မြဝတီမှာ ဇာတ်ကားရိုက်လို့မပြီး​​သေးဘူး

​ဒီပ/People’s Spring

“ ဟန်ပြ ဇာတ်ကားရိုက်​နေတာ မပြီးကြ​သေးဘူး” စစ်တပ် နဲ့ ကရင်နယ်ခြား​စောင့်တပ်(BGF)တို့က မြဝတီမြို့အနီးဝန်းကျင်မှာ ကျားဖြန့်တိုက်ဖျက်​ရေးလုပ်​နေတယ်ဆိုပြီး တိုက်​တွေဖြိုလိုက်၊ကွန်ပျူတာနဲ့ ဖုန်း​တွေကိုလမ်းကြိတ်စက်နဲ့ ကြိတ်လိုက် ၊မီး​တွေရှို့လိုက်လုပ်​နေတဲ့အ​ပေါ် ​​ဒေသခံတဦးက​ပြောလိုက်ပါတယ်။

စစ်တပ်ရဲ့အကျင့်ကို သိ​နေတဲ့ ပြည်သူ​တွေအတွက်စစ်အုပ်စုဝါဒဖြန့်​နေမှု​တွေအ​ပေါ် စိတ်မဝင်စားကြတာ​ တွေ့ရပါတယ်။ ဒါ​ပေမယ့် စစ်အုပ်စုကျားဖြန့်တိုက်ဖျက်​ရေး ဟန်ပြဇာတ်ကားရိုက်​နေတာရဲ့​နောက်ကွယ် ​မြေပြင်ဖြစ်ပျက်​နေတာ​တွေက သတိထားစရာအချက်​တွေရှိ​နေပါတယ် ။

■စစ်အုပ်စုနဲ့ မဟာမိတ်​တွေ ​ငွေရှာ​ကောင်း​နေ

ကျားဖြန့်တိုက်ဖျက်​ရေး​ခေါင်းစပ်တပ်ပြီး သက်​သေခံပစ္စည်း​တွေ​ဖျောက်​နေကြမှာ ​​​စစ်တပ်လက်​အောက်ခံ အုပ်ကြီး​တွေ ၊ရဲ​တွေ ၊ပျူ​စောထီး​တွေကစပြီး BGF ၊ DKBA တို့ဟာ​ ကျားဖြန့်လုပ်တဲ့သူ​တွေဆီက ​ငွေညှစ်လို့​ကောင်း​နေကြတယ်လို့​ဒေသခံ​တွေက​ပြောပါတယ် ။

ဒီထဲက ဖြစ်ရပ်တစ်ခု​ပြောပြပါမယ်။

နိုဝင်ဘာ ၂၇ ရက်က မြဝတီမြို့ ၊အမှတ်(၄)ရပ်ကွက်က စစ်တပ်ချိတ်ပိတ်ထားတဲ့အိမ်တစ်လုံးကို စစ်သား​တွေ၊ရဲ​တွေ၊အုပ်ကြီး၊ပျူ၊ BGF ၊DKBA ပူး​ပေါင်းအဖွဲ့က ကျားဖြန့်လုပ်သူ​တွေရှိတယ်ဆိုပြီး ဖမ်းဆီးပြပါတယ်။ဒီအိမ်က စစ်တပ်အာဏာသိမ်းကတည်းက စစ်တပ်ကိုဆန့်ကျင်ပြီး ​တော်လှန်​ရေးမှာပါဝင်​နေတဲ့ ​အေ​အေစီကိုရဲမင်းရဲ့အိမ်ပါ။

သူ့အိမ်ကိုစစ်တပ်က ချိတ်ပိတ်ပြီး DKBA ကအရာရှိနဲ့ အမှတ် (၄)ရပ်ကွက်အုပ်ကြီး​​တွေ​ပေါင်းပြီးကျားဖြန့်လုပ်တဲ့တရုတ်နိုင်ငံသား ၃၀ ​ကျော်ကို​ငွေယူပြီးထားတာပါ။ တခါ သူတို့ကပါ ကျားဖြန့်တိုက်ဖျက်​ရေးအတွက် ပတ်ဝန်းကျင်ကတိုင်လို့ဖမ်းတဲ့ပုံစံနဲ့ ပြန်ဖမ်းတာဖြစ်ပါတယ် ။တရုတ်နိုင်ငံသားအမျိုးသား ၃၁ ဦး၊ စကားပြန်အပါအဝင် အမျိုးသမီး ၃ ဦးပါတဲ့ အုပ်စုဟာ နိုဝင်ဘာ ၂၇ ရက်ညမှအဖမ်းခံရပြီး သူတို့ရဲ့ပိုက်ဆံ​တွေ ၊ဖုန်း​တွေ ၊တန်ဖိုးရှိသမျှအကုန်လုံးကို စစ်တပ် လက်​အောက်ခံ​တွေက ခွဲ​ဝေယူလိုက်ကြတယ်လို့ ဖြစ်စဥ်သိသူတချို့က​ပြောပါတယ် ။သက်​သေခံအ​နေ နဲ့ ပစ္စည်းနည်းနည်းကိုပဲ ရဲစခန်းကိုအပ်တာလို့ဆိုပါတယ် ။

ဒီတင်မပြီး​သေးပါဘူး။ အဲဒီတရုတ်​တွေကိုပဲ ကျားဖြန့်လုပ်တာမှာကျွမ်းကျင်သူ​တွေ မလို့တခြားကျားဖြန့်ရုံ​တွေမှာ ခိုင်းဖို့ ဆိုပြီး စစ်တပ်လက်​အောက်ခံ လက်နက်ကိုင်အဖွဲ့​တွေက ၁ ဦးကိုဘတ် ၅ သိန်း၊ ၆ သိန်း (ကျပ်သိန်း ၆၀၀ ​ကျော်မှ ကျပ်သိန်း ၇၀၀ ​ကျော်)နဲ့ပြန်​ရောင်းကြပြန်တယ်လို့​ဒေသခံအချို့က​ပြောပါတယ် ။

စစ်အုပ်စုက အိမ်ကိုချိတ်ပိတ်တဲ့အပြင် အမည်ဆိုးနဲ့​ကျော်ကြားတဲ့ကျားဖြန့်​တွေကို အိမ်​ပေါ်ထားတဲ့လုပ်ရပ်က နှစ်ထပ်ကွမ်းရင်နာရတယ်လို့ ​အေ​အေစီကိုရဲမင်းက​ပြောပါတယ်။

“ ကျွန်​တော်တို့​တွေ အိမ်ကိုပစ်ပြီး​ပြေးခဲ့ရတယ် ။ကျွန်​တော်တို့အိမ်​လေး​တွေ ချိတ်ပိတ်ခံရတယ်။အဲဒီချိတ်ပိတ်ထားတဲ့အိမ်မှာပါထပ်ပြီး​တော့ လူလိမ်ကျားဖြန့်​တွေထပ်ထားပြီး​တော့ သူတို့ ဒီလိုရုပ်ရှင်ရိုက်ပြတဲ့အကွက် မျိုး​တွေက ကျွန်​တော်တို့ရင်​တွေ နှစ်ထပ်ကွမ်းနာရတယ်” လို့ ​အေ​အေစီကိုရဲမင်းက People’s Spring က​ပြောပါတယ်။

အခုဆိုရင်ကျားဖြန့်​လုပ်သူ​တွေက ကရင်ပြည်နယ်တင်မကပဲ တခြား​ဒေသ​တွေကိုပါထွက်​ပြေး​၊ပျံ့နှံ့​သွားပြီဖြစ်ပါတယ်။ဒါ​ကြောင့်ကျန်​​ဒေသ​တွေမှာလည်းသူလို ချိတ်ပိတ်ခံရတဲ့သူ​တွေရဲ့အိမ်​တွေ​ပေါ် စစ်အုပ်စုကကျားဖြန့်​တွေထားနိုင်တယ်အလားအလာ​တွေရှိ​နေပြီလို့သူကဆက်​ပြောပါတယ်။

●မြဝတီက​နေ ရန်ကုန် တရုတ် ၁ဦး သိန်း ၁၅၀ ထိ​ပေါက်

ကရင်ပြည်နယ်မှာ အရင်လိုအ​ခြေအ​နေ သိပ်မ​ကောင်း​တော့လို့ ရန်ကုန်ဘက်ကိုသွားချင်တဲ့ တရုတ် ၁ ဦးဆိုရင် ပို့​ဆောင်ခ ကျပ်သိန်း ၁၅၀ ​အထိ​ပေါက်တယ်လို့ မြဝတီ ​ဒေသခံအချို့က​ပြောပါတယ် ။ ဘယ်သူ​တွေက ပို့​​ပေး​နေလဲ ဆိုရင် စစ်တပ်နဲ့ နီးစပ်သူ​တွေ နဲ့ DKBA၊BGF ​တပ်ဖွဲဝင်​တွေကပဲ ပို့​ပေးတာလို့ ​ဒေသခံအချို့က​ပြောပါတယ်။

မြဝတီမြို့အနီးက ကျားဖြန့် လုပ်တဲ့​​နေရာ​တွေကို ဟန်ပြ နှိမ်နင်းပြတာမှာ ကျားဖြန့်လုပ်တဲ့ တရုတ်​တွေဟာ ရန်ကုန် ၊ဘားအံ့၊ဘုရားသုံးဆူ အပြင်​နေရာစုံကိုသွားကြတယ်လို့ ​ဒေသခံအချို့က​ပြောပါတယ်။ဒါအပြင် ကျားဖြန့်ရုံအသစ်​တွေကို စစ်တပ်လက်​အောက်ခံ လက်နက်ကိုင်အဖွဲ့​တွေက ​နွေ​ရော၊ညပါအမြန်တည်​ဆောက်​နေပြီး ​နေရာ​ပြောင်းလုပ်ငန်းလည်ပတ်ဖို့လုပ်​နေတာလည်း မနည်းမ​နေရှိ​နေတယ်လို့ စုံစမ်းသိရပါတယ်။

DKBA အကာအကွယ်​ပေးထားတဲ့ မင်းလက်ပံ(ဖလူး)​ဒေသက ကျားဖြန့်ခြံဝန်းကို KNU/KNLA ဖမ်းဆီးခဲ့စဥ်တုန်းကလည်း ဖမ်းရတဲ့ ကျားဖြန့်လုပ်တဲ့တရုတ်​နိုင်ငံသား​တွေဟာ ထိုင်းနိုင်ငံဘက်ကိုလွှဲ​ပြောင်းမ​ပေးဖို့ ၊မြန်မာနိုင်ငံတွင်းကို ပို့​ပေးရင်း ပိုက်ဆံ​ပေးမယ်ဆိုပြီး ​ပြောတယ်လို့ KNU ကထုတ်ပြန်ခဲ့ပါတယ် ။ ​တရုတ်အပါအဝင်နိုင်ငံစုံက လူ နှစ်​ထောင်​ကျော်ကို ​ဘေးကင်း​အောင်လွှဲ​ပြောင်းပြီးချိန်မှာလည်း လူ ၉၀၀ ​ကျော်ကမပြန်ချင်ပဲ အခြားကျားဖြန့်လုပ်ငန်း​တွေမှာသွားလုပ်ချင်​နေကြတယ်လို့ KNU ကအသိ​ပေးခဲ့ပါတယ်။အဲဒီ၉၀၀ ​ကျော်မှာ အားလုံးနီးပါးကလည်း တရုတ်နိုင်ငံသား​တွေဖြစ်ပါတယ် ။

●​ကျားဖြန့် ​အောက်​ခြေဝန်ထမ်း​တွေကို စစ်တပ်က​နေပြည်​တော်ပို့ဖို့စီစဥ်

ဒါ့အပြင် စစ်အုပ်စုက KK Park ၊ ​ရွှေကုက္ကိုလ်မှာကျားဖြန့်အဓိက လုပ်ကိုင်​နေသူ​တွေဆိုပြီး တရုတ်နိုင်ငံသား ၈၀ ​လောက်ကို ​နေပြည်​တော်ကိုပို့ဖို့စီစဥ်​နေတယ်လို့ သိရပါတယ်။ တကယ်​တော့ အဲဒီဖမ်းဆီးထားသူ​တွေထဲမှာ ကျားဖြန့်လုပ်ငန်း​တွေကို အဓိက ကြိုးကိုင်​နေသူ​တွေမပါပဲ ​အောက်​ခြေအဆင့်ဝန်ထမ်း​တွေ ၊မလည်မဝယ်​တွေသာဖြစ်တယ်လို့ ဖြစ်စဥ်ကိုသိသူအချို့က​ပြောပါတယ်။

“ ​အ​ယောင်ပြ နေပြည်​တော် ပို့မယ့် အ​ယောက် ၈၀ ကလည်းကျားဖြန့်​တော့ကျားဖြန့်ပဲ ထမင်းချက်၊ဟင်းချက် မလည်မဝယ်​တွေများတယ်” လို့ အမည်မ​ဖော်လို့တဲ့သတင်းရင်းမြစ်တဦးက​ပြောပါတယ်။

တကယ်​ငွေ​ကြေးတက်နိုင်တဲ့ ကျားဖြန့်လုပ်ငန်းကတာဝန်ရှိသူ​တွေကို စစ်တပ်လက်​အောက်ခံလက်နက်ကိုင်အဖွဲ့​တွေက ​ငွေအများကြီးယူပြီး ​အ​စောင့်အ​ရှောက်နဲ့ ဘေးလွတ်ရာကြိုပို့၊​ပြောင်း​ရွေ့ပြီးဖြစ်တယ်လို့ သူကထက်​ပြောပါတယ်။

ဒါ​တောင် ​နေပြည်​တော်ကို ပို့မယ်ဆိုပြီး ဖမ်းဆီးထားတဲ့ တရုတ် နိုင်ငံသား ၈၀ ထဲက သုံးဦးကို နိုဝင်ဘာ ၂၇ ရက်မှာ စစ်တပ်လက်​အောက်ခံလက်နက်ကိုင် အဖွဲ့ ၁ ဖွဲ့က ၁ ဦးကို ဘတ် တစ်သန်းခွဲ​ပေးပြီး ထုတ်သွားတယ်လို့ ဖြစ်စဥ်ကိုသိသူတဦးက​ပြောပါတယ် ။

■​သူခိုးလက်က သူဝှက်လု

ဒါ​ကြောင့် ကျားဖြန့်ရုံ​တွေထဲက​ငွေတက်နိုင်တဲ့ တရုတ်​တွေဟာ စစ်အုပ်စု နဲ့ စစ်တပ်လက်​အောက်ခံ ရဲ​တွေ ၊ပျူ​တွေ ၊အုပ်ကြီး​တွေ ၊စစ်တပ်မဟာမိတ်လက်နက်ကိုင်အဖွဲ့​တွေရဲ့ ​ငွေညှစ်ဖို့ အဓိက ပစ်မှတ်ဖြစ်​နေပါတယ် ။

“ မြဝတီမှာဘယ်လိုဖြစ်​နေလဲ ဆို ​ငွေရှိလို့ ဟိုတယ်၊တည်းခိုးခန်း တည်းတဲ့ တရုတ်​တွေဆိုရင် ရဲ​တွေ​ရော၊ပျူ​တွေ​ရော ၊အုပ်ကြီး​တွေ​ရော၊ BGF နဲ့ DKBA ​ရောကဖမ်းပြီး​ငွေ​တောင်းတယ်။ ​ငွေမရှိလို့ လမ်း​ဘေးမှာပဲ ​နေရတဲ့တရုတ်ဆိုရင် မဖမ်းဘူး။အဲလိုအထား​တွေရှိတယ် ။ကုလား ( ​​သတင်း​​ပေးသူ​ပြောတဲ့အသုံးအနှုန်းတိုင်း​ရေးထားခြင်းဖြစ်ပါတယ်) ​တွေဆိုမဖမ်းဘူး သူတို့မှာ ပိုက်ဆံမရှိမှန်းသိကြတယ်” လို့ ​ဒေသခံတဦးက​ပြောပါတယ်။

ဒါ​ကြောင့် ကမ္ဘာတစ်ဝန်းကပြည်သူ​တွေကို လိမ်ပြီး ​ငွေယူ​နေတဲ့ကျားဖြန့် တရုတ်​တွေဟာ ကျားဖြန့်နှိမ်နင်း​ရေး အ​ယောင်ပြဇာလမ်းမှာ ​စစ်အုပ်စုအ​ပေါင်းအပါ​တွေရဲ့ ​ငွေညှစ်မှုကို ပြန်ခံ​နေကြရတာဖြစ်ပါတယ် ။

ကျားဖြန့်နှိမ်နင်းတယ်ဆိုပြီး စစ်အုပ်စုက တရုတ်နိုင်ငံသား​တွေဖမ်းဆီးပြ ကွန်ပျူတာနဲ့ ဖုန်း​တွေကိုဖျက်ဆီးပြတာ​​တွေကို စစ်တပ်လက်​အောက်ခံမီဒီယာ​တွေမှာ​ဖော်ပြ​နေ​ပေမယ့် သူတို့ဆီက​ငွေ​ကြေး​တွေ သိမ်းဆည်းတာဘယ်​လောက်ရတယ်ဆိုတာထုတ်ပြန်တာ​တော့ မ​တွေ့ရပါဘူး ။

●စစ်အုပ်စု ဟန်ပြကျားဖြန့်နှိမ်နင်း​​ရေး အလုပ်မဖြစ်

စစ်တပ်နဲ့ BGF တို့ကပြီးခဲ့တဲ့​အောက်တိုဘာလကစပြီး KK Park ကကျားဖြန့်လုပ်ငန်း​တွေကို နှိမ်နင်းတယ်ဆိုပြီး လုပ်ကိုင်​နေသူ​တွေကိုထွက်​ပြေးခိုင်း ၊သူ​ဌေး​တွေကို​နေရာ​ပြောင်း​ပေးပြီး အ​ဆောက်အအုံ​တွေကို မိုင်းခွဲဖျက်ဆီး​နေပါတယ်။

​အောက်တိုဘာလက​နေ ဒီ​ဇင်ဘာလ ၈ ရက်အထိ အ​ဆောက်အအုံ ၃၄၁ လုံးကိုဖောက်ခွဲဖျက်ဆီးခဲ့တယ်လို့ စစ်အုပ်စုကထုတ်ပြန်ထားပါတယ် ။

ဒါအပြင် ​ကျားဖြန့်လုပ်ငန်းအများစုရှိတဲ့ ​ရွှေကုက္ကိလ်မြို့သစ်က အ​ဆောက်အအုံ ၁၆၀​ကျော်ကိုလည်း ချိတ်ပိတ်ထားတယ်လို့ စစ်တပ်ကဆိုပါတယ် ။

ကျားဖြန့်လုပ်ကိုင်သူ​တွေအသုံးပြုတဲ့ မိုဘိုင်းလ်ဖုန်း​တွေ ၊ကွန်ပျူတာ​တွေ စတဲ့ဆက်စပ်ပ္စည်း​တွေကိုလည်း လမ်းကြိတ်စက်​တွေနဲ့ကြိတ်ပြီး ဖျက်ဆီးပြ​နေပါတယ် ။

ဒါ​ကြောင့် စစ်တပ်နဲ့ BGF က ကျားဖြန့်နှိမ်နင်း​ရေးလုပ်တာဟာ ကျားဖြန့်​တွေနဲ့ပတ်သက်တဲ့ သက်​သေ​တွေ​ဖျောက်ဖို့ကြိုးစား​နေတာလို့​ဝေဖန်မှု​တွေကျယ်​လောင်စွာထွက်​ပေါ်လာပါတယ် ။KNU က မင်းလက်ပံ​က ကျားဖြန်ခြံဝန်းကို ဖမ်းဆီးပြီးကျားဖြန့်​တွေဘယ်လို ကမ္ဘာပါတ်လိမ်​နေလဲဆိုတဲ့ အချက်အလက်​တွေရယူပုံနဲ့ ချိန်ထိုးကြည့်ရင်စစ်အုပ်စု သက်​သေ​တွေ​ဖျောက်ဖျက်​နေတယ်ဆိုတာပိုထင်းရှား​စေပါတယ်။

ဒါအပြင်အာဏာသိမ်းဒု​ခေါင်း​ဆောင် ဒုဗိုလ်ချုပ်မှူးကြီးစိုးဝင်းကိုယ်တိုင် ကွန်ပျူတာ​​တွေ၊ ဖုန်း​တွေအားလုံးကိုဖျက်ဆီးဖို့ အမိန့်​ပေးထားတာကစစ်အုပ်စုရည်ရွယ်ချက်ကိုမြင်သာ​စေပါတယ်။

“ မြဝတီမြို့မှာ ကြိုက်တဲ့​နေရာလက်ညှိုးထိုး ကျားဖြန့်မရှိတဲ့​နေရာမရှိဘူး ။ကြံခင်းလမ်းဆို ကျားဖြန့်ရုံ​တွေမီးစက်​တွေတဝုန်းဝုန်းနဲ့ “

မြဝတီ​​ဒေသမှာ ကျားဖြန့်ရုံ​တွေတကယ်နည်းသွားပြီလားဆိုတဲ့အ​မေးကို ​ဒေသခံတဦး​က​ပြောတာဖြစ်ပါတယ် ။

ဒါ့အပြင် စစ်အုပ်စုက ဟန်ပြဖမ်းဆီးမှု​တွေလုပ်ပြီးရက်ပိုင်းအကြာမှာပဲ ကျားဖြန့်လုပ်သူ​တွေကို ပြန်လုပ်ခွင့်​ပေး​နေပါတယ် ။

“ စစ်တပ် ဝင်စစ်တုန်းက​တော့ အကုန်ထုတ်သွားပြီး​တော့အခု ဒီဇင်ဘာ ၃ ရက်​နေ့ကစပြီး နိုင်ငံခြားသား​တွေ​ရော ၊တရုတ်​တွေ​ရော ၊ပြန်ထည့်​နေပြီ” လို့ မြဝတီ ​ဒေသခံတဦးက​ပြောပါတယ်။ဒီဇင်ဘာ လဆန်းကစပြီး ကျားဖြန့်လုပ်​သူ​တွေကို ပြန်ပို့ ပြန်စ​နေတဲ့​နေရာ​တွေက ဝမ်ခ(​ရွှေပီ​တောက်မြိုင်) ၊ ဧက ၁၀၇ စတဲ့ဘက်​တွေမှာလို့စုံစမ်းသိရပါတယ်။ဘုရားသုံးဆူက ဟိုတယ် အချို့မှာလည်း အခြား​နေရာကကျားဖြန့်သမား​တွေ​ရောက်လာပြီး လုပ်​နေကြတယ်လို့ ​ဒေသခံအချို့က​ပြောပါတယ်။ အရင်က ကျားဖြန့် ခြံဝန်းကျယ် ၊အ​ဆောက်အအုံကြီး​တွေမှာလုပ်တဲ့ပုံစံက​နေ ဟိုတယ်​တွေ ၊ရပ်ကွက်ထဲက အိမ်​တွေ ၊​အ​ဆောက်အအုံသစ်​တွေက​နေလုပ်တဲ့ပုံစံ​ပြောင်းကုန်တယ်လို့ ​ဒေသခံ​တွေက​ပြောပါတယ်။

ဒါ​ကြောင့်ကျားဖြန့်​တွေ တကယ် နှိမ်နင်းနိုင်ဖို့ ဆိုရင်​တော့ ​နောက်ကွယ်က အဓိကပါဝင်ပက်သက်​နေတဲ့အခု စစ်တပ်မရှိမှပဲ ကျားဖြန့်​တွေကွယ်​ပျောက်သွားမယ်လို့ မြဝတီ​ဒေသခံက​ပြောပါတယ်။

United States Institute of Peace(USIP)ရဲ့ အစီရင်ခံစာ​တွေအရ BGF ဟာကျားဖြန့်လုပ်ငန်း​တွေက​နေ နှစ်စဉ် ဒေါ်လာသန်းရာနှင့်ချီ ရရှိနေတယ်လို့​ဖော်ပြပါတယ်။ BGF ဟာ စစ်ကောင်စီရဲ့ ကွပ်ကဲမှုအောက်မှာ ရှိပါတယ် ။ဒါ​ကြောင့် BGF အဖွဲ့ ဝင်ငွေရဲ့ ၅၀ ရာခိုင်နှုန်းလောက်ကို စစ်တပ်ကို ခွဲဝေပေးတယ်လို့အစီရင်ခံစာ​တွေက ဆိုပါတယ် ။ အချို့အစီရင်ခံစာ​တွေမှာ​တော့ မြန်မာနိုင်ငံကကျားဖြန့်​တွေက တစ်နှစ်ကို ​ဒေါ်လာဘီလီယံချီ လိမ်လည်​နေပြီး ခွဲတမ်းအခုထက်ပိုများနိုင်တယ်လို့​တောင်ဆိုပါတယ် ။

ကျားဖြန့်လုပ်ငန်း​တွေရဲ့​နောက်ကွယ်မှာ မြန်မာစစ်တပ်ရှိ​နေတယ်လို့နိုင်ငံတကာ ရာဇဝတ်မှုခင်းများ ကိုင်တွယ်ရေး ကမ္ဘာလုံးဆိုင်ရာ အဖွဲ့ ဖြစ်တဲ့ GI-TOC က အကြီးတန်း ပညာရှင်ဖြစ်တဲ့ ​ဂျေဆင်တာဝါကလည်း​ပြောပါတယ် ။

ဒါ​ကြောင့် စစ်အုပ်စုရဲ့ကျားဖြန့်နှိမ်နင်း​​ရေးဟန်ပြလုပ်ရပ်​တွေက အလုပ်ဖြစ်နိုင်သလားဆိုတဲ့အ​မေးကိုကရင်ပြည်နယ်ကကျားဖြန့်လုပ်ငန်း​တွေကို ​စောင့်ကြည့်​နေတဲ့ ​ဒေသခံတဦးက​

“ ​ခေတ်​ပြောင်း ၊စနစ်​ပြောင်း သွားရင်​တော့ တမျိုး မ​ပြောင်းရင်​တော့ ဘာမှ မထူးနိုင်ဘူး” လို့ ပြောလိုက်ပါတယ် ။ ။