စစ်ကိုင်းတိုင်း ကသာခရိုင် ဗန်းမောက်မြို့နယ်အတွင်း စစ်ကြောင်းထိုး ဝင်ရောက်လာသည့် စစ်ကောင်စီတပ်ကို ယမန်နေ့ညက တိုက်ခိုက်ခဲ့ရာ စစ်ကောင်စီတပ်မှ သေဆုံးထိခိုက်များ နိုင်သည်ဟု Banmauk Revolutionက ဖော်ပြသည်။
ဩဂုတ် ၂ရက် ည ၁၀နာရီတွင် ဗန်းမောက်မြို့နယ် ကျွဲကောကြီးကျေးရွာနှင့် ဆင်ကန်ရွာကြား စစ်ကြောင်းထိုးနေသော စစ်ကောင်စီတပ်သားများအား ဗန်းမောက်မြို့နယ်ကာကွယ်ရေးတပ်ဖွဲ့များမှ ထိထိမိမိ မိုင်းဆွဲနိုင်ခဲ့ခြင်း ဖြစ်သည်ဟု ဆိုသည်။
အဆိုပါတိုက်ခိုက်မှုကြောင့် စစ်ကောင်စီတပ်မှ အသေအပျောက်နှင့် ဒဏ်ရာရသူ အများအပြားရှိ ကြောင်းသိရသည်ဟု ဖော်ပြထားသည်။
ကာကွယ်ရေးတပ်များမှ ရဲဘော်များ အထိအခိုက်မရှိ ဆုတ်ခွာနိုင်ခဲ့ပြီး ညအချိန်ဖြစ်သည့်အတွက် စစ်ကောင်စီတပ်များ ထိခိုက်သေဆုံးမှုအရေအတွက် ကို အတိအကျ မသိရှိကြောင်း ဖော်ပြသည်။
အဆိုပါဒေသတွင် စစ်ကောင်စီတပ်ကို ကချင်လွတ်လပ်ရေးတပ်မတော်(KIA)နှင့် ဒေသခံ ပြည်သူ့ကာကွယ်ရေးတပ်(PDF)များ ပူးပေါင်းပြီး စစ်ကောင်စီတပ်ကို တိုက်ခိုက်ခဲ့ရာ ဇူလိုင်အတွင်းက ဗန်းမောက်တောင်ပိုင်း၌ တိုက်ပွဲများ မကြာခဏဖြစ်ခဲ့ပြီး စစ်ကောင်စီတပ်က အထိနာခဲ့သည်။
