စစ်တပ်အာဏာသိမ်းပြီးနောက် ကျောက်မျက်ဈေးပြင်ပမှာ အရောင်းအဝယ်ပြုလုပ်တယ်ဆိုတဲ့စွပ်စွဲချက်နဲ့ ဖမ်းဆီးထောင်ချထားတဲ့ မန္တလေး ကျောက်သမားအများစု ဒီရက်ပိုင်းမှာ ပြန်လွတ်လာကြပါတယ်။
ပြီးခဲ့တဲ့နှစ် ဒီဇင်ဘာလ အတွင်း မန္တလေး က ကျောက်မျက် ကုမ္ပဏီ ၂ ခုရဲ့ခြံဝန်းထဲမှာ အရောင်းအဝယ်လုပ်နေတဲ့ ကျောက်သမား ၅၀၀ ခန့်ကို စစ်ကောင်စီတပ်က ဝင်ပြီးဖမ်းဆီးခဲ့တာပါ။
ဖမ်းခံရသူ ကျောက်သမားတွေထဲမှာ တရုတ်နိုင်ငံသားတွေလည်းပါပါတယ်။
ဖမ်းထားသူတွေကို အိုးဘိုထောင်ကိုပို့ပြီး ၁ လကျော်အကြာ မှာတော့ တရုတ်နိုင်ငံသားတွေအပါအဝင် ကျောက်သမား ၂၀၀ ခန့်ကိုစစ်ကောင်စီကပြန်လွှတ်ပေးလိုက်ပါတယ်။
ကျန်တဲ့သူတွေကတော့ လိုင်စင်မရှိဘဲ ကျောက်မျက်ရောင်းဝယ်တဲ့ပုဒ်မ ၅၁(ခ) ၊ပူးပေါင်းကြံစည်မှု ကျောက်မျက်ပုဒ်မ ၅၄ တို့နဲ့စွဲဆိုပြီး ထောင်ဒဏ်တွေချခံရတာပါ။
ဒီရက်ပိုင်း လွတ်လာသူတွေကတော့ ထောင်ဒဏ် ၁ နှစ်ခွဲ ချခံရသူတွေဖြစ်ပြီး ဖမ်းခံရသူ အများစု လွတ်လာတာတွေ့ရတယ်လို့ ကျောက်သမားတွေအမှု လိုက်ပါဆောင်ရွက်ပေးတဲ့ ရှေ့နေတွေနဲ့နီးစပ်သူထံက တဆင့်ပြန်သိရပါတယ်။
စစ်ကောင်စီဟာ အာဏာသိမ်းပြီးနောက် ကျောက်ဝိုင်းပြန်စည်ကားဖို့နဲ့အခွန်ရဖို့အတွက် မဟာအောင်မြေ ကျောက်ဝိုင်းပြင်ပမှာ အရောင်းအဝယ်လုပ်သူတွေကို စီမံချက်နဲ့ဖမ်းဆီးခဲ့တာပါ။
