စစ်ကောင်စီတပ် ထိခိုက်သေဆုံးမှုများဟုဆို
စစ်ကိုင်းတိုင်း၊ မော်လူးမြို့နယ်မှ နန့်စီးအောင် ကျေးရွာသို့ တက်လာသည့် စစ်ကောင်စီစစ်ကြောင်း နှစ်ခုကို KIA နှင့် PDF ပူးပေါင်း တိုက်ခိုက်ရာ သေဆုံး ထိခိုက်သူများပြားကြောင်း Inndaw Revolution IR က ထုတ်ပြန်သည်။
ယနေ့(သြဂုတ် ၆ ရက်) နံနက် ၉နာရီခန့်တွင်အင်းတော်မြို့နယ်၊ မော်လူးမြို့ဘက်မှ မိုးညှင်း မြို့နယ် နန့်စီးအောင်ရွာဘက်သို့ စစ်ကောင်စီတပ် က အင်အား ၇၀ခန့်ဖြင့် စစ်ကြောင်းနှစ်ခုခွဲ၍ တက်လာသည်ဟု ဆိုသည်။
“မြေပြင် သတင်းအရစစ်ကြောင်းတစ်ခုက မိုင်းကွင်းထဲတည့်တည့်ဝင်သွားတယ်။ စုစုပေါင်း မိုင်းငါးလုံးဆွဲတယ်။စခ သုံးဦးက နေရာမှာတင်ပွဲ ချင်းပြီးတယ်။ထပ်ပြီးသေနိုင်တဲ့သူတွေလည်းရှိတယ်ဲ။ ဒဏ်ရာရတဲ့သူများတယ်”ဟု IR က လူထုနွေဦးသို့ ပြောသည်။
သေဆုံးသွားသည့် စစ်ကောင်စီတပ်သားများကို မိုးညှင်းမြို့ဘက်သို့ သယ်ဆောင်သွားပြီး ဒဏ်ရာ ရသူများကို နန့်စီးအောင်၌ တပ်စွဲကုသပေးနေသည်ဟုလည်း အသိပေးသည်။
အဆိုပါစစ်ကြောင်းသည် မံဟဲ၊ နီပလ္လင်၊ ဟောင်တုံစသည့် ကျေးရွာများမှ ပြည်သူ (၃၀)ဦးခန့်အား လူသားဒိုင်းအဖြစ်ဖမ်းခေါ်သွားပြီး နန့်စီအောင်သို့ရောက်ချိန်တွင် ပြန်လွှတ်ပေးလိုက်ကြောင်း IR Team ထံမှ သိရသည်။
နန့်စီအောင်ဘက်တက်မည့် စစ်ကောင်စီတပ်စစ်ကြောင်းအား မိုင်းဆွဲတိုက်ခိုက်ခဲ့သည့် ရထားလမ်းပိုင်းသည် အင်းတော် – ဗန်းမောက်လမ်းပိုင်းနှင့် အပြိုင်တည်းရှိပြီး ခန့်မှန်း နှစ်ဖာလုံခန့်သာဝေးသည်။
စစ်ကိုင်းတိုင်းအထက်ပိုင်းရှိ အင်းတော်မြို့နယ် နှင့်အနီးတစ်ဝိုက်တွင် ဇူလိုင်နောက်ဆုံးပတ်ကစ၍ နေ့စဥ်တိုက်ပွဲများ ဖြစ်ပွားနေပြီး စစ်ကောင်စီဘက်မှ အင်အားတိုး၍ စစ်ကြောင်းထိုး လျှက်ရှိသည်။
ထို့ကြောင့် အင်းတော်-ဗန်းမောက်လမ်းပိုင်း အသုံးပြုရာတွင်လိုက်နာရမည့်စည်းကမ်းချက်များအား အင်းတော် PDF က ဩဂုတ်၅ ရက် တွင် ထုတ်ပြန်ထားသည်။
ထို့အပြင် ကုန်ကားများ မိုးကာအုပ်မမောင်းရန်၊အိမ်စီး ကား၊နာရေးကားများနှင့် ဘုန်းကြီးကားများ မှန်ချမောင်းနှင်ရန်၊ကားများ ညအချိန်မောင်းနှင်မည်ဆိုပါက ရှေ့မီးချမောင်းရန်၊ကား၊ဆိုင်ကယ်၊သုံးဘီး စသည့် မည်သည့်ယာဥ်မဆို စစ်ဆေးပါက စစ်ဆေးမှုခံရမည်ဟု ထုတ်ပြန်ထားသည်။
ခရီးသည်ကား၊ဘုန်းကြီးကား၊နာရေးကားပါမကျန် စစ်ကောင်စီနှင့်ပတ်သက်သော ပစ္စည်းများပါလာပါက ယာဥ်လိုင်း၊ယာဥ်မောင်းနှင့် ခရီးသယ်များမကျန် အရေးယူခံရမည်ဟု သတိပေး သည်။
