဖွဲ့များဘက်မှ ရဲဘော်တစ်ဦးကျဆုံးကာ တစ်ဦးပျောက်ဆုံးနေပြီး အဆက်အသွယ်ပြတ်တောက်လျှက်ရှိကြောင်း တပ်ရင်း (၈၀၂)က ပြောသည်။
“ဒီမနက်ပိုင်းမှာဆိုရင်လည်း မိအီကြီးကျေးရွာကို ခွေးတွေက မီးဝင်ရှို့နေလို့ တစ်ဖက်နဲ့တစ်ဖက် ပစ်ခတ်လျှက်ရှိနေပါတယ်”ဟု နေပြည်တော် PDFတပ်ရင်း (၈၀၂)မှ တာဝန်ရှိသူက လူထုနွေဦးသို့ ပြောသည်။
လက်ရှိတွင် အကြမ်းဖက်စစ်ကောင်စီတပ်ဘက်မှ တိုက်ပွဲဖြစ်ပွားနေသည့်ကျေးရွာများဘက်သို့ စစ်ကား ၁၀ စီးခန့်ဖြင့် အင်အားထပ်မံဖြည့်တင်းရန် ပြင်ဆင်လျှက်ရှိရာ သုံးစီးမှာ ကြာပင်ရွာသို့ရောက်ရှိနေပြီး ကားဖြင့်တိုက်ရိုက်ဝင်လာမည်ဆိုပါက မိအီကြီးသို့ နာရီဝက်ခန့်အတွင်း ရောက်လာနိုင်သည်ဟု မှန်းဆကြောင်း ၎င်းက ရှင်းပြသည်။
အထက်ပါ တိုက်ပွဲများအတွင်း ဇူလိုင် ၁၄ ရက်က စုစည်းရွာအနီး တိုက်ပွဲတွင် ပြည်သူ့ကာကွယ်ရေးတပ်ဖွဲ့ (နေပြည်တော်)၏ ရိက္ခာတဲနှင့် ဒေသခံပြည်သူများ၏ တဲအိမ်အချို့ကို စစ်ကောင်စီတပ်က မီးရှို့ဖျက်ဆီးခဲ့၍ ဆုံးရှုံးခဲ့သည်။
