စစ်တပ်အာဏာသိမ်းထားတဲ့ မြန်မာနိုင်ငံ ရဲ့အကျပ်အတည်းအတွက် ထိုင်းနိုင်ငံက ဦးဆောင်ပြီး လာမယ့် ကြာသပတေးနေ့ (ဒီဇင်ဘာလ ၂၂ ) ရက်မှာ အာဆီယံအဖွဲ့ဝင်နိုင်ငံတွေကို ဖိတ်ပြီး အလွတ်သဘောတွေ့ဆုံဆွေးနွေးပွဲ လုပ်ဖို့ရှိနေပါတယ်။
ဘန်ကောက်မှာပြုလုပ်မယ့် အဲဒီဆွေးနွေးပွဲမှာ စစ်ကောင်စီ နိုင်ငံခြားရေးဝန်ကြီး ကိုတက်ခွင့်ပေးထားတယ်လို့ Thai PBS သတင်းဌာနက ဖော်ပြပါတယ်။
ဒီဇင်ဘာလ ၂၂ ရက် ဆွေးနွေးပွဲဟာ တရားဝင်အာဆီယံ အစည်းအဝေး သဘောမျိုးမဟုတ်ဘဲ မြန်မာ့နိုင်ငံ ရဲ့အကျပ်အတည်း ရိုက်ခတ်မှုကို ခံရတဲ့နိုင်ငံတွေ ကြား အလွတ်သဘောတွေ့ဆုံဆွေးနွေးအမြင်ဖလှယ်တာလို့ အကြောင်းပြထားပါတယ်။
ထိုင်းနိုင်ငံက စီစဉ်တဲ့ အဲဒီဆွေးနွေးပွဲကို ထိုင်းရဲ့အိမ်နီးချင်းနိုင်ငံတွေ တက်ရောက်မယ်လို့ သိရပါတယ်။
အာဆီယံအဖွဲ့ဝင်နိုင်ငံအချို့ကတော့ နှစ်ကုန်ပိုင်း ဆောင်ရွက်စရာရှိလို့ မတက်ရောက်နိုင်ကြောင်းအကြောင်းပြန်ထားတယ်လို့ Thai PBS ရဲ့ဖော်ပြချက်အရသိရပါတယ်။
ထိုင်းနိုင်ငံက အခုလိုစီစဉ်တဲ့ မြန်မာ့အရေးဆွေးနွေးမှုဟာ အမေရိကန်လွှတ်တော် ၂ရပ်က NUG နဲ့PDF တွေကို ထောက်ပံ့မယ့်အစီအစဉ်တွေပါဝင်တဲ့ ကာကွယ်ရေးဘတ်ဂျက်ကို အတည်ပြုလိုက်တဲ့အချိန် နဲ့မရှေးမနှောင်းမှာ ထွက်ပေါ်လာတာပဲဖြစ်ပါတယ်။
ဓာတ်ပုံ − AP
