ဒီမိုကရေစီအရေးလှုပ်ရှားသူတွေကို တရားမဲ့သေဒဏ်စီရင်လိုက်တဲ့ လုပ်ရပ်ဟာ မင်းအောင်လှိုင်ရဲ့ ကြမ်းကြုတ်မှုတွေ ကို မည်သူမျှ သံတမန် နည်းလမ်းနဲ့ထိန်းချုပ်နိုင်မှာမဟုတ်ကြောင်း ဖော်ပြနေတာလို့ မြန်မာနိုင်ငံဆိုင်ရာ အထူးအကြံပေးကောင်စီ (SAC-M) ကသတိပေးလိုက်ပါတယ်။
ကုလသမဂ္ဂနဲ့ အာဆီယံအနေနဲ့ မြန်မာနိုင်ငံသားတွေအပေါ် ရှက်ဖွယ်ကောင်းတဲ့ တာဝန်မကျေပွန်မှုတွေကို ရပ်တန့်ကာ စစ်အာဏာရှင်ကို တိကျသေချာတဲ့အရေးယူမှုတွေ ပြုလုပ်သင့်တယ်လို့ SAC− M က တွန်းအားပေးလိုက်ပါတယ်။
![ကုလနဲ့အာဆီယံဟာ မြန်မာပြည်သူတွေအပေါ် တာဝန်မကျေဘူးလို့ SAC-M ထုတ်ပြော](https://i0.wp.com/www.ludunwayoo.com/wp-content/uploads/2022/08/296342867_435966535259471_3533006665257495531_n.jpg?resize=600%2C600&ssl=1)
နိုင်ငံတကာအသိုင်းအဝိုင်းအနေနဲ့လည်း ရှက်ဖွယ်ကောင်းလောက်အောင်ပင် စစ်အာဏာရှင်ရဲ့ အလွန်ဆိုးရွားပြီး အရှိန်မြင့်လုပ်ဆောင်နေတဲ့ အကြမ်းဖက်မှုတွေကနေ မြန်မာနိုင်ငံသားတွေကို ကာကွယ်ပေးနိုင်ခြင်းမရှိကြောင်း SAC-M က ထောက်ပြထားပါသေးတယ်။
ကုလသမဂ္ဂအဖွဲ့ဝင်နိုင်ငံတွေအနေနဲ့ NUG အစိုးရ ကို တရားဝင်အသိအမှတ်ပြု ဖို့နှောင့်နှေးကြန့်ကြာနေတယ်လို့ SAC-M ကဆိုပါတယ်။
ကုလလုံခြုံရေးကောင်စီဆိုရင်လည်း မြန်မာနိုင်ငံအတွက် အဆိုပြုချက်တစ်ခုကိုပင် ဆွေးနွေးဆုံးဖြတ်နိုင်ခြင်းမရှိသေးဘူးလို့ SAC-M က ပြောပါသေးတယ်။
SAC-M အနေနဲ့ NUG ကို အသိအမှတ်ပြုဖို့ ကုလသမဂ္ဂအဖွဲ့ဝင် နိုင်ငံတွေအားလုံးကို တိုက်တွန်းလိုပြီး ကုလသမဂ္ဂလုံခြုံရေးကောင်စီဟာလည်း မြန်မာနိုင်ငံရဲ့အခြေအနေနဲ့ပတ်သက်ပြီး နိုင်ငံတကာ ရာဇဝတ်ခုံရုံးကို တင်သွင်းမယ့် ဆုံးဖြတ်ချက်ကိုချသင့်တယ်လို့အကြံပြုထားတာတွေ့ရပါတယ်။
SAC-M ကို ကုလသမဂ္ဂရေးရာကျွမ်းကျင်သူတွေနဲ့ဖွဲ့စည်းထားတာပါ။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)